ابوي كبر بعيوني وحبيته اكثر من قبل

السلام عليكم
اول حاجة الموقف مابقوله من باب الرياء ولا انه عشان ابوي عشان ما احد يتفلسف علي او يتكلم كلام مو بمحله
ابوي اول حاجة انسان شديد وجاف المشاعر لي يشوفه ظاهريا يقول هذا انسان ظالم وهذا انسان قاسي ماعنده قلب بس الله العالم انه قلبه ابيض مثل الثلج ومهما قسى يرجع يحن والناس لها الظاهر فقط
الموقف يرويه عمي لنا
قبل ست شهور عامل على كفالة ابوي سواق تريلا تعطلت التريلا حقته بالليل فنزل لبقها بالرمل على بين مايجي احد يشيله
وبهالوقت كان في واحد جاي مع عياله وحرمته وشكله نام بالطريق ف فقد السيطرة على السيارة وصدم بصندوق التريلا صدمة قوية
حرمته ماتت على طول وبقى الرجال حالته متدهورة وسبحان الله عياله ماصابهم شي الحمدلله
واتصلو ب ابوي وكان معاه عمي واتصلو بالدوريات والاسعاف
عمي قالي اول مانزل ابوي من سيارته راح ل سيارة الرجال وشافه مليان دم ويتنفس وحرمته ميتة قدامه والعيال ماخذهم الشرطي موقفهم بعيد واكبرهم عمره ١٤ سنة والاسعاف تأخر لا جاه مع الدفاع المدني
يعني موقف بشع اسأل الله انه ما احد يذوقه
الرجال مات بعد يومين بالعناية المشددة والحق كان عليه لانه نام بالطريق
يقولنا عمي ابوي ماكان على حالته كم يوم وهو حزين وبيوم بالليل كان يكلم عمي بعد ما انتهت اجراءات المرور وفجأة غص ونزلت دموعه غصب عنه
قال ل عمي والله ما كسر قلبي غير العيال فقط ومشى
وبثاني يوم شافه عمي يبكي بقوة تقول كأنه احد ميت له
وهي اول مرة يشوفونه يبكي فيها
او انه الحق عليه
وتم على هالحالة حوالي اسبوع
ابوي الله يجزاه الخير راح لبيت اهل الرجال لي توفى وتعهد انه يتكفل بكل مصاريف العيال الين يدخلو الجامعات
بعد هالموقف لي شفته منه حبيته كثير وكبر بعيوني بعد ماكنت احس ببعض من الكراهية تجاهه بحكم انه شديد وجاف وانه تزوج على امي اكثر من مرة