ابشركم ولدت ولله الحمد قصة ولادتي..

السلام عليكم حبايبي
ابشركم ولدت في يوم الاربعاء 12-11- طبعا ولادتي الثانيه وهي كانت مصيريه لانها تحدد مسار ولادتي الجايه ياعمليه ياطبيعي لان الاولئ تعب قلب الجنين بعد مافتح الرحم عندي 6واضطرو يولدوني قيصري ....
المهم يابنات ياكروشات انا كان موعد ولادتي 5-11بس طبعا اذا ماعوشرت ماكون انا فستق وجوز ع سن ورمح:mad:المهم ارتفع ضغطي ان موعد ولادتي طاف وانا مكانك سر قلت لازم اجرب اعشاب البنات اللي يقولونها لعل وعسئ تجيني ولاده عقب التاسع بيوم بديت اشرب القرفه مع القشر واشرب حليب وامشي واشم حلتيته ونزلت علي سدادة الرحم اليوم الثاني من العاشر وانا ع بالي انها خلاص ولاده واروح لمستشفئ قريب من عندي بس ابيهم يكشفون اذا كانت ولاده اروح للمستشفئ اللي اتابع معه قوئ الامن المهم وتكشف الدكتوره قالت الرحم مسكر وهاذي الفرازات عاديه واتحطم انا ع بالي الفرج جاء :icon28:وارجع البيت واكمل شرب قرف وحلتيته نقعتها وحطيتها في الفوطه وفي يوم 8-11لاحضت ان الافرازات زادات علي لدرجة ان الفوطه تتبلل بسرعه الظاهر كان يوم السبت حسيت انها موية الجنين قلت لازم اروح لمستشفئ يكشفون علي خذيت شنطتي اللي مجهزتها لي شهر ع بالي بينوموني لان مويه الجنين نزلت زي ولدي الاول رحت المستشفئ وكشفت قالت مفتوح 1 سانتي والمويه ماهي موية الجنين من غير مايسون تحليل اللي يبين اذا كانت مويته ولا لا قالت روحي واذا كتت عليك مره وحده تعالي وارجع البيت تيتي تيتي مثل مارحتي جيتي مع اني كنت متاكده انها موية الجنين بس عجزت اقنعهم :22:قلت هم ادرئ وعلئ هالحال لحد ماجاء يوم الثلاثا الافرازات والمويه زادات الاحظ المويه كل ماتحركت تنزل بشكل قوي المهم جاء زوجي من الدوام الساعه 10ومعه عشاء وقلت طيران ع المستشفئ بلئ عشاء بلئ بطيخ خلني الحق علئ ولدي لان طول الاسبوع المويه تنزل ولاحظت حتئ ان حركته خفت المهم رحت لقوئ الامن وكشفت قالت اقل من 1سانتي والمويه ماهي موية الجنين قلت تستهبلين :angry2:انا متاكده انه مويته شوفي ملابسي الداخليه مبلوله مو معقوله ماهي هي قالت اسويلك منظار ونشوف المويه من وين جايه وتسوي منظار وتسحب من المويه وتسوي التحليل وتطلع موية الجنين وخافت هي قالت لازم تنويم لان المويه لها اسبوع تنزل عليك "توكم تهتمون"بس ماعندنا سرير فاضي بحولك ع مستشفئ الدكتور احمد ابانمي المهم اخذ اوراقي واطلع لرجلي وانا ابكي :icon33:خوفتني الدكتوره لما قالت ان احتمال وضع الجنين في خطر وطيران ع مستشفئ الدكتور احمد ابانمي جيتهم الساعه 12 بالليل عطوني ملابس التنويم وحطو جهاز نبض الجنين وجهاز الطلق قالو مافيه طلق بس الجنين نبضاته ضعيفه انا خلاص قفلت الدنيا بوجهي قلت خسرت اللي استنيته طول اربع سنين وماجاء الا بعد الله ثم العلاج والتعب واقعد ابكي وحالتي حاله ويرتفع معي الضغط ورجلي عندي مايدري وش يسوي المهم يوم شافوني خفت قالو عادي هو مانزل نبضه الا مره وحده انتي يمكن ماكلتي اشربي عصير ويجيبون لي عشاء والله ماكان لي نفس بس خفت عليه لاني فعلا طول اليوم ماكلت شي وتجيب الدكتوره جهاز السونار وتكشف عليه قالت مويه الجنين شويه اشربي مويه كثير عشان اعوضه وقالت الرحم عندك مسكر بنخليك لبكره الصباح نشوف الاستشاري وش يقول نقدر نسوي لك تحريض ولا لا قعدت ادعي ان الله يسر ولادتي واولد طبيعي وانه يحفظ لي جنيني من كل شر جلس عندي رجلي وولدي لحد الساعه اربع ماكنت ابي ولدي يروح عني كنت خايفه اني اموت وماعاد اشوفه قعدت ابوسه واحظنه لحد ماختنق :eek:وهو يسال اللحين ياماما يجي النونو قلت له ان شاء الله يجي بصحه وسلامه واخذه رجلي ووداه عند امي ويجي الصباح الساعه 7وتجيني الممرضه قالت بنوديك غرفة ولاده بنعطيك طلق صناعي حطتلي الحقنه الشرجيه وحفت لي المنطقه مع اني كنت حافتها وددتني لغرفة الولاده ويسون تخطيط لجنين وتخطيط الطلق كان معي طلق خفيف جات الدكتوره وكشفت قالت الرحم مسكر وانتي معك طلق خفيف واذا جاء الطلق ضعف نبض الجنين يعني لو اعطينا طلق صناعي ماراح يتحمل الجنين مافيه مجال انك تولدين طبيعي وكان خاطرها مكسور وهي تقولها قلت اهم شي الحق عليه مومشكله عمليه عمليه قدر الله ومشاء فعل المهم خذوني للعمليات وانا قلبي يرقع بس قبل قالو وين زوجك قلت في الدوام مايقدر يجي قالو لازم تعطينه خبر قلت مو مشكله دقيت عليه وع امي وعلمتهم وااااااه من غرفت العمليات رعب بشكل فضيع لما شفت السكاكين قعدت اصيح بعدوها مابي اشوفها خصوصا اني بولد ببنج نصفي قاعده اترجئ فيهم عطوني بنج كاااااااااااامل لاحياة لمن تنادي في الاخير سلمت امري لله وعطوني ابرة الظهر وسدحوني وبدو شغلهم وانا للحين اترجئ في دكتور التخدير ع بالي مافتحو بطني للحين ماسكت الا ع صوت ولدي وهو يبكي مع اذان الظهر يالـــــــــــــبيه يهالصوت قلت لهم هذا صوت ولدي قالو ايه شفتي انك ماتحسي بشي وانك راح تشكرينا انا اعطيناك بنج نصفي وفعلا لحظه حلوه وانتي تشوفين ولدك وهو توه طالع احساس حلو جابوه لي وخلوني اشوفه وبعدها ودني غرفة الافاقه جلست فيها لساعه 2 وكنت شايله هم امي انها خايفه علي للحين كنت ابي ارجع لغرفتي عشان ادق واطمنها يوم طلعت ودقيت عليهاالا هي داريه وتبارك لي اثاريها دقت ع المستشفئ وعلموها الله يخليها لي وبشرت رجلي واهله ماكنت مصدقه اني ولدت وبخير وسلامه واني بشوف ولدي واهلي مره ثانيه مع ان في قلبي حسره اني خلاص ولادتي كلها بعمليه الله يعين مادري الخيره وينها فيه :(
من ناحية يابنات البنج النصفي حلو وفرق عن الكامل اول شي تشوفين طفلك وهو توه طالع من بطنك احساس حلو كانك والده طبيعي وغير كذا مايضايقك مثل الكامل بالاول تعبني البلغم والكحه وطول الوقت نايمه مااحس باللي حولي
ومن ناحية المستشفئ عنايه فائقه دلع لابعد الحدود ونظافه وممرضات اخلاقهم زي العسل ومااقول فيني دوخه الا يحضر عندي الدكتور اهتمام بالمريض صح ..وخياطتي تجميليه يخفون اثر العمليه..
بس فيهم عيب واحد اغلب الممرضات واغلب الدكاتره اجانب تبين احد تتكلمين معه عربي مافيه خصوصا الممرضات مايعرفون في العربي الا كلمات بسيطه
وخلاص انتهت كفيت ووفيت كتبت لكم ولادتي بالتفصيل الممل واي سوال عن المستشفئ والولاده انا حاظره..ادعو ان الله يحفظ اولادي لي ويكفيني شر من فيه شر لي...
والسلام خير ختام.......:26::26::26: