ابوي ياجعلني فداك

السلام عليكم ورحمة الله وبركاته
قبل ما ادخل في الموضوع ودي اعطيكم نبذه عن الوالد ابوي عمره في حدود السبعين انسان ملتزم يعني قبل الاذان يروح المسجد انسان طيب جدا وحنون جدا له احترامه بين الناس وكلمته مسموعه ويحب عياله حب غير طبيعي قضى عمره كله وهو يتعب ويكد علشانا لحد مازوجنا كلنا ولله الحمد يمكن تقولون كل الاباء كذا صح بس ابوي غير ابي انسان طيب جدا مايحب يتكلم في احد ولا يمكن يتدخل في خصوصيات احد حتى لو اقرب الناس له
ابو من طول عمره ماحرمنا من شي عمره مافكر في نفسه كان يحرم نفسه من ابسط الامور وفي نفس الوقت يوفر لنا كل شي عسى الله يطول في عمره 000
المهم قبل خمس شهور ابوي بدا يحس بالم في يدينه راح لدكتور قاله عنك احتكاك وعطاه ادويه بس ماجابت نتيجه طبعا ابوي عند ه السكر والضغط والسكر عنده مره سيئ يعني احيانا يرتفع الى ثلاثميه او اربعميه واحيانا ينزل الى ثمانين او سبعين المهم ان الالم كل ماله يزيد وخلال هالفتره راح الى اكثر من ست مستشفيات مابين خاص وحكومي وقبل شهر تقريبا راح لمستشفى الهلال الاخضرعن اخصائي اعصاب وسواله اشعه وتحاليل وقاله عندك روماتيزم ولخبطة السكر لها دور في الموضوع قلنا الحمدلله اخيرا عرفنا المشكله وكتبله الدكتور على ادويه وابر وجلسات تدليك لمدة شهر وخلص الشهر ومازال الالم مستمر صح خف شوي لكن مازال مستمر يعني احيانا مايقدر ينام من الام
واحيانا مايقدر ينام على جنبه بس على ظهره والله بعض المرات اذا سالته وشلونك اليوم يقولي الحمد لله طيب ولما اسال امي بيني وبينها تقول البارح ما نام طول الليل هو من النوع اللي مستحيل يشتكي لاحد والادويه اللي يعطونه الدكاتره كلها مسكنات تهدي الالم يوم اويومين بعدين مايصير لها اي مفعول00
حتى قبل يومين اخذ تحليله واشعته لدكتور قاله انت مافيك روماتيزم والله احترنا ماندري وش نسوي
انا ادري ان كل شي بيد الله وهو قادر على كل شي000
انا مابي منكم غير دعوه بظهر الغيب ان ربي يشفي ابوي ويمتعه بالصحه والعافيه
اللهم اشفي والدي يارب العالمبن00
اللهم البسه ثوب الصحه والعافيه00
اللهم ان ابي مسه الضر وانت ارحم الراحمين00