ابني كان طيف توحد لما كان صغير

الحمدالله ابني الان رجال رايح للثانوي وطبيعي جدا وماشالله ملتزم واخلاقه ممتازة ولله الحمد واجتماعي والكل يحبه
طيب انا ليش اكتب عنه هنا .. علشان الام الحءرة الخاءفة من مستقبل ابنها تستفيد من قصة ابني ان شاء الله.. لان انا وقت مشكلة ابني كنت ابحث عن قصص واقعيه تعطيني امل.. عشت فترة من الزمن .. وانا والله الدنيا بعيوني مالها طعم واعتقدت انه ابني فعلا متوحد
ابني بعمر سنتين ولغاية سنتين ونص ماكان يتكلم ابدا يقول كلمات معدوده فقط وتم تشخيصه من قبل طبيبه امريكيه على انه طيف توحد
كنا نناديه مايلتفلت لدرجة حسبناه مايسمع.. كان يحب الروتين مررره ويتعلق بلعب معينه وخلاص طول اليوم بس يلعب فيها .. لما كبر شوي صار يتعلق بشخصيه مرتونيه مثلا او بشخصيه من شخصيات ديزني وخلاص يعلق عليها ويصير طول يومه مايفكر الا في هالشخصيه ولا يمكن يلعب باي شيء الا فيها.. ماكان عنده اصدقاء وخجول جدا وفي نفس الوقت مايستوعب الخطر يركض بعيد عني في الاماكن العامه .. اذا يبغا شيء يجي يسحب ايدي وياشر باصبعي عل الشيء .. كان محيط الراس عنده اكبر من الطبيعي.. ماكان يعرف يلعب بالالعاب له طريقه معينه وروتينيه جدا باللعب واصلا مايفرح بالالعاب ولا يعرفلها.. كنت لما اضمه مايحب ويتضايق مره.. ماكان يقول ماما ابدا من لما كان بيبي لغاية سنه ونصف ما يقول ماما ابدا حتى لو يبكي .. مايطلع حروف ابدا بس اصوات غريبه.. بعد ما بدانا جلسات النطق على عمر سنه ونصف .. وقريب السنتين صار يقول مممممم وبعدها قال ماما وصار دايم يناديني ماما من بعد هذاك اليوم.. كان ذكي جدا في اشياء معينه فقط .. مثلا بعمر السنتين كان حافظ كل الحروف والارقام ويميز حروف العله ياشر عليها اذا سالتيه بس كان صامت مره.. قالتلي الاخصاءيه وش فايدته انه متقدم في هالنواحي وذكي فيه .. وفي الامور الفطريه مايعرف شيء :(
المهم انا عملتله جلسات نطق من سنه ونصف لغاية ٣ سنوات .. بدا يقول كلمات محدوده بعمر سنتين ونصف وفجاه صار يقول جمل كامله عل ى عمر ٣ سنوات وزياده
كنت ايضا في نفس الفترة اعمله جلسات علاج وظيفي لانه كان يتحسس من الاصوات العاليه وايضا مايركز في اي شيء.. التواصل البصري عنده كان طبيعي جدا بس اول مابدا يتكلم جاتله فترة يردد الكلام كانه ببغاء
المهم انا اهتميت فيه ودخلته حضانات من عمر سنه ونصف وعملتله جدول زيارات وطلعات لغرض يختلط بالاطفال ويتعلم .. فعلا كان يقلد ويتعلم ولله الحمد وحتى الحمام علم نفسه بنفسه لان كان يشوف الاطفال في الحضانه يروحون بيبي على قولت الامريكان وصار يعمل زيهم.. تعلم عالحمام بعمر سنتين وشهر
كنت احس فيه بعض الصفات الغريبه اللي استمرت معه فترة ولكنها تلاشت مع الزمن
بالتالي .. طيف التوحد باذن الله يروح مع الوقت ويكبر ويصير شخص طبيعي باذن الله.. اهم شيء اهتمي بطفلك او طفلتك .. انا كنت كل ليله كل ليله لازم اقراله قصه .. اوديه للمكتبه كثير اخليه يختار الكتب واجلس انا وياه في الكوفي اقراله القصه ونتصفح الكتاب سوى واحاول فيه يتفاعل معي قد مااقدر .. كنت اعطيه اوميقا ٣ كل يوم واهتم باكل صحي له ولاخته.. اتكلم معه طول اليوم .. واحنا في البيت واحنا في السياره واحنا باماكن عامه .. وكان مايتجاوب معي ابدا ولايرد بس استمريت استمريت استمريت.. كنت اجيبله الالعاب واجلس معه على الارض ساعات بس علشان اعلمه كيف يلعب.. استمريت بالعمل معه بشكل مكثف ومستمر الين دخل اولى ابتداءي ..
الحمدلله استمري في العمل مع طفلك وباذن الله تشوفين نتاءج مبهره
اللي استفادت من قصتي تدعي لبنتي الصغيرة بالشفاء العاجل