ربي يهديه حاولي في لحظات الصفاء تنصحيه يكون حنون علي اولاده، ويعاقبهم عقاب تأديب وليس تعذيب، اذا كان ضرب مبرح استنجدي باهله واهلك وكلميهم يحضرون ببيتك وواجهيه امامهم واذا كان ضرب خفيف فأغلب الاباء يضربون اولادهم، حاولي لما يرجع من العمل تهدي الاولاد وتلطفي الجو، ولما يكون نايم لاتخليهم يزعجونه، وعلميهم يقولو حاضر ونعم، وصدقيني الطفل ماله الابيت أبوه،(ابتعد عن دارك ينقل مقدارك)
ويارب يصلح حال زوجك ويهديه
ادعليه برمضان وقيمي الليل والله سميع مجيب لطيف رحيم

هو سبب الكركبة في البيت نطمت نومهم جا خربه.
باختصار مايبغى اتكلم صاير يقولي اسكتي مايبغى يسمع غير الشيء اللي يبغى يسمعه خل ينفعوه اللي غيروه مدري وش اقول الشكوى لله.
مافي لحظات صفاء عنده انا اصلا اشوفه حتى العشر دقايق اللي يجي فيها متاخر تصير فيها مشكلة.
هو ينتقد كل شيء بس انا مطلوب مني اكون صنم مايتكلم لو اتكلم مايعجبه اقول غلط مايعجبه يعني في ناس باختصار يبغى يسمع بس الكلام اللي وده يسمعه.
اعطتني اخصائية العنف الاسري جهة استشير فيها بس اللي حولي خوفوني يقولو يمكن يعرفو رقمي ويسوو لي سالفة كبيرة انا تعبانة بموت جاب لي اكتئاب زيادة .

هم عايلته كلهم كذا يضربوا عيالهم وهم قرايبي بعد ...واحد توه طالع من السجن دخل وطلع بكفالة ذكرته به يقول اسكتي...لو اقوله اسكت كان يمكن يشلخ حتى راسي لولا قلة الحيلة بس.

الاغلب ردود ان الناس يضربو عيالهم في البيت.
بس انا يوم اشوف زوجي معصب ويلحق طفل بيضربه انا اخاف اصير حتى ابكي واكتئب زيادة اكره كل شيء حياتي واللي فيها واللي سبب في ظروفي ...طفل رضيع مايعرف يدافع عن نفسه وانا احس بالذنب لامادافعت عنه بس رد فعل اسكتي..وانا مقدر اشوف غلط واسكت خاصة شخص ينتقد كلشي
.مدري يعني انا حساسة والا هذا رد فعل طبيعي اني اخاف واصير ارتجف والا هذا يعني يصير للي بس عندهم هلع واكتئاب غير معالجة
يارب تفرج هم كل مسلم وتجعل رمضان نهاية لكل الظالمين ونصرة المظلومين💔.

صعب احنا الغرباء نفيدك بشي نجهل تفاصيله وجوانبه القانونيه والنظاميه
لازم انتي تجمعين افكارك و بنفسك تسألين اهل الاختصاص بدون لا تقولين ان السؤال يخص حياتك الشخصيه وبدون لا تسترسلين بالفضفضه والشكوى وتقولين الزوج فيه ويخطيه و ... الخ مجرد استفسري منهم فقط بالحاجات اللي تحتاجين لها جواب وقفلي .
لان كل الكلام اللي تقولينه عن اخلاقه واسلوبه مو شي جديد اغلب الناس عندهم هفواتهم وزلاتهم وعيوبهم
واذا كنتي تنتظرين ان زوجك يتحول من انسان الى ملاك بتكونين فاهمه الحياه غلط
وبخصوص انك ترمين اللوم على اهله وخواته اللي مسميتهم النسرات وتتهمينهم بالتخبيب انتي تكذبين على نفسك وتحاولين تلاقين مبرر لسوء اخلاقه مع انه واضح وضوح الشمس ان هذا طبعه وتربيته حتى مع اهله
مشكلتك الاساسيه مو قادره تتقبلين اطباع هذا الزوج ولانك مو متقبلته ماعندك استعداد تلاقين طريقه او تعامل او اسلوب مختلف توصلين معاه لنقطة إلتقاء وتفاهم
وللاسف الحياة الزوجيه ماتتحمل ان الرواس تتناطح وكل واحد يبي يبين انه هو الاقوى واللي كلمته تمشي
لازم يكون في شوي ذكاء اجتماعي وعاطفي اذا طرف شد الثاني يرخي واذا طرف عاند الثاني يسلك ويمشيها كذا الحياه تمشي بتكبير الراس مو بتكسير الراس
وبعدين ليش ميته رعب منه ماني فاهمه السبب ؟
وليش يوصل الحال بينكم انه يمد يده عليك ليششش ؟
ليش ما تورينه العين الحمراء بأي طريقه وتوقفينه عند حده وتقوين نبرة صوتك وشخصيتك وتتماسكين وتتشجعين خير ياطير يمد يده عليك وانتي تنتفضين وترتخين وتخافين !!
الاطفال ويمد يده عليهم نقول اغلب البيوت للاسف يهاوشون ويمدون يدينهم على اطفالهم وقت الغضب طبعا بدون شدة لكن الزوجه لا ومليون لا
مدري احس في خلل بينكم وانتي جزء لا يتجزء من هذا الخلل
لان هروبك مو حل ابداً وبينكم اطفال بالدين والقانون والمجتمع راح يكون له صله فيهم الى اخر نفس في عمره هروبك بهم ربما يقلب الامور ضدك ويمكن يركبونك قضية خطف وبلاوي ويمكن حتى يستخدم تقاريرك النفسيه في هذا الشي وتطلعين انتي الخسرانه
اللي ابي افهمك اياه اجلسي فكري في حياتك ونفسك وراجعي نفسك مليون مره قبل اتخاذ أي قرار
وحطي في بالك الهروب ابداً مو حل طالما الخلل الاساسي موجود فيك بشخصيتك وطريقة تفكيرك وتعاملك مع المواقف والامور تكونين انهزاميه وضعيفه وخوافه اجل كيف تبين تديرين حياة ثانيه لحالك ؟
فكري ثم فكري مليون مره واجعلي الحل الاساسي يبدأ منك غيري وطوري من تفكيرك وشخصيتك راح تلاقين الحياه اسهل بكثير
وانا شخصياً من ايام طفولتي شفت عوائل للاسف متربيين اولادهم على مد اليد وحتى مرات يطرد زوجته لكن هي عقلها كبيييير ما تطلع وتعرف تتصرف مو كل شي تاخذه عاطفي مشاعري ووالله اننا ماندري انها بمشاكل الا يوم نشوف وجهها فيه ازرق مضروبه وننقهر عليها
مدري وش اقول اكثر لكن اسأل الله ان يشرح صدرك ويسهل امرك ويرشدك للصواب واسأل الله ان يهدي بالكم ويصلح احوالكم