مرحبا بنات.. بصراحه مب عارفه شو اقول احس اني مخنوقه وايد
وسالفتي معقده ..اللي تقدر اتشور عليه لا تبخل علي بنصايحها واللي ماعندي لا تبخل علي بدعوتها..
ابوي اتبرا مني ما كلمني من سنتين ولا عتبت بيتنا من سنتين.. اشتقت لامي واختي ولغرفتي ولبيتنا اللي تربيت وكبرت فيه .. طلعت منه وما رديت لليوم
بنات ابوي وامي تموا متزوجين تقريبا عشرين سنه والله ما رزقهم اطفال.. وبعد رحلات علاج ما لها اخر يييت انا .. واختي يت عقب 4 سنين يعني نحن بس بنتين فالبيت.. وكل حد حاط في باله انه نحن مدلعات اخر دلع وطلباتنا اوامر ..والحقيقه العكس ابويه انسان جدا جاف وبخيل وماله علاقات بالناس وكل اهلنا وجيرانا متضارب معاهم ومخاصمنهم
ابوي بما انه ماعنده اولاد كان يحب عيال اخوه وااااااايد وكانو تقريبا 7 شباب..
وكان دايما يقول انه بيزوجني لعبال عمي وكبرت على هالكلمه .. بس نحن علاقتنا مقطوووعه مع عيال عمي يعني مانسير بيتهم ولا نختلط في بناتهم ولاشي
ونادرا ما نلتقي فالاعياد .. ومن خلصت الثنويه انخطبت وااااااااااااايد وابوي كان كله يرفض بحجة اني مخطوبه لولد عمي .. منو فيهم ولمتى وليش ماااادري يعني هو ماخذا راي في الموضوع حدد مصير حياتي ع كيفه.. خطبني ولد خالتي ورفضه وخطبني ولد جيرانا ورفضه وخطبني اخو ربيعتي وما قال لي رد عليهم اونه انا رفضته بس ما فتح لي الموضوع خير شر .. وخطبني بعد اخو ربيعتي وطرش امي تتصل في امه وتهزبهم وامي وحده شخصيتها ضعيفه تخاف من ابوي مالها راي فاتصلت في ام الولد وهزأتهم وبنددت..
ولما شاف ابوي اني خلاص قريب بتخرج من الجامعه واني وااااايد انخطب وابوي يرفض اتخيلو راح بيت عمي وقال له ترا البنت تنخطب وايد وانا ما ابا ازوجها الا لاولادك.. عمي بعمره ما فتح موضوع الخطبه لابوي ابوي هو حاشر الدنيا عليهم وقاط نفسه عليهم.. اولاده كلهم قالوو لااااء نحن ما نفكر فالزواج الا واحد كان بعده يدرس قال اوكي انا بتزوجها.. والله حسيت عمري سلعه معروضه واللي يبا يختار.. وخطبني رسمي وحاولت اقنع اهلي بس حسيت خلاص ماشي فايده يا اتزوج ولد عمي ولا الكل بيتبرا مني وبيعتبروني بنت عاقه .. اتقبلت الموضوع وحاولت اني اكلمه عسب افهم شخصيته .. ويمكن اغير رايي فيه .. واوفق واتزوجه.. وكلمته كان تفكيره غير عني انسان شخصيته غير وتفكيره صغييييييييييير وتوه يدرس يعني يباله لين يعرس تقريبا 5 او 6 سنواااااااااات.. ومال بنات وينشر صوره بالنت وفي كل مكااااان ..وفوق كل ها استوت مشاكل بيني وبين بنات عمي اللي هم خواته كانو يقولون كلام مب زين في حقي.. قمت وواجهت ابوي ورفضته .. وقطعت علاقتي فيه نهائي.. ابويه اتغير علي قام ما يكلمني خير شر ومع هالشي قلت لازم بيتقبل الامر الواقع ..
عقب الكلام بفتره اتقدم لي واحد.. كان ولد جيران بيت عمي الثاني.. والكل كان يشهد انه انسان ولد حلال وملتزم وانسان مب مال مشاكل.. وانا سالت عنه وعيال عمي الثاني يمدحووونه ووافقت عليه .. وابوي رفضه كالعاده بحجه انه مش من مستوانا وامه هنديه وابوه متوفي .. الحين بالله عليكم هاي اعذار؟؟
كلهم قالوا لي اتمسكي في موقفج وما عليج من ابوج مسيره بيرضا .. ويوم تقدم لي الريال ابوي هزأه وطرده ومع هالشي اتقدم لي مره ثانيه فحسيته متمسك فيني
فتمسكت فيه انا يعني اتخيلو ينطرد وينهان ويرجع يكلم ابوي مره ثانيه؟
ابوي ياني وقال اكيد تعرفينه وتكلمينه دامكم مصرين على بعض واهلنا وخصوصا بيت عمي ما صدقووو كل حد طلع رمسه وكلام خايس عني وعن الريال
انا اصريت ع الرال لاني طفرت من تصرفات ابوي .. وقام يسير لاي حد ويخبره السالفه وانتشرت السالفه بكل مكان ومع البهارات طبعا اني اكيد كنت اعرفه واكلمه وطلعت معاه ووصلوها لين اني حامل اتخيلو؟؟
والله صديقاتي يتصلون فيني ويقولون لي صدق انتي جي وجي
كنت اموت قهر ..
ع العموم قال لي خلاص اتزوجيه لانج انفضحتي والكل درا بموضوعج وانا متبري منج لا تعرفيني ولا اطبين بيتي.. كلهم قالوا لي ما عليج منه هذا ابوج ومستحيل يتخلى عنج الحين هو مقهور لانج ما اتزوجتي ولد اخوه وتزوجتي واحد هو مب راضي عنه بس مع الوقت بيستسلم مهما كان انتي بنته الوحيده
رحت بيت خالتي وهناك كملت تجهيزات عرسي وعرست والحمدالله .. وريلي الله يشهد انه انسان ما في مثله ومرتاحه معاه ومدلعني وما مقصر علي بشي .. والحمدالله الله رزقني في ولد .. وخلاص الكل قام يقوله خلاص البنت تزوجت وعندها ولد والسالفه صار لها سنتين .. بس هو مافي فااااايده اللي ييب طاري اسمي جدامه يطرده ويعصب ويزاعج عليه.. يقولهم هالبنت تحدتني وما سمعت كلامي وتزوجت واحد ماعنده اصل وخلت ولد عمها ومن هالكلام.. وامي كلمت كذا واحد عسب يرمسه ويقنعه مااااااشي فايده .. بنات شو اسوي والله اشتقت لبيتنا ولامايه ولاختي .. ومرات اطفر من اهل ريلي ومرات ريلي يكون مب موجود مااااعندي مكان اسير له ..
اورنامين سي @aornamyn_sy
عضوة جديدة
يلزم عليك تسجيل الدخول أولًا لكتابة تعليق.
co0o0o0o0l
•
الله يحنن قلبه عليك أدعي ربك كثير وروحي له حتى لومتأكدة انه بيطردك وحبي راسه واعتذري
عليك بالدعاء ياأختي والإكثار من الاستغفار يعني تستغفرين بالآلاف ويكون عندك أمل كبير بالله ان الله يفرجها عليك وبتشوفين الفرق
وادعيلي
وادعيلي
خذي ولدك وروحي يمكن قلبه يحن
ومهما طردك روحي لانه اول شي ابوك وثاني شي صله الرحم
و احتسبي الروحه له عشان تصير في ميزان حسناتك
يمكن ربي يحنن قلبه يوم يشوف ولدك او يشوفك
ولا تقطعين الامل وادعي ربي قبل تروحين له
والله يحنن قلبه يارب ويصلحه ويهديه يا كريم
ومهما طردك روحي لانه اول شي ابوك وثاني شي صله الرحم
و احتسبي الروحه له عشان تصير في ميزان حسناتك
يمكن ربي يحنن قلبه يوم يشوف ولدك او يشوفك
ولا تقطعين الامل وادعي ربي قبل تروحين له
والله يحنن قلبه يارب ويصلحه ويهديه يا كريم
الله يعينك بس ماكلمتيه حاولي تكلميه تيلفون
وروحي له اعتذري وتاسفي مع انك ماسويتي غلط
بس عشان يرضى عليك
والله حاسه فيك يشبه الوالد الله يهديهم ويجنن قلوبهم
ولاتنسي الدعاء له
وروحي له اعتذري وتاسفي مع انك ماسويتي غلط
بس عشان يرضى عليك
والله حاسه فيك يشبه الوالد الله يهديهم ويجنن قلوبهم
ولاتنسي الدعاء له
الصفحة الأخيرة