ابنتي والحفظ

السلام عليكم ورحمة الله وبركاته
اختي انا اول شي ما بغيت انصحج لاني بعد اعاني من نفس مشكلتج
بس حبيت اخبرج بالي سويته
عندي اربع عيال اكبرهم 11سنه واصغرهم سنتين و11شهر يعني تقريبا 3 سنة
المهم الحين طرقة الي نفعت ويا الاكبر ما تييب نتيجة ويا اصغرهم
فللاثنين الكبارية.. اولا فهمهتهم ليش الاغاني حرااام لا نها صوت الشيطان
عقب رغبت فيهم انهم يحبون الحفظ عن طريق ثوابه والاجر العظيم عليه
وجبتلهم اشرطة فيها قراءة حلوة وهادية...ومحاضرات وحتى اناشيد للتشجيع ...وعطيتهم حرية انهم يقدرون ياخذون اي من اشرطتي ...وجدامهم انا لازمت على الحفظ والاستماع في كل الاوقات في مرتلي ...
ثم خيرتهم انهم اذا يبون اسجلهم في مدرسة دينية ..فرضوا طبعا من غير ظغط مني بس بشرط انه عقب ما يتراجع لانه المجاهدين ما يتراجعون في الميدان ..شبهة الحفظ بالميدان علشان يعرفون انه في ايامنا هذة كم هو صعب مع كل المغريات انهم يعزمون النية ويستمرون عليها...

والحين الاكبر من نفسة سجل عمرة في حلقة حفظ في مدرسته ..يعني يقوم يصلي ويروح للمدرسة علشان حلقة الحفظ الساعة 6ونص..عقب تبدا المرسة عادي ويرجع منها الساعة 2ونص..وعقب يروح للدينية هو وولدي الثاني الساعة 3وربع او عقب صلاة العصر ..ويرجعون بعد صلاة المغرب...وعقبها يذكرون دروسهم!!!
الثاني شوي صعب عليه التركيز بس الحمد لله سريع الحفظ لو ركز عدل ...
والحين الحمد لله تسجلو في منتدانا الحلو للتسميع والمراجعة ...قاعدين يراجعون جزء عم ..ماشاء اللله حافظين بس ويا اغلاط ..

ثم البنت الثالثة ..تمت تشوفهم واخيرا سجلتها في منتدانا للحفظ والتسميع ..
ومن اول ما سجلتهم يتمون كل يوم ييون يراجعون اختباراتهم ...

واخيرا وليس اخرا...
اصغرهم اول شي تميت افكر شلون احبب له الحفظ والقران خاصة ..
اولا تميت اسمعه اياه وياي وفهمته انه لازم يسكت ويسمع القران لما حد يقراه ...
و الحمد لله لقيت بعد لعبة فلاشية فيها معظم السور الصغيرة ..والحروف وغيرها من الادعية ...
فنزلتها له على الكمبيوتر لانه يحب يلعب عليه دوم ..وفهمت اخوانه الكبارية انه جدامه يحفظون بصوت عالي علشان يتعود على اجواء الحفظ..
والحين ماشاء الله عليه حفظ سورة الكوثر وبعض ايات من سورة الناس والفاتحة وحتى ايتين من سورة البقرة !!!!!!!!!والادعية والاذكار ...
اسفة اختي على التطويل بس انتي ما كتبتي عمر بنتج فخبرتج عن كل عيالي عشان يمكن بنتج في عمر حد من عيالي ...فتستفيدين من تجاربي ....اختي اذا فدتج في شي ممكن تدعيلي وعيالي اننا نتم الحفظ وما نتراجع من النص والاهم ما ننسى الي حفظناه ...
واي شي غيرة انا حاضرة
وبالتوفيق ان شاء الله

جزاك الله كل خير يالغاليه عمر بنتي 8 سنوات وبصراحه ماشالله عليك ان شاء الله بتلاقين الأجر والمثوبه من الله والله يوفقكم في تتمت الحفظ ويجعلكم من حفظة كتابه ورافعين راية الدين في كل مكان واياك والمسلمين اجمعين ان شاء الله راح اطبق اللي تسوين مع اولادك وراح اخبرك اذا حصل فرصه وش صار معي

بس حبيبتي وشلون اسجل بناتي معكم في حلقات التحفيظ

السلام و عليكم و رحمته الله و بركاته

اختي في نفس الصفحة اعلاها يوجد موضوع (( الناشئون على طاعة الله ))
فقط سجليها هناك ...

جزاك الله الف خير سجلتهم والحمد لله