ابني بيكمل 4 سنوات وما بيتجاوب معاي في الحمام ومتأخر في النطق

السلام عليكم

بنات انا عندي ولد عقب أشهر يكمل 4 سنوات
عنده تأخر في النطق للحين ما يتكلم الا بس كلمات
هو كان طبيعي جداً فجأة انتكست حالته
وبصراحة ما ادري هل بسبب الظروف اللي مرينا فيها لان مرينا بوضع ما يعلم فيه الا الله سبحانه وتعالى
أو بسبب وراثة.. لان صار بعايلتهم حالات ناس تأخروا في النطق بس بعدين تكلموا في مثل عمره او اكبر
وحاليا وضعهم جدا طبيعي
بس اللي مضايقني تصرفات الناس وحتى الاطفال تجاهه وايد يستغلون انه ما يتكلم وخاصة ان ما في وياه اطفال بعمره
وماحد يطلعه خاصة اننا في غربة ما عندي سيارة وابوه طول اليوم لاهي بشغله ما يرضى يطلع به
وايد يستضعفونه
وجارتنا كل تقط نغزات تقول انها تعلم اولادها ويفهمون تبي تقول انها صاحبة انجاز واني ما اعلم ولدي
رغم اني اشوف وضعهم كل فالته اولادها بدرج البناية في الحر بس عشان ما يلعبون وما يعفسون داخل شقتهم
ومن يرجع زوجها الظهر من الشغل طول اليوم هايم بهم
وطبيعي جهال يطلعون بهم يصيرون طبيعيين مو عليها هي اللي ما تدري عنهم
وانا ولدي بس وياي وابوه ما يدري عنه ولا عندي سيارة اطلع به عشان يشوف الدنيا
مشكلة ولدي ما يهتم الا لكلمات معينة يكررها وايد وباقي الكلام ما يهتم له
كان عنده ماي في اذونه والحمدلله يبس عقب بس للحين ما يكون جمل ولما اعلمه كلمات مو كل شي يقوله يركز بس عاللي يعجبه


في الفترة الحالية ادربه عالحمام وهو من عمره سنة ونص ابيه "اكرمكم الله" يتبول في الحمام بس ما يعرف رغم اني اخذت له نونية
وعقبها قطعة بلاستيك عالمرحاض بس ما يعرف يتبول ومن ايام شلت عنه الحفاظة وتناجس لي المكان وصارت لي قصة لان النجاسة توزعت
وحاولت وياه يسويها في الحمام عقب وراويته البول والبراز "اكرمكم الله" اللي بالسروال وكل اقول له انت الحين كبير لازم ما تسويها في الحفاظة الايام الجاية بتتبول في الحمام
وبعد ما فهم قصدي ومحتارة مو عارفة شنو اسوي مع العلم انه دخل الروضة ويرجعون الحفاظة مشحونة حدها وحنا عاطينهم رسوم لتبديلها بدلوها بس مرتين
وابيه لازم يتعلم عالحمام وما شايفة عنده قابلية اتم وياه مدة طويلة بالحمام واقول له يسويها واقول له "اسسس" كلمة الكبار في السن لما كانوا يعلمون
اطفالهم يتبولون "أكرمكم الله" بس يتم قاعد عالمرحاض احيانا يضحك ع كملة اسس واحيانا يمل ويعصب ومحاولاتي ما شايفة لها نتيجة
ياليت تعطوني أفكار تساعدني في الموضوع خاصة اذا في وحدة مارة بتجربة مشابهة.. الله يجازيكم خير ان شاء الله