ابشركم ولدت بالسلامة والحمد لله.. لكن وضعي صعب

السلام عليكم ... كيف حالكم والله وحشتوني .. كل يوم اشوف الكمبيوتر قدامي في الصالة ودي اجلس ادردش معكم بس ما فيني حيل .. واليوم حسيت حالي احسن الحمد لله .

تذكرون موضوعي ... (افرازات بنية هل هي من علامات الولادة ...)) .. والله ما لحقت ارد على الأخوات .. اليوم الثاني الصبح الساعة سبع رحت للمستشفى ..
ولدت وجبت ولد ( محمد ) الله يحميه .. ولدته اول ايام السنة الميلادية يعني في عيد المسيحيين وتعالو شوفو الممرضات انا اتلوا من الألم وهم يهنون بعضهم بالعيد ويتركوني ويروحو يردو على صديقاتهم يتصلون من الفلبين يهنوهم بالعيد .. وفي غرفة الولادة تركتني الممرضة وانا خلاص على وشك اني ادفع واطلع الطفل واصيح ابي الدكتورة تقولي توك التخطيط يبين اذا فتح الرحم 9 سم او لا .. وراحت تجيب ابرة مسكن وغابت ثلث ساعة وانا من الألم اصفق الباب مسكر ولا احد يسمع وبعدين جابت الإبرة وغزتني في الورك وقالت بكل برود ((( نااااااااااامي .. ريلااااكس ))) قلت حسبي الله ونعم الوكيل انا جاية اولد وانتي تقولي نامي وصرخت وقلت الراس طلع ,,,, انهبلت واتربشت وعلى طول دقت على الطبيبة وجات بسرعة وخلال 5 دقايق ما شاء الله ولدت ويوم جاء زوجي بعد الولادة يطمن علي قالت له الممرضة (بسرعة ولادة ) الله اكبر ... قاعدة اتألم من الساعة سبع الصبح عندهم وهم ماهم داريين عن احد مشغولين بالمعايدة ويوم ولدت الساعة 11 الا ربع تقول ولادة بسرعة ولسى كانت تبغاني انام ... الحمد لله على كل حال ..

لكن حاليا وضعي صعب ليه والله اني ابكي كل يوم وما اقول الا الله يساعدني ولا اعترض على ما كتبه الله لي .. وهو ان بنتي عمرها سنة وثلاث شهور وكل يوم وقت النوم تبي تنام جنبي مثل ما تعودت وما تبي سريرها وانا احزن عليها مرة انها ما اخذت حقها بالرعاية واحضنها وابكي وما شاء الله عشان وزنها طيب ما اقدر اشيلها بعد ما تحطها الشغالة في السرير اتركها مع الرضاعة ترضعها واذا خلصت تبدأ البكاء تبيني اشيلها وهنا ابدأ انا ابكي معها وزوجي يدخل يضحك علينا واذا كان شبعان نوم ووده يسهر اخذها معه المجلس لين تنام يجيبها ..

دعواتكم لي اني اقوم على بيتي وعيالي وان الله يحنن قلبي على اولادي كل يوم اعصب عليهم ..