ابني المريض وانا وزوجي القاسي

هل هناك امل ان تبتسم الحياة لي ول ابني المريض
متزوجة من ١٢ سنة وعندي ولد عمره ١١ سنة
بلغت من عمري ٣٠ سنة وما ابالغ اذا قلت اني ماشفت يوم حلو بحياتي
في قلبي كلام لو الف منتدى مايكفيه
بتقولون دراما ومسلسل لكن هذا واقع مؤلم عايشته بكل تفاصيله للان دون اي مبالغة او مزايدة او تأليف
لعلي اسمع ردود شافية منكم
في بيت اهلي
زوجة اب مجرمة و اب قاسي ومطيع لها واخوة مثل طباع امهم وام مطلقة وبعدها توفت
ابي كان قاسي معي بشكل غير طبيعي وحنون مع ابناء المجرمة اكرهه حد الموت وان مات مارح احزن عليه
وبطبعه ذليل يحب الفلوس ويبيع امه عشانها وياما ذل نفسه لزوجي عشان فلوس وياما زوجي ذله واهانه بين الرجال
معاناتي معهم وصلت لدرجة اني كنت رح ابدأ اخذ حبوب نفسية من كثر ضربهم واهانتهم وتحقيرهم لي
اتى النصيب وانا عمري ١٨ سنة من رجل يكبرني ب ٨ اعوام
مشكلته انه متزوج وعنده اطفال صغار ومتخانق مع زوجته وعلى وشك الطلاق وامه تبغى تزوجه مرة ثانية عشان تكيد الاولى
القرار بالاصل مو لي
القرار للمجرمة لي وافقت على الفور عشان تكمل تدمير حياتي
تم زواجنا بسرعة واخذني لبيت اهله
من جحيم ل جحيم اخر
لمنزل اهله الكبير
حماتي المزاجية وابنتها الدلوعة المتكبرة والاب وزوجي
خدامة لهم طول اليوم كرف وشغل وتنظيف وطبخ
يوم مبتسمة وتضحك وتسولف معي بالساعات وتحن علي ويوم تكون خلاص معصبة ونفسيتها بالارض
بعد فترة شهر تأكدت ان هذا الزواج هدفه فقط اشباع الرغبة الجنسية من زوجي واني خدامة ببلاش عند حماتي
لا شهر عسل ولا معاملة كويسة ولا اهتمام ولا حنان
بس ضرب وصراخ ويبغى ياخذ لي يبيه مني ويقطني ويجبلي اكل وفلوس كأني بقرة مو زوجة
مغرور بشخصيته وقاسي جدا بعض الاحيان ومزاجي ولسانه وسخ وسليط
بعد ثلاث شهور من الزواج حملت وعينكم تشوفوه
عاملني طول هذي الفترة ب لئم وحقد وكره وقرف لدرجة كان يضربني كفوف على وجهي يبيني اسقط
مايبغى مني اولاد بس يبغاني متعة له كأني جارية مو زوجة عنده
وانا بالشهر الثالث رجعت له ضرتي وراحت البيت الثاني ومن هنا بدأ مسلسل الهجران وعدم العدل لي مستمر للحين
ولدت وهو بعيد عني مسافر وما اعتنى فيني الا امه و اخواته البنات
ماشاف الولد الا بعد ١٥ يوم
لي يشوف تعامله مع الولد ذاك الوقت مايشوفه الحين
كان يترك اشغاله وزوجته ويجي يقعد قدامه بالساعات يوم كان عمره شهور
بس كل سنة كانت تتغير معاملته
مرت الايام والسنين على نفس الحال
ب اختصار
زوجي واهله كلهم اغنياء وعايشين بخير الا انا وابني
رامينا عند حماتي وعمي ويعطيني بالشهر ١٠٠٠ ريال مصروف لي و ل ابني وابوي يتسلط علي كل شهر عشان ياخذهم مني واذا تهربت يقعد يقولي انا بغضب عليكي وانتي عاقة
حالتنا معدومة
كلهم يسافرون اوروبا وتركيا الا انا وابني مانسافر الا اذا سافرت حماتي نروح معاها وتطلع السفرة من عيوني
مايحن على ابني الا واحد من اعمامه كثير يحن عليه
حتى وين مايودي اولاده يجي ياخذ ابني معاهم
كلمته اكثر من مرة ومرات اتخانق معاه يجي يعصب ويقط كلام وبعض الاحيان يضربني بالعقال والسلك
يقولي انه متزوجني شفقة وانه زواجنا غلط ب غلط وانه مايطيق الولد ويقرف منه رغم ان ابني ابيض وجميل بس عشانه مريض بفقر الدم الحاد وكل اسبوع لازم نوديه المشفى وتجي اوقات وجه اصفر او يدوخ ويرجع وانتو بكرامة وحالته حالة واغلب وقته غايب عن المدرسة وذاك يجن مو عشان شي
بس عشان رسوم المدرسة يقول اخسره فلوس على الفاضي
وثاني يوم يعتذر عن الكلام ويتودد للولد ويحلف انه مارح يخليه الا احسن واحد بالمستقبل ويوعدني انه رح يلف المشافي بس كله كلام
هذا الموال كل فترة لازم يسويه
ومرة قبل سنتين كان برد كثير وكنا طالعين نتمشى ويوم جينا السيارة الولد انخفض ضغطه ورجع داخل السيارة وسيارته افخم نوع
اووه سبني سب ولعن بالولد وماخلى كلمة وكان بيسوي حادث حتى يوم وصلنا سحب الولد سحب من السيارة على الارض قدام الناس بالشارع والناس مستغربة وثاني يوم جا ضربه بسلك الشاحن عشان هذا الموضوع وابني على طول وجهه شاحب ومايتحمل ضربة
والله العظيم هذا لي صار
اقوله حرام عليك كل السيارات ماتسوى جزمة ابنك
يقولي كفر السيارة هذي في راسك انتي وابنك واهلك كلهم
ولا بعمره حسسه بمعنى الابوة والحنان مافي الا يهزئه ويمصخره ويصرخ بوجهه ويضارب فيه اذا كنا في البيت على عكس معاملته ل اولاد ضرتي كل انواع الرفاهية عندهم واي شي حديث يشتريه لهم على طول
وبعد فترة كان مسافر جدة راح اتصل علي يبكي عشان مرض ابنه ويعتذر عشان هذا الموضوع
جنني ب اسلوبه
ومرة زوجته تقط علي كلام عند الناس وانا يوم اتواجه معاها تعتذر
ضرتي بطبيعتها استفزازية وعنيدة معاه ومع اهله ودائمة مشاكل مع امه واخواته وامه مازوجته الا عشان تكسر راسها ومتقلبة المزاج معي
يوم مافي احسن منها تخليني ازورها بالبيت وكله تاخذ ابني عندها البيت يقعد مع اخوانه ويوم ماطايقتنا وتحرض علينا وتسب ابني وتعامله مثل زوجات الاب
وعدا عن كل هذا ابوي وحرمته واولاده متسلطين علي
محسبيني ملكة وجالسة على عرشي
ابنها عليه قرض و اقساط سيارة يقعد يجاملني ويتقرب مني عشان زوجي يعطيه فلوس وانا مانسيت ايامه الكلب كان يضربني الين يقطعني بتحريض من امه وكل يوم سب واهانات الحقير الله لا يرده
رغم اني اعطيهم واحيانا اذل نفسي ل زوجي وحماتي
الانهم يتمو يكرهوني وينافخو علي وعلى ابني ويعايروني بمرض ابني ويتجاهلوني لدرجة انهم ماعزموني على عرس بنتهم ويوم سألتهم ليه
يضحكون ويتعذرون
وجا قبل فترة ست شهور اكتشف زوجي الموضوع
قالي
يمين بالله اذا اكتشفت مرة ثانية انك عطيتيهم ريال
غير اطلقك بالثلاثة وارميكي لهم واخذ الولد تربيه زوجتي مع اخوانه
ومن يومها حرمني امسك ريال ومصروفي بيد حماتي انا وابني ك اني طفلة
ويومها كلهم سفلو وسبو فيني واتهموني ب قلة الامانة واخت زوجي قالتلي انتي ذليلة والقط مايحب الا لي يخنقه
كل اخواته البنات قالولوه يومها يطلقني وياخذ الولد لحضنهم بس هو عطاني فرصة اخيرة عشان ابنه
وحماتي من يومها كتمت نفسي لدرجة انها خلتني اسوي حظر لهم على الواتس وما ازورهم حتى بالعيد
هذا لي قلته ولا شي من معاناتي الدائمة
انا ودي اتطلق منه بس وين اروح ارجع عند ابوي وزوجته وارجع للعذاب
وهو يقولي انه مايطلق الا اذا انا طلبت عشان يكون ضميره مرتاح على قوله
وكله يقولي اذا تطلقتي لاتحلمي تشوفي الولد طول حياتك
اخاف على ابني اذا تطلقت لانه قاسي ومزاجي وزوجته نفس الشي والله بيجننوه وهو مو ناقص
انا عادي عندي ماني مهتمة لانه نفسيتي متدمرة من صغري بس ابني هو العائق مع ابوه خايفة عليه بالمستقبل