ابوي يغار من خطيبي!

مساء الخير بنات
تتذكرون موضوعي يوم اسالكم شلبس بيشوفوني حريم وجذي؟ انا ماشرحت شي لكم بس الحين باشرح عشان تساعدوني
انخطبت عن حب دام سنه ونص .. وكنت خايفه اهلي مايوافقون لان الولد عربي اصل واحنا فرس هوله مو عرب لكننا سنه "اهلنا مايزوجونا الا من بعض بحكم اننا غرب"
بس الحمدلله وافقو لان درو اننا نحب بعض ونبي بعض وهم الولد زين واهله ماشالله طيبين حييل واساسا هم جيران جدتي وابوه كان صديق عمي واخوه الكبير كان صديق عمي الصغير .. يعني بينهم معرفه قويه

المهم بعطيكم نبذه عني وعن حياتي عشان تفهمون الوضع اكثر
انا عمري 19 سنه .. عشت طفوله مأساوية جدا .. عشت في عنف اسري بين ام همها نفسها وبس وابو يبي يمشي كلمته حتى لو كانت غلط
امي وللاسف كانت تخون ابوي ومعليش على هلكلام بس عشان اكون واضحه .. كانت تضربني بسبب وبدون سبب واساسا الاسباب تافهه مثلا كبيت الاكل بلغلط ...الخ . والضرب ماينوصف ابدا .. رفس وسحب من الشعر وووو
عمري ماسمعت منها كلمه حلوه وعمرها ماضمتني ولا اي شي ماذكر منها غير الضرب
ابوي كان يضربني احيانا بس امانة مو كثرها ... اتذكر اذا نزل معدلي كان يضربني بخيزران الين ماتنكسر ويروح يجيب غيرها :)
فطبيعي انا ما احب والديني لانهم اذوني كثيييير
بس ما ابين لهم هالشي
المهم صارت مشاكل بينهم وانكشفت سوالف امي فتطلقو قبل سنه والحين ما اعرف عنها ولا شي ولا اعرف مكانها بس سمعت انها تزوجت شخص من ديره ثانيه وسافرت
الحين ابوي مااادري انا مو فاهمته ولا فاهمه شلمقصد من اسلوبه وحركاته معاي
يابنات انا صح ما احبه بس مااقلل من احترامه ابد ولا اسوي شي
بنات ابوي صعب صعب وقاعد يضغط علي مادري شفيه هل هو كان يتهاوش مع امي ويوم راحت مالقى غيري يتهاوش معاه او شنو
يحب النكد ويحب يزعل على ولا شي !! يحسسني كاني زوجته مو بنته ويقعد كل ساعه يزعل على ولا شي ويبيني اراضيه! وعادي يقعد ايام مايكلمني عشان ولا شي بس يبيني اراضيه
اكثر من مره يطردني من البيت لانه يدري ماعندي احد اروحله وامي مابغتني يوم انفصلو واهلها خوالي وخالاتي مايبوني اصلا محد سئل عني طول هلسنه
احسه يستمتع لما يشوفني مذلوله له مع انه قبل لا ينفصلون ماكان يتهاوش معاي كثر الحين
شلون تطرد بنت من البيت ابي افهم ؟! وين تبيها تروح؟ ؟ كنت اسكت وماسوي شي وولا اطلع لان ماعندي احد اروح له
اخر مره تقريبا قبل شهرين قام من نفسه ووزع كم شغله من اغراضي على ناس بس كذا بدون اي سبب وبدون مقدمات! يوم عرفت مارحت كلمته رحت غرفتي ابجي طول الوقت على وضعي وماقمت اكل وتميت على هلحال يومين! ماسئل عني ولا اهتم ولا حتى اعتذر على هالحركه
بعدين ياتني مقابله عشان وظيفه زينه فرحت استأذنه عشان اطلع واروح لها .. قالي مافيه! مع انه يبيني اشتغل .. بس كان يبي يقهرني مادري ليش! وبعدها قعد يقول كلام ويخربط وانا مو فاهمه شسالفه لاني ماسويت شي!!!! قعد يقول انتي مثل امج وانتي وانتي نفس طبعها ... الخ وطردني قالي روحي لها وقالي ما ابيج فهمي مااا ابيج! بنات حزت بخاطري هلكلمه وانفجرت بالبجي جدامه ومشيت
ماني عارفه هو انجن ولا مرض نفسيا ولا شنو!
اول امس نفس الشي تهاوش معاي على ولا شي
كنت طالعه مع صديقاتي رحت التراويح وبعدها سيرنا على وحده من صديقاتي توها والده ماشالله
اتصل فيني قالي روحي الصيدليه ابي زيت كبد الحوت
ماكان عندي فلوس فمارحت .. واساسا مو ضرورية هلحبوب بس يبي يجربها
يوم رجعت سالني قلتله ماكان عندي فلوس
قعد يقط خيط وخيط ويتحلطم
يقولي انتي مثل امج وباجر بتاذين زوجج وانتي تكلمين شباب وطريجج غلط وووو وكلام بما معناه انه يقولي انتي ق... ! وكل هلكلام مو صحيح
بعدين قال انا ماكنت ابي الحبوب انا بس اختبرج
اذا انا ابوج ماسويتي المستحيل عشاني ولا ضحيتي ويبتيلي الحبوب بكره لما زوجج يمرض بتقولين مايبت دوى ماعندي فلوس؟؟ "كان كانه يبي يسحب مني كلام يبي يشوف احب خطيبي او لا" قلتله لا باشتري له بادبر نفسي لانه مريض
انقهر حييييل والله ويبين عليه مادري ليش
بعدين قالي انتي جافه وماتاخذين ولا تعطين وولا عندج كلام حلو "لاني صرت ما اسولف معاه ولا اقعد معاه بسبب مشاكله ولانه مايدانيني ولا انا ما احبه بس احترمه"
قالي حتى مع فلان "خطيبي" بتكونين هلون
هني انا بكيت وقلت لا ماراح اكون معاه جذي لانه يحبني
انقهر حيل وقال "بس روحي حبيه احسن مني" وراح
والحين الين اليوم مايكلمني مادري ليش
اكتشفت انه يغاار من خطيبي ويغار اكثر وينقهر كل ما يحس اني احبه
ماني فاهمته بنات تعبت اذا هو يبيني احبه ليش يطفرني ويبيني اطلع من البيت؟؟؟ دام يغار ليش يكرهني بعيشتي وليش يعاملني هلمعامله؟؟
شلون يبيني احبه اساسا وهو عذبني بحياتي ومازال؟؟
تعبت يابنات ابي اتزوج باسرغ وقت واطلع من هلبيت ابي ارتاح
خطيبي يعرف كل هلاشياء لان لاحظها اساسا .. ويعرف ماضي امي لكن بعد شاريني ويبيني لان يعرفني زين ويبي نتزوج باسرع وقت عشان يطلعني من الي انا فيه
تعبت مو عارفه شلون اتعامل مع ابوي احس نفذ صبري بنفجر بوجهه قريب واذا طردني مره ثانيه ماراح اتردد وبطلع من البيت!