ابغى اقضي نفاسي ببيتي ولكن...!!

السلام عليكم
اخباركم صبايا
حابه اخذ بعض النصايح منكم خصوصي للي جربت النفاس ببيتها??
انا باذن الله قررت هالمره اذا الله تمم لي نفاسي ببيتي
خصوصي اني جربت بطفلي الاول اكون عند اهلي وماطولت جلست اسبوع ورحت بيتي لاسباب كثيره خاصه فيني
وهالمره قررت خلاص هالمره لا اسبوع ولاغيرو خصوصي انو عندي ولد عمره سنتين ومتعلق بابوه مرررره ولاأبغى اشغل امي فيه لانو حركي مره الله يهديه وانا بطبعي مااحب اثقل ع احد خصوصي الكبار وزوجي وافقني بهالموضوع
بس المشكله تكمن انو بيتي بالديره وماشاء الله تبارك الرحمن ع جماعتنا ....والامر انو عندهم قل وعي بامور الزيارات هذي النقطه اللي شايله همها
اذا اخت زوجي وهي اخته ماقدرتني وراحت بعيالها تغثني قال ايش تصيف وتستانس ع حسابي هي وعيالها وكنت لاانام لا بالليل ولا بالنهار هذا بولدي الاول كنت نفاس وزوجي كان ايامها تعبان وطفل صغير وهي جايتني بكل عين قويه مع انو عندها اخ ثاني كان ممكن تروح عنده وتتمشى ع قولها وهو زوجته فاضين بس حبت تعاند وجت عندي وهي تعرف اذيه اولادها كل مااتذكر نفاسي الاول تجيني نفسيه لاني ولدت وظروف سيئه كثير حولي بس ان شاء الله المره ذي غير
واللي جلطني اكثر انها كانت تقول لاهلها انها ماتخليني المس شي وكل شي بظهرها شغل بيت وطبخ وانها تمسك ولدي وتخليني انام وانام ورب البيت والله شاهد علي ماشفت منها كل اللي قالته
كان كل شغل البيت وحوسه عيالها بظهري غير عنايتي بطفلي وبزوجي المريض وحجتها بذاك الوقت اني مااعرف اشتغل بمطبخ مو لي ولااعرف ايش تحبي
طيب جايتني ليش?? ?مو شايفه وضع اخوك محتاج راحه وزوجته والد مالها اسبوع
وفوق هذا تتمنن عند اهلها انها سوت كل شي وانا خليتها بقلبي ولافضحتها مشيت لها كذبتها
وهالمره حبيت نفاسي ببيتي بس شايله هم هالنماذج اللي مهما قلتي لها ماتفهم
واذا تكلمتي عملت مشاكل وفتن
وزوجي عارفها وبنفس الوقت عمتي طيبه ام زوجي اقصد بس كبيره بالعمر وانا متاكده انها تبي تجيني بس انا والله يابنات مااعرف اطلب من انسان كبير يخدمني ويشهد الله اعزها واحبها واحترمها بس والله مااتخيل اخليها تسوي شي لو اموووووت وجع قلبي مايطاوعني
ودي تجلس عندي وتروح بيتها تنام ماابغاها تضطر تنام عندي لاني اعرفها مابترتاح بالبيت الصغير وبتتضايق بس بتتحمل عشاني
تعودت ع البيوت الوسيعه والاحواش
وبنفس الوقت وجودها بيخلي الناس اللي ماتقدر مطامرين عندي ليل نهار
ع فكره بديرتنا اللي تولد يصير بيتها ملعب للحريم يعني الدعوه مش زياره ونتحمد بالسلامه ونمشي لا
نبسط ونتجمع ونستانس ع حساب هالضعيفه النافس وكل البزارين يجون عشان يشوفون النونو متخيلين الوضع كيف والله شاهد علي هذا هو الحال
ابغى تعطوني افكار اقدر اسيطر فيها ع هالامور بحيث مااتعب
وكيف اتصرف مع هالنماذج بدون ماازعل احد
انا ماراح اطلب من احد يجيب لي اكل ولامشرب اللي بتجيب من نفسها وترسل يعطيها العافيه اما اطلب مستحيل ولكم تتخيلو بنفاسي الاول كل شي اسويه بنفسي ولادتي كانت بصيفيه والناس مسافره وجاراتي ماكانو موجودات
كيف اتصرف مع هالموضوع
ابغى بيتي لانو راحتي فيه .... وكل صديقاتي يقولون راحتك ببيتك بس والله بتندمين لانك بتشوفين الناس ايش بتسوي فيك
بس انا مصره ابي اكون ببيتي انحرم من راحتي عشان ناس ماتقدر
ودي يخلوني ع الاقل 4 ايام ارتاح وبس ماابغى غيرها
اعطوني نصايحكم واقتراحاتكم حتى يكون نفاسي ببيتي راحه لي
ولكم كل الشكر والتقدير