ابوي رافع قضيه على اخوي بالاختلاس واخوي مظلوم (واحنا في نار من القهر)

السلام عليكم
الشهر عليكم مبارك
انا ماادري وين المكان المناسب للموضوع
انتوا حطوه بمكانه
انا جايه لكم قلت يمكن القى عندكم الحل
القصه ان ابوي عنده عيال من زوجة سابقة وامي الثانيه وزوجته ماتت من زمان وعيالها كبار وربي رازقهم بس مافي بركه بفلوسهم ولا بعيالهم ودايم محتاجين مع العلم ان اقل واحد راتبه 10,000 ريال
السالفه ان عمتي الله يرحمها ماتت وابوي ورث تقريبا مليون وابوي بيته اجار وعندي اخوي شقيقي الكبير طيب والله وخلوق وخدوم ومجتهد وعصامي قام ابوي وكله على الفلوس لان ابوي مايدبر شئ فشرى اخوي بيت لاهلي والباقي صلح البيت لان يبي له تعديلات
فقام ابوي راح المحكمه وكتب البيت لامي قال اخاف عليكم من عيالي اذا مت بيطلعونكم من البيت وانتي عندك صغار وحده عمرها 16 والثانيه 10 والثالث 15
غير احنا الكبار بس المهم الصغار
لان ابوي عارف عياله حسودين على الخير اللي عندهم لو يدرون ان ابوي عطانا 5 ريال ينهبلون
المهم الحمد لله ارتاحوا اهلي من الاجار وابوي ارتاح وانبسط وصرنا نروح نعتمر ونسافر وابوي صحته زانت ولله الحمد لانه كان تعبان
مع العلم ان عيال ابوي مايجون ابدا الا اذا كان وراهم مشكله او يبون شئ من ابوي
وابوي يخاف منهم ماعنده شخصيه عندهم
وبعد ماكملنا سنه بهالبيت قاموا يكثرون من الزيارات ويكلمون ابوي لين جا يوم كنت رايحه ازور اهلي الا ابوي وولده قاعدين ينزلون اغراضه كلها ماترك شئ ابد
وراح عند واحد من عياله غير اللي خذه
وجلس شهر ونحاول نتصل على جواله اخذوه منه وقفلوه نتصل على البيت يصرفونا ويقولون موب فيه وماندري متى يرجع وصاروا يتوقحون بالكلام
المهم رحت له عند ولده وقلت له يبه استعيذ من الشيطان وتعال لبيتك قال لا امك ضحكت علي هي وولدها (قصده اخوي الكبير اللي موكله) وشرى لها البيت بفلوسي وصرقني وبالبنك ماعاد عندي ولا ريال(مع العلم عقب شرى البيت والتصليحات ماعاد بقى شئ ابد حتى السفرات وكل شئ من فلوس اخوي) المهم قلت له يبه وش هالكلام الناس شاهده عليك واقاربك انك انت اللي كاتب البيت باسمها عشان اخواني وانت عارف عيالك وشرهم
المهم رفض يرجع ولما طلبت منه اختي الصغيره والثانيه فلوس عشان طلباتهم عطاهم 100 ريال تخيلوا؟؟؟ وكنا مقبلين على دراسه وتعرفون لبس واغراض الدراسه..
المهم
بعد فتره اتصل ابوي وقال تراني رافع قضيه على اخوي الكبير انه مختلس وانه شاري البيت وانا ماادري وفلوسي بالبنك كلها صرقها وشرى له سياره(والسياره انا عارفه وقتها اخوي له 7 سنوات سيارته قديمه وتروع ويجمع الريال على الريال عشان اخواني وامي وابوي يونسهم بعمره او سفره وبعدين شرى السياره بعد ماكمل البيت سنه يعني بعد ماخلصت فلوس ابوي)
وراح شكاه عند الامير سلمان عشان معروف ان الامير سلمان يدافع عن حقوق الوالدين
بس اللي انا خايفه منه وامي واخواني ان الامير يفكر ان ابوي على حق
على فكره ابوي مايقدر يسوي هذا كله هالكلام كله والمحاكم والشكاوي من تسليط عياله
امي راحت تزوره ولما دخلنا البيت اتصلوا على اخوي الوسط قالوا له لو امك معك لاتدخل البيت ابد ولا تجي
ولما طفش منه ولده صار لما يطلع ابوي يقفلون الباب وينامون ويخبون عنه علاجاته مع ان عنده الضغط والقلب والسكر(بس حسبي الله فيهم جعلهم يلقونها في عيالهم)
لم ابوي تعب من عنده راح لواحد ثاني من عياله ونفس الحال شايلين جواله عنه ومايعطونا نكلمه حتى مبارك الشهر ماكلمته لين الحين
وابوي مايقدر يقول لهم شئ ابد
وامس اتصل زوجي على ابوي ولقاه قال له ابي اجمعك مع اخوي هذا اللي شاكيه وتتفاهمون بلا محاكم قاموا اليوم جو عيال ابوي كانهم شياطين قبل المغرب وقالوا لزوجي مالك دخل وهددوه بالسلاح
وراحوا لبنات اخوات ابوي عشانهم قالوا بنشهد على خالنا انه قايل هالكلام انه هو اللي كاتب البيت باسم امي وقالوا لهم مالكم دخل
والحين يقول زوجي ان ابوي يقول ان عياله متوعدين اخوي يذبحونه
......................
هذي سالفتنا الحين لين يومكم هذا
واللي طالبته منكم اللي يعرف احد عند الامير سلمان معرفه قويه يقول له على سالفتنا
واللي مايعرف ماابي غير الدعاء تكفون ادعوا لنا ربي يفكنا شرهم تكفون
والله حالتنا حاله حتى راحة رمضان وطعمه مو عارفين نتهنا بها والله تعب
تكفون ادعوا لنا ان ربي يعتقنا من شرهم واذاهم ويهدي ابوي ويرده لنا
وهم حسبي الله عليهم
ابي رايكم بهالموضوع