ابغى افسخ العقد لكن....

السلام عليكم
انا ملكت قبل ٤ اشهر فقط ملكة لسا ماتزوجته
حصلت معي بداية الزواج مشاكل بقولكم وش صار
اول شيء بعد الملكة بالبيت كان هو بمكان وانا مكان يعني ماحسيت بمشاعر تجاهه وبس كنت طول الوقت متوترة
وجاب موضوع ان اهله معددين وانه طبيعي بينهم
وطلعت معه اليوم الي بعده ولكن انا تاخرت عليه عشر دقايق باول يوم طلعه معه وقال لي لو بتتاخرين كان قلتي لي مااجي مع اني ماقلت له تعال خذني انا جاهزه دق علي وانا كنت نايمه
وبعدها طلعت معه وانا ضايق خلقي لان اول يوم اطلع معه وكذا يعاملني بس سكت ومارديت على كلامه وبعدها رحنا المطعم وطول الوقت هذا كان جالس على جواله ويضحك ويسولف ومايعطيني شويه اهتمام وانزعجت اكثر لكن سكتت لان مااعرف وش اسوي ولا ارد عليه
ولما رجعت انهرت بكي عند اختي وقلت لها وش صار
وبعدها هي سألتني تبين اخبر ابوي ولا لا وقلت لها خبريه وخبرت ابوي وابوي انزعج من طاري التعدد لانه تو متزوجته ويجيب ذا الموضوع مو شيء كويس
وابوي دق على اهله واهله جو وحتى اهله انزعجو وكذا من تصرفه معي
وبعدها مشينا بالموضوع واعتذر لي
طبعا بعدها رسلت له رسالة انه لازم نتفاهم ونحل مشاكلنا لانه هو قال لي لما اعتذر لي انه تكون مشاكلنا بينا وتمام وقلت له ذي فترة نعتبرها تعارف عشان مانتوهق بعدين لو ماعجبنا حاجة بالثاني مانسكت عنها وكذا(كنت ابغى المح له ان فيه كم حاجة مو عاجبتني به) بس رد علي وانصدمت من رده قال لي سكري الموضوع وخبر امه
وامه خبرت امي ان بنتك تطلب الطلاق وانا ماطلبته وامي عصبت علي وتدهورت نفسيتي وقتها حرفياً
بعدها بفترة اكتشفت انه يقول لاخوي جيب لها وسو لها واخوي طالب جامعي ماعنده مصروف غير المكأفاة واخوي حس انه انضغط من اوامره ذي ويعني فوقها مايعطي اخوي مبلغ عشان يجيب لي الي هو يطلب منه ف سكت اخوي وماقال لي لكن هو زوجي بنفسه قال لي غريبه فلان ماعطاك ذا قلت له كيف يعطيني قال انا قلت له يعطيك وانصدمت انه طول هالفترة يتأمر عليه بس ماقلت شيء تو طالعين من مشاكل ماني ناقصة زيادة
وتراني على فكرة ماطلبت منه حاجة عشان محد يفهم انه هو كلم اخوي لان انا ابغى ذا الشيء لا هو من نفسه
بعدها طلب مني اجي للمنطقة الي هو فيها بس انا اعتذرت وقلت اختبارات ومااقدر وبعدها بايام اصر على الموضوع انه يخليني اجي وقلت له ماابغى اجي وانا لسا مااعرفك كويس وابوي قال لي ان مااقابلك لين ماارتاح معك واشوف نفسي كويسة معك وسكت هو
وبعدها مره ثانيه هو جاء للمنطقه بس ابوي كان وقتها مسافر مو موجود ابوي وقال يبي يجي عندي قلت له شلون تجي وابوي مو هنا يعني ابوي ماراح يوافق اساسا وراح كبشر المحادثة ورسلها لامي وخلاني انا الغلطانة يعني رسل نص المحادثة وصرت انا الغلطانة وامي ماكلمتني بس انا بالغلط فتحت جوالها وشفت انه راسل لها المحادثة انزعججت وسكتتت ماتكلمت
ومره ثانيه طلب مني اجي برضو للمنطقه حقتنا رفضت رفض قوي وقلت له مالي خلق اشوفها او اروح لها حتى
وقلت له مره ثانيه لاتكبشر لامي كل حاجة تنقال وقال استغفرالله والله يهديك بدون مايتفام حتى او يبرر لنفسه هذا الي يزعجني ان طول الوقت هو يقولي لازم نتفهم ومشاكلنا بينا بس هو مدري ايش فيه يقول لكل البشر مشاكلنا انا ماقول لامي مشاكلي الي معها الا اعرف ان هي تدري عنها بسببه متخيلين كيف!!


عاد الحين ابوي قال لي عطيني ردك الاخير تبغينه ولا لا وطبعاً اهلي كلهم ضد قراري اني افسخ العقد بس انا الوحيدة المصره عليه وابوي برضو لاحظ ان فيه تصرف مااعجبه به والي هو ان طول هذا الوقت ماقدم مصروف او حتى هدايا او اي حاجة على الاقل يعني بعد المشكله يحول يراضي او يسعد
وحالياً جيت لكم عشان اشوف هل اكمل معه او لا لان اهلي كلهم ضد قراري وماعندي احد استشيره من بعد الله غيركم
وعمري ١٩ وهو اكبر مني بخمس سنين…