ابي آخذ موقف

السلام عليكم
اعاني من مشكلة منغصة حياتي زوجي رافض اني اتعلم قيادة السيارة..
وكمان رافض اني اركب السيارة مع أي امرأة تقود حتى لو كانت اختي
سألته عن السبب يقول كذا
طيب أنا أحتاج السيارة لمشاوير ضرورية.
والمشكلة الأكبر ان زوجي يكره شي اسمه توصيل.
اول سنة زواج كان يخليني اركب مع سواق خاص هو يثق فيه ويقرب له.
يوصلني كل مشاويري.
السواق هذا ماعليه كلام. لكن أنا اتضايق ابي زوجي هو اللي يوصلني.
حتى بيت اهلي يخلي السواق يوديني ويرجعني مع انه بيت اهلي يسكنون في نفس المدينة اللي ساكنة فيها مع زوجي وتبعد عنا ١٠ دقايق بالسيارة .
والله اني اخجل لما احد يشوفني او يسألني مع من جاية.
كنت بالبداية مااتناقش مع زوجي مدري ليه. بس اطلب منه يوصلني يقول ما اقدر تعبان ما اقدر توي جالس من النوم
كنت استغرب واقول يمكن مايعرف يسوق ولهذا السبب يتهرب يوصلني.. واطلع له ٧٠ عذر
لكن مع الأيام شفته يوصل خواته اذا اضطروا.
صحيح هالشي نااادر لكن مرة اخته اتأخرت ومشى عنها باص المدرسة وطلبته يوصلها ووصلها.
هنا استغربت وقلت له يافلان تعرف تسوق؟
ضحك وقال ايه.
قلت له تدل الشوارع والمسافات البعيدة؟
قال ايه. لكن انا ماصدقت الا لما ركبت معاه ووصلنا اخته مدرستها وكانت بمنطقة ثانية.
قلت له اجل ليش ماتوصلني.
ومن بعدها صرت اطالبه يوصلني
ع الاقل بيت أهلي مرة بالاسبوع
لكن ما التزم.
صرت ازعل عليه واقول له خليني اتعلم اسوق او اخلي اخواتي يوصلوني كمان رافض.
مرة من المرات رحت بيت اهلي امشي وبعدها اتأخر الوقت وابي ارجع دقيت عليه قال مو فاضي.
وهو كان جالس مع اصحابه.
زعلت عليه لكن مامر علي الا الساعة ٣ الفجر.
والآن تكرر معي الموضوع يرفض يوصلني والسواق اللي اعتمد عليه احيانآ كثيرة يكون مشغول
والله يابنات اكتب مشكلتي وانا مغبونة.
احسه مايهتم فيني.
ولا يقدر حاجتي.
كيف اخذ موقف من تصرفه اللا مسؤول مليت من النقاش معاه.
مرة لميت ملابسي وقلت له بروح بيت اهلي.
ولا برجع الا لما تشوف حل للموضوع.
بعدها طيب خاطري ووصلني كذا مشوار.
لكن كلها مرتين و عادت ريما لعادتها القديمة.
قال بيجيب سواق خاص لنا.
لكن متى؟ الله اعلم
وربي يعلم هل بصبر الى ذيك السنة اللي بيجي فيها السواق والا لا.
حاليآ انا ببيت اهلي.
وكتبت له من ساعتين يمرني يرجعني البيت لكن مارد علي.
شوروا علي شسوي.
لاتقولوا اذا جا اجلسي ببيت اهلك لا تطلعين معاه. وربي فكرت فيها لكن مابي المشكلة تكبر وبعدين ارجع غصب عني.
ابي حللل