ابغى مشورتكم الحين ..من فضلكم ..

السلام عليكم ورحمة الله وبركاته
كيف حالكم يا حوائيات. .
ابغى استشيركم في موضوع. .
اليوم أهل زوجي وبالاصح أخو زوجي عامل عشاء بمناسبة زواج أولاد أخوانه. .
وجات في بالي فكره أقدم فيها هدية لي زوجي واشتري كيكة عليها صورته. .
بتقولون ليش هدية لزوجك والمناسبة لي أولاد أخوانه. .
أول شي زوجي صاير مراهق في سن شايب. .تمام يعني احسه لما يشوف العرسان والاحتفالات أحس انه هو يبغى مثلهم. .ويمكن هذا طبيعي فينا كلنا بس الله يهديه هو دي المشاعر يظهرها. .فابغاه يحس إن العشاء بمناسبة زواجه هو كمان وأنه هو كمان عريس في كل يوم وليلة ...
ثاني شيء. .انا ليا أسبوعين وانا زعلانة منه .وبعيدة عنه ..بيننا سلام وطلبات وبس ..انا ملازمة الصمت وهو كذلك ....فيه أسباب ..لو اقولها لكم بتقولون ليا كمان تفكرين فيه ....هو ماسك نفسه وانا ماسكة نفسي .. .ايش اعمل ..
بس ابغى احسسه انه لسا الحب بيننا. .
ايش رأيكم ..اعملها خاصة في البيت بعد العشاء ..
وإلا أقدمها له قدام أهله ..
انا فكرتي بعد العشاء أقدمها له قدام أهله ..مع اني خايفة منهم ..بس ابغاه يحس انه هو كمان عريس وشباب ..ترى هو ماهو بشايب. .بس اربعيني مراهق. .وابغاه يحس بوجودي ويهتم فيني. .ويهتم فيني كزوجة يقدر وجودي يحترم طلباتي ورغباتي. .زي ماهو يبغى انا كمان ابغى ..لا يستهين فيني ويستغفلني. .
عشنا ايام حلوة من قبل ليش ندفنها ونحطها في ألبوم ذكريات ونحن أبطال تلك الأيام ..ليش التغيير اللي صاير ..ليش نخلي الأيام تمشي بدون نكهة. .ليش ما نرجع كل شي حلو ونعيشه ونتعايش معاه. ...
ابغى مشورتكم. .الله يجزاكم خير. .