ابغى اتطلق من الجثه الي عندي... اي نعم جثه هامده ((الجزء الثاني))

اولا الي ما تعرف موضوعي ممكن تﻻقيه فالرابط التالي:-

http://forum.hawaaworld.com/showthread.php?t=3924677

طبعا يا بنات اغلبكم نصحوني اني اكلم اهل زوجي مره ثانيه علشان يعالجون ولدهم.. انا كلمت اخوان زوجي.. واحد مسكين ما قصر وحاول يساعدنا كثير بس ما كنت اشوف اي تغيير من زوجي يمكن ﻷن اخوه هذا اصغر منه.. كلمت الكبير بس هو شكله يأس من اخوه الي هو زوجي وما حاب يتدخل.. قلت لهم اني ببلغ ابوهم كلهم وقفو فوجهي وارفضوا بحكم ان ابوهم رجال كبير بالسن وممكن تجيه جلطه وخايفين عليه مع اني احس الوحيد الي زوجي ممكن يخاف منه او الوحيد الي ممكن يأثر على زوجي هو ابوه .. خصوصا ان ابوه الحمد لله فخير وعلاج ولده ما بيكلف عليه شي...
تميت افكر واقلب بالموضوع ومره هددت زوجي اني ببلغ ابوه لقيته فجأه انقلب لإنسان شرس جدا وﻷول مره يمسكني من ايدي بقو كأنه بيخلعها ويهددني اني لو بلغت ابوه فبيطلقني .. ضحكت ضحكة استخفاف وقلت له والله!! ومن قالك اني متمسكه فيك او اني مابي الطلاق.. فقال لي ما رح اطلقك بس.. رح احرم ولدك من انه يتعالج ةكﻻم من هذا القبيل... طبعا انا اعرف زوجي عدل مستحيل يسويها .. هو فيه بذرة خير وتهديده هذا كله بس من خوفه من ابوه او من خوفه على ابوه..
كلمت وحده من خوات زوجي وقلت لها الي صاير معاي ورأي اخوانها فهي قالت لي سمعيني يا فﻻنه.. محد بيعدل اخوي إلا ابوي.. وما عليكي من كﻻم اخواني ﻷنه مب حاسيين بحرقة قلبك كثرك.. ومافي افضل منك انتي انك تقولين ﻷبوي لأنك افضل وحده بتوصلين له الصوره ومدى فظاعتها..
وفعلا توكلت على الله واتصلت بأبو زوجي وكانت الساعه فحدود 5:30 .. وقلت له وانا ابكي يا عمي ترى زوجي رجع ﻹدمانه وانا تعبت معاه .. حاولت اصلحه وما قدرت والحين اطلب منك انك تتدخل..
انا صج يتيمه بس احس الله عوضني بأبو زوجي .. يا بنات مهما حكيتلكم شقد احبه وشقد احس بأنه غمرني بحنانه كلماتي ماتكفي..
المهم كلها نص ساعه إلا ابو زوحي عندنا فبيتنا... وقتها كان زوجي بالحمام يتعاطى.. على وصلت عمي اذن المغرب فقالي بيصلي اول شي.. صلينا وقعدنا انا وياه (زوحي لسه مايعرف ان ابوه عندنا) وقالي ليش يابنتي طول هالفتره انتي مستحمله بدون ما تقولين لنا.. واخذ يعاتبني ليش ما بلغتهم منزمان.. عموما سألني.. قالي انت شتحسين.. ايش مشكلة ولدي بالظبط وايش افضل علاج له.. هني شوي الا حسيت بزوجي نازل من الدرج.. ودخل علينا المجلس..
دخل سلم على ابوه وقعد سااااااكت وﻻ كلمه... ابو زوجي على طول قاله (علشان يحميني من زوجي) انه كان مواعد سمسار فمنطقتنا قايله على فلل للبيع وبعدين لما شاف وقت المغرب دخل قال يمر يصلي عندنا.. وفعلا شكل زوجي صدقه..
بس شوي وما لقيت إلا زوجي اجهش بالبكاء وقعد يبوس راس ابوه ويقوله يبه ساعدني انا ما ادري شفيني.. يبه انا رجعت للإدمان وما قادر اوقف.. يبه انا مادري ليش من بدت اخواني انا الي طحت فذي المصيبه... والله يا بنات مالقيت نفسي إلا انا بعد بديت ابكي .. والله كسر خاطري زوجي .. حسيت ﻷول مره من شهور اني ودي المه واضمه... يعني هو حاسسه بمشكلته..
ابو زوجي الله يحفظه تم يقوله كﻻم حلو.. كﻻم كله حكم ومواعظ واحتواه بحنيته.. وقاله انت حالك احسن عن غيرك بكثير ﻷني واقف معاك.. وكل اهلك معاك وزوجتك معاك وكلنا بنساعدك تتخلص من الي انت فيه ةعمرنا ما بنتخلى عنك... اقترح عليه يسفره يتعالج بس زوجي رفض يرجع لنفس المركز الي كان فيه.. فما ضغط عليه ابوه وقاله طيب بنشوف بس ايش رايك انت وزوجتك وولدك تجون تقظون كم يوم عندنا بالبيت... انا هني حسيت برااااحه... وفعﻻ لمينا ثيابنا وقفلنا البيت واحنا الحين فبيت عمي ابو زوجي.. حسيت انه هم كبير انزاح من قلبي ﻷنه على الاقل ابو زوجي معاه 24 ساعه وبيراقب كل خطواته وتحركاته وطلعاته ودخلاته... هذا انا الحين اكتبلكم المستجدات من بيت عمي وبنشوف ايش الي بيصير فالايام الجايه.. وما اقول الا حسبي الله ونعم الوكيل فعيال الحرام الي ورطو زوجي وجرو رجله فهالإدمان..
اطلب من كل وحده تمر على هالصفحه تدعي لزوجي ان الله يساعده ويشفيه ويشفي ابني حبيبي..

واكرر وقول كل الي راسلتني على الخاص تسامحني ماقدر ارد عليكم ﻷن مشاركاتي بعد ما وصلت 50