من جد بس الغلط من ولدك بعض الحريم ماتمشي الا بالعين الحمراء خليه يجي قوي عليها ويطنشها مو تشوفه يجري وراها تشوف نفسها عليه والله بنات يرفعون الظغط ويهددها بالثانيه ان ماتعدله وغرفتها لو تطلع مع الباب اغراظها ماتخلي الشغاله تلمسها صح الملابس عادي اما حتى غرفتها مو منظفتها  وهو يخليها تطبخ مو كل شي منك انتي لا انتي مو مسؤله عن اكلهم سوي اكلك انتي وزوجك وهي خليها تطبخ ولا تجلس

انا مع الاخت احس غلطتو بالاختيار والله يوفق ولدك

بس صراحه مرره قله أدب انه بس تغسل ملابسها ولاتمسك غرفته

وفوقها هي الي زعلانه وترا على فكره مو كل بنات هالجيل كذا والامها عشان ترقع لبنتها قالت البنات تغيرو هذا بدل ماتعقلها

أوك تغيرو ما أقولك 24 ساعه طبخ و شغل في البيت بس برضو يطبخو لو مره بالاسبوع أو مرتين ويمسكو بيتهم

بس جد شكلها صغيره ومو قد المسؤوليه دام ولدك عمره صغير أكيد هيا أقل من العشرين

وفاهمه الزواج غلط ...

ياويلكن من الله يلي تنصحن بطلاق. ترى الدنيا دين بكرة تلاقن من ينصح عليكن بطلاق ويقول نفس الكلام الي قلتن لها


ونتي يانوف. ولدك رجاااال هو يحل موضوعه لاتدخلين بينهم ولا لك شغل
وان بعض الظن اثم ويش لك وبجوالها. عندها رجال بشوارب يتفاهم معها
لكن اقول لك ترى العيب بولدك الي ماخلى شي ماقاله لك.
اطلعي من الموضوع ولا لك شغل فيهم هو يحل ويربط.
بتقعدين طول العمر تزوجين وطلقين.

ولدك بزر خليه يواجه الحياه عشان يكسب خبرة لاتتدخلين بشي الا ان كان بتدعين له .

اللي يقولون خليهم يسكنون لحالهم ..
المشكلة مو في السكن لحالها .. لأنها تبي تطلع في بيت وفي نفس الوقت تقول ما أبي أقعد معه لحالنا !!!!!!
يعني وشو يجون أهله عنده ؟ خلاص أجل يقعد معهم في البيت وبلاش خساير .. وإلا تبي امها تقعد عندها مثلا ؟!!


من ردك .. فهمت ان البنت مدللة وتبي تأخذ بدون ما تعطي وهالشيء ما يصير ...
أتوقع الحزم مهم معها ..
للأسف فيه امهات ما يعرفن مصلحة بناتهن وما ينصحنهن ..

مسألة انها حاطة رقم سري وتتكلم طول الليل ممكن فعلا مع أخواتها .. وكونها ما تبيه يشوف المحادثات عادي أعتبره خصوصية وحقها ..
لكن الغلط انها ما تحترمه وما تقوم بشغلها وترفع صوتها وتقول ما لك علي أمر !! وفوق كذا تبي طلعات ووناسة ؟!!!!
لازم تفهم ان الدنيا عطاء وأخذ .. وماعاد هي في بيت أهلها مدللة تأخذ وبس !
الرجال ما تزوج عشان يعطي بدون أخذ ..

أتوقع يبي لولدك يتعامل معها بحزم وما يعطي بدون أخذ .. وإذا زعلت وبغت تروح لأهلها ما يوديها بنفسه .. يقول خلي أهلك يأخذونك وإذا طلعتي ماراح ترجعين إلا بشروط ..
ولو سوتها وراحت يخليها عندهم لين ينطحن الحب اللي في راسها ولا يكلمها وإذا كلمته يقول ما بيننا كلام إلا إذا وافقت على شروطي ..
وترجعين من نفسك مثل ما طلعتي من نفسك ..
لازم تفهم إن الحياة الزوجية مو لعبة كل يوم أزعل وأطلب رضاوة على لا شيء .. وإن دلال أهلها لها ما يتحمل هو نتايجة .


والبنات اللي يقولون لا تتدخلين .. ماعليش ما عندهم سالفة ..
الحرمة ما قصرت توددت للبنت وتعاملها بالطيب وحتى تنظف غرفتها وتقوم بدور زوجة ولدها .. وقالت ما تبي غير تعطيه ريق حلو
لكن البنت مو قد المسؤولية ومدللة .. والولد متأذي منها ويشكي لامه ويقول ما يتحمل .. وش رأيكم ؟!
تتنصل من دورها كأم وتترك ولدها بدون نصيحة وهو في مشكلة ؟!
ليش ما قلتوا ان ام البنت بعدالمفروض ما تتدخل في حياة بنتها ؟!

يابنات كلنا تزوجنا وشفنا الويل من أهل أزواجنا ومع ذلك الحق حق .. الام لها حق تتدخل في الوقت المناسب وبعدل وحق هذا ولدها
وتبي تشوفه سعيد مثل كل ام .. مو تتركه تعيس ويتبهذل قدام عيونها عشان تقولون عنها انها منصفة !!!
خلنا نكون واقعيين .. سعادة ولدها عندها أهم ..مو سعادة بنت الناس على حساب ولدها !



نصيحة لو إضطر يطلقها وصار هالأمر وإن شاء الله البنت تتسنع وتعقل وما يحتاج يمر بهالمرة مرة ثانية ..
لكن لو صار .. لا تختارون له إلا بنت سنعة مو قدامكم بس .. وعلى فكرة يبين السنعة تظاهر من السنعة صدق .
وأيضا لازم يفهم ولدك إن الحنان والطيبة لحالها ما تمشي مع كل الناس فيه ناس ما تتعدل إلا بالحزم وتعتبر الطيبة واللين ضعف .