ابغى فزعه المجربين الولاده

اختي المؤدبة..
الله يقومك بالسلامة ويبلغك بسلامة البيبي الي يسر عينك
ويسعدك ان شاء الله.
اما بالنسبة لأسئلتك حتلاقين اجاباتها وبالتفصيل الممل في منتدى الحمل والولادة
ولو كان عندك اي استفسار تقدرين تسألينهم ومارح يقصرون ان شاء الله.
تحياتي لك
ام يارا

هلا حبيبتي المؤدبة ........ وش دعوى قلبي كلنا خوات

اول شئ شلون تعرفين ان علامات الولادة ..... يجيك الم يا في بطنك او الظهر يجي ويروح
في البدايه تكون في فترات متباعدة ... بعدين اذا صار يجي كل ربع ساعه احسن تروحين المستشفى علطول ....... وقبل لا تروحين خذي شور و تعطري علشان ما تنضرين اذا جاك احد بعد الولادة
طبعا لازم تكونين مجهزة شنطه البيبي من قبل::
قميص خاص فيك واحسن يكون فيه ازرار اسهل للرضاعة و ملابس داخليه
( مشط - فرشة اسنان - عطر- كريم )
للبيبي :
فنيلة داخليه - بارباتوز - مهاد - بطانيه

ان شاء الله ما اكون نسيت شئ

والادعية ::
اذا تعسرة ولادة المرأة فتقرا هذي الايات وسورة الزلزلة في ماء , ثم تشربه المرأة وتمسح منه على بطنها فانها تضع بسهولة - باذن الله - وقد جرب ذلك فنفع الله بها. وهذا داخل في قولة تعالى ( وننزل من القران ما هو شفاء ورحمة للمؤمنين )

1) الاية الاولى : ( الله يعلم ما تحمل كل انثى وماتغيض الارحام وما تزداد وكل شئ عنده بمقدار ) الرعد

2) الاية الثانية : ( والله خلقكم من تراب ثم من نطفة قم جعلكم ازواجا وما تحمل من انثى ولا تضع الا بعلمه وما يعمر من معمر ولا ينقص من عمره الا في كتاب ان ذلك على الله يسير ) فاطر

3 ) الاية الثالثة : ( والله اخرجكم من بطون امهاتكم ولا تعلمون شيئا وجعل لكم السمع والابصار والافئدة لعلكم تشكرون ) النحل

4) سورة الزلزله ......
*********

والتمر مرررررة زين ...... ( وهزي اليك بجذع النخلة تساقط عليك رطبا جنيا ) مريم


اما النفاس ... الغذااااااء اهم شئ
البر مررررررررة زين
الفطور ( مصابيب - محلى - او الاغذيه اللي فيها بروتين بيض - حليب )
الضحى : مرقة لحم ... وتتطبخين معها شوي حلبة مع البهارت والكمون والفلفل الاسود
الغداء : عادي رز مع لحم او دجاج وخضار
اجتني الخضار هذي ( باذنجان - باميه ) >>>>> هذا اللي اعرف انه مو زين لنفاس
العشاء :: اللي تبين بس كلي لا تبخلين على نفسك لانك محتاجه غذاء علشان يرم عظمك
طلع منك طفل ...مو اي كلام

كنت احشى 3 تمرات رشاد لاني ما اقدر الهم .. اذا كنت تقدرين ملعقة الشاهي الصغيرة رشاد
لمدة 3 ايام بس مو وراء بعض ....... يوم وراء يوم او اكثر

البااااااارد ممنوع البيبسي لالالالالالا
حتى لو تشربين مويه احسن تكون دافيه ... علشان ما يطلع لك كرش
ترا الطحينيه زينه لادرار الحليب

شكلي كثرت عليك الكلام ...... بس هذا اللي طلع معي وان شاء الله ما اكون نسيت شئ
والله يسهل عليك
ام رنــــــــــــــــــودة
:27:

هلا فيك والله ان قلبي معك

والله يقومك بالسلامه وتشوفين عيون البيبي بخير

ويفرج لك من كل ضيق

*****************************************************

الولاده :

انا ماتجيني طلوق ولا الم يقولون تعالي عشان يولدوني ويخافون لا يجي البيبي مضاعفات
تروحين للموعد وتشوفين الموعد المحد د للولاده وتجينهم فيه
والي يقولك الدكتور لازم تسوينه

بالنسبه للملابس البيبي اشتري الفنايل الداخليه (للحفاظ) والبربتوسات خوذي قطنيه 100%

والافضل تكون كل ملابس البيبي قطن 100% علشان ماتسبب له حساسيه ومهاد للطفل ولفات خارجته

وبودر للجسم وتشترين من الصيدليه محلول المعقم حق الابر علشان تنظفين فيه سرة البيبي وتعصرين عليه منه

علشان بسرعه يلتم ويطيح ( وياليت ماتكبين على جسم البيبي بودره كثيره على شان ماينكتم من غبار البودره
حطيه بيدك ودلكي فيه جسمه )

واشتري زجاجات الرضاعه من الصيدليه ماركه (بيجون ) والحلم الابيض (بيجون ) مقاس سمول S ( والحلم الي يجي مع الرضاعه ارميه لانه ماهو كويس)



وتاخذين من العطار اليانسون وسكر نبات يكون نظيف ونظفي اليانسون من الشوائب الي فيه وحطيه بعلبه

تفوحين مقدار ملعقه طعام كبيره على كاس ماء صحه

وتحطينه معه شويه سكر نبات وتحطينه بالرضاعه الين يصير دافي وترضعينه

(ولا يكون حار على شان مايصير الكاث = حبوب بالفم )

ولا رضعتيه بعد كل رضعه وقفيه على متنك وطبطبي عليه حتى يفرغ الهواء منه علشان مايستفرغ

هذا للبيبي
**************************************************************

بالنسبه لك

روحي للعطار وخذي من عنده كيلو حلبه القصيم>>>> لانها افضل الانواع

وخذي كيلو حبه البركه (سويداء )

وخذي كيلو كمون + كيلو رشاد
ودخون نفاس + اربعه كيلو رز حساوي علشان مايطلع لك البطن وفي فتره نفاس لا تاكلين رز الا رز حساوي على شان مايبرز بطنك


خذي الحلبه ونضفيها من الشوائب والحصئ والسويداء نفس الشئ والكمون والرشاد

بعد ماتنظفينها تاخذين نص الكميه من الحلبه والسويداء والكمون وتطحنينه مع بعض

تاخذين حليب السعوديه وتفوحينه وتكبين ملعقه كبيره من المقادير المطحونه وتشربينه كل صبح على شان يلم عظمك ويكثر الحليب و

وتاخذين الرشاد وتاخذين تمر مع اصبع زبده وتطلعين النواه من التمر وتفركينهالزبده مع التمر والرشاد وتحطينها

على شكل كور وتاكلينها في كل صباح مع فنجال قهوه وكثري وكثري من الرشاد علشان مايصير معك امساك ويطلع

كل الي بطنك من اوساخ فتره الحمل


بالنسبه للعيش الحساوي خذي مقدار كاس ونص (كاسه بوك الجبن ) تغسلينه وتنقعينه بماء حار

وتاخذين بصله صغيره ولحم غنم ولازم تكثرين من اكل الحم بالنفاس وتحمرين البصل وتظيفين اللحم والبهارات

وتضيفين له الماء وتخلينه يطبخ الين تستوي اللحمه وتضيفين معه ملعقه حلبه كبيره وحبه البركه

ويكون الماء اكثر من نص القدر وتكبين الارز عليه لين يصير مثل الجريش


وبالنسبه لفطورك الصبح فانصحك بكاس الحليب الي معه الادويه + عصيده

بالنسبه للغداء يكون الارز الحساوي

والعصر لازم القهوه مع الرشاد وشاهي النفاس يبيعه الحواج ( العطار )

والعشاء يكون مرقوق مع الادويه


ودخون النفاس تدخنين بعد ماتشطفين بطشت فيه ماء دافي مع مقدار ملعقه من الملح وتنشفين

ويكون عندك مدخن (ياليت تخصصينه للنفاس ) وتحطين مقدار ملعقه صغيره ونص من دخون النفاس

علشان مايجيك شمم والهواء الي فيك يطلع

*************************************************

وياليتني اقدر اخدمك مثل مااكتب بالنت

واي خدمه او استفسار اكتبي لي رساله خاصه ومن عيوني

والله يقومك بالسلامه ويخلي لك البيبي وابوه ويفرج لك من كل ضيق وللمسلمين



وادعي وادعي وادعي وقت الولاده في كل شي مضايقك لان ربي يستجيب ان شاء الله دعاك وقت الولاده


ومع تحياتي

وجه الخير

سلام

الاخت ام رنوده ماشاء الله عليها ماقصرت وفت وكفت
ان شاء الله تقومين بالسلامه ولاتنسين بشرينا