ابن اخوي وضميري

عندي ولد اخو عمره ١١ سنة
المهم يابنات الحلال انا احب احارش هذا الولد بحكم اني اشوفه اغلب الوقت لا زرت بيت اهلي
ابوه ضابط واغلب اوقاته برا البيت مداوم وامه قاعدة اخلاقها ضيقة وزادت ضيقة بعد ماحملت بالبطن الثاني
والام طبعها بالتربية قاسي جدا ومشددة يعني ب اي غلط من الولد ما تشوفوها الا شالت الخيزران او السلك وبدت فيه
وانا كل ما اشوفه اثقل دم عليه واضاربه كل ماشفته بس يشهد ربي علي انه مزح بس وابن اخوي واحبه
بس مرات امزح معاه مزح ثقيل انا واختي وهو له تصرفات غريبة شوي وحساس
لحد ماهو نفر مني وصار يهرب كل ماشافني
مثلا يكون قاعد ياكل ويشوفني يترك الاكل ويمشي
وين ماشافني على طول قام 😔😔
قبل فترة شهر جيت بماسكه بالليل وهرب مني وانا الاحقه ياصغر عقلي الين دخل جنب طاولة بالمطبخ وقعد يطالعني من وراها لانه قصير شوي والطاولة عالية
والمهم انا جيت بخوفه بس ومادريت الا اني وقعت صحون وانكسرت وهو من الخرعة داس على القزاز بقوة وانشقت رجله
اقسم بالله نظراته وهو الدم نازل منه وقاعد يأن ويتوجع ويطالعني مافارقتني من يومها
اول ماشفته بس تجمدت بمكاني وهو يطالعني بس والدم قاعد ينزل من رجوله بسرعة
وانا جيت زودتها هربت لغرفة ثانية كاني بنت صغيرة بدال ما اعالجه وقعدت اطالعه من فوق وهو يمشي والدم نازل من رجوله ولسا يطلع نفس الصوت لحد مانزلت له الخدامة ووقفت النزيف ورجعت امه من العرس واتصلو على ابوه جا مثل المجنون ترك دوامه وجا خذوه مستوصف وهو ماقال شي
وفكروه انه كان يلعب ويشاغب بالمطبخ وكسر الصحون وامه عاقبته يومها ولا رحمته ياقساوة قلبها
وانا مشيت يومها لبيتي ونسيت السالفة
المهم قبل اسبوع رجع هالولد يطاردني اول ما احط راسي على المخدة ترتسم صورته قدامي وهو يتوجع ويطالعني
عجزت انسى موقادرة كل يوم صورته ترتسم قدامي
وضميري يأنبني على ذاك اليوم
تقربت منه بالهدايا والالعاب ونفس الشي ماتغير شي بس يطالعني بنظرات احسه يلومني على لي سويته فيه وكل ما اشوفه وهو يمشي ويعرج على رجله احس قلبي يحترق من جوا والسبب انا

فكرت اقول ل امه وابوه واعتذر عشان اريح ضميري بس خايفة من ردة فعلهم وخصوصا ابوه يموت فيه وزعل كثير يوم شافه بالحالة هذي وكله بسببي انا