ابغى سبعة بنات جادات جدا ً جدا ً يساعدوني في فكرتي مدة شهر

السلام عليكم و رحمة الله و بركاته

كيفكون صبايا؟؟

انا جاتني فكرة مرررررررررررررة تجنن ..

اولا نبذة عن نفسي ..

أنا متخرجة من قسم اللغة الانجليزية من سنة و قاعدة عطلاي بطالي ( بتشديد الطاء )

قعدت افكر بيني و بين نفسي و اقول انا ازا قعدت كدا اكيد بنسى اللغة و ما حطورها .. يعني اقعد محلك سرك..


طيب ايش رايكم كل اسبوع نحددلنا موضوع و كل وحدة تدور موضوع كامل ( مقال او قطعة او خبر كامل ) و نترجمه و نطلع الكلمات الصعبة فيه و نحفظها. بحيث كل وحدة عليها الدور في يوم .. يعني تجيب واجبها معاها و نحله و نحفظه .. و اليوم الثاني الدور يكون على الثانية تجيب موضوع و نترجمه و نحفظ كلماته و هكذا ..

يعني الاسبوع الاول نخليه اخبار او مقالات سياسية و اقتصاد

الاسبوع الثاني نخليه قصص عالمية مختصرة

الاسبوع الثالث نخلية وصفات طعام

الاسبوع الرابع نخلية ديكورات و تصميميات

او اي شي نقترحه يعني كل اسبوع ناخدلنا موضوع

ايش رايكم يا بنات معايا و لا لأ ؟؟؟

ابغى بس سبعة بنات يدخلون معايا التحدي ..

يالله نتحدى نفسنا و كسلنا

انا بصراحة وحدي ما انجز حاجة احب اشتغل ضمن قروب يساعدني و اساعده

اللي موافقة و شايفة نفسها قد التحدي ترسلي ع الخاص او تكتبلي هنا .. اللي يريحها

اتمنى اشوف ردود دحين قبل ما يبرد حماسي