اللهم يا رب يرزقك بالزوج الصالح الذي يعينك على امر دينك و دنياك

واللهي واللهي واللهي إني أنا كنت زيك و أكتر
ومريت بظروف الله وحده عالم فيها
وعارفه كل شي حاسه فيه لآني أنا حسيته وجربته
تخيلي يا أختي تقريبا كل صاحباتي في الجامعه أتعرف عليهم زيي زيهم بنات
ما يجي أخر الترم إلا كل وحده ومنهم مخطوبه وفرحها محدد حتى من قبل الجامعه أيام الثانوي كان يصير معايا دا الشئ
و أنا أصلا ماني وحده إجتماعيه يعني بالكتير عندي صاحبه صاحبتين وكل ما أتعرف على صاحبه تتجوز ويصير الموضوع أصعب

أنا طبيعي زي كل البنات نفسي أتزوج ويصير عندي بيت خصوصا إنوا حياتي في بيت أهلى مو مريحه ليا
دايما مشاكل أنا و أمي و أحيانا توصل لدرجه الضرب
لا طلعات لادخلات لايجوني صاحبات لا أروح لصاحبات
و المكان الوحيد إلي أروح له كان بيت ستي الله يرحمها
وحتى لمن أروح كانوا يخلوني أروح عشان أنتبه على أخواني الصغار
يعني المنفذ الوحيد ليا هوا الجامعه وفي الأخيرحتى الجامعه صرت أكرها
تخيلي وحده بنت زيي زيها هيا تنخطب وتتجوز و أنا قاعده
والأصعب من كدا كانت صاحبتي تجي وتقعد تحكيني عن خطيبها وخرجاتها معاه والأشياء إلي يجبلها هيا و كيف إنوا يحبها ويدلعها ويسمع كلامها
حتى بعد ماتجوزت برضوا تقعد تحكيني فين راحوا وفين جو وشهر العسل إيش سوا فيه ووو ....الخ إلين مايتوجع قلبي وتصير دمعتي في عيني
وبعدين حملت ماشاء الله وكيف كان يدلعها في وحامها ومو مقصر عليها شئ
وبعدها ماشاء الله ولدت وصارت أم و عندها بيت وزوج ومبسوطه ماشاء الله
والله لاني حاسدتها ولاقاعدتلها بس سبحان الله النفس تشتهي وتحن لدي الحاجات
يعني ليش هيا و أنا لاء (اللهم لا إعتراض على قضائك)



و أنا الله وحده كان يعلم بحالي وكيف كنت أحس و ماكنت أقدر أبين لها أو لغيرها إحساسي
واللهي ما أتذكر عدد المرات إلي دخلت فيها غرفتي وقعدت أبكي بعد الجامعه و أبكي بحرقه نفسيييييييييييي ياناس نفسيييييييي
إلى الأن كل ما أتذكر ما أقدر ما أبكي

ما أقدر أقلك إني مافكرت أنحرف لآني فكرت إني أنحرف
وقلت يعني إيه أكلم واحد ويكلمني إلين ماربي يحلها و أتزوج (وفكرت لو إني حذره ما أخليه يعرف عني شئ وبكدا مايقدر يإذيني)>>>> يعني مزبطه الموضوع أعوذ بالله من الشيطان الرجيم
أقلها يكون عندي أحد أفضفض له ويسمعني واحد بكل بسااااااااطه أكون أنا مهمه عنده ويحسسني بقيمتي و أهميتي


لكن أرجع و أتعوذ من إبليس و أقول في نفسي لا ياشيخه دا مو حل عمر الحرام ربي مايبارك فيه وبعدين ربي يفضحني وتصير سمعتي على كل لسان
وبني وبينك أخاف قلبي يتعلق فيه و أنا أعرف نفسي حماره إذا حبيت حبيت من قلبي وأخاف أروح أتهور وأسوي معاه شئ أندم عليه
ف ليش لأعرض نفسي وقلبي لوجع القلب والفضيحه وأولا و أخيرا أعرض نفسي لغضب الله في الدنيا والأخره

واللهي يا أختي ما نجاني غير الدعاء والصلاه كنت أصلي و أدعي من قلبي
وكل ماحسيت نفسي راح أضعف للشيطان كنت أقوم و أصلي ركعتين و أقرأ قرأن و أدعي من قلبي وأكلم ربناو أشكيله كدا بلغتي العاميه و أدعيه بلغتي وبكلامي العادي
وبعدها سبحان الله كنت أحس براحه غريبه و أحس إنوا ربنا معايا وربنا شايف وسامع كل شئ وحاسس فيا
وفيه إحساس قوي كمان كان يجيني إحساس إنوا فيه حاجه أفضل بتستناني و إنوا ربنا ومخبيلي الرجل الصالح بس في الوقت المناسب دا الرجل راح يجي ( وعسى أن تكرهوا شيئا وهو خيرا لكم )
و أحيانا كنت أقول في نفسي
زوجي دحين قاااعد يشتغل ويجمع فلوس عشان بعد مانتزوج نساااااااااافر ونروح ونجي ويبسطني ويسويلي كل الحاجات إلي نفسي فيها >>> هههههههه هبله


ما أقدر أقولك إنوا الموضوع راح يصير سهل عليكي مع الوقت و إنك راح تقدري تنسي (نقول إن شاء الله تكوني أقوى مني وتقدري تنسي دا الموضوع )
بالعكس أنا كان كل ماله يصعب عليا لدرجه صرت أقعد في غرفتي ما أخرج غير للحمام وطووووووووال الوقت نوووم ماأقوم غير للصلاه
حتى الأكل ما كنت أكل أقعد بالأيام ما أكل غير شي خفيف وجهي صار مليان حبوب وجسمي نحيف وعدوم يعني شكلي دمااااااااااااااااااااااااار محد راح يرضى يطل في وجهي
ونفسي أنسدت عن الخرجه حتى بيت ستي ماصرت أروح له
وكرهت الجامعه و حتى مستوايا الدراسي تدهور وصرت بس أرسب تخلي أربعه سنين في الجامعه ولسا ما تخرجت وباقيلي سنتين من كتر ما أرسب


والحمد الله ربني عوض صبري خير ورزقني بالزوج إلي إن شاء الله نقول إنه صالح يارب
وعقبالك وعقبال كل البنات والعايزين إن شاء الله


أنا حكيتك حكايتي على الرغم إني ما أحب أتذكر دا الموضوع وكمان محد يحب ينشر غسيله قدام الناس بس عشان أوريكي إنوا إنتي منتي لحالك وفيه كتييير زيك
وترى الأنحراف مو حل و إنو في ناس عيشتهم أصعب من عيشتك وما إنحرفوا لآنهم عارفين إنو الأنحراف مو حل و إنهم إذا إنحرفوا راح يعقدوا الأمور أكتر


والله يا أختي إنك أكلمك زي ما أكلم وحده من أخواتي
ترى مالك غير رب العالمين صلي و إدعي و إستغفري وخلي عشمك في الله كبير ترى ا ربنا راح يعوضك عن كل شئ بإذن الله لآنوا ربنا عادل (إسم من أسمائه العادل)وترى ربنا مايرضيه الظلم



إعذروني على الأطاله وكمان على ردائه التعبير >>>>> ماتعرف تعبر


و أتمنى لك كل خير


عفوا نسيت أقولك شئ كمان أنا كنت دائما أدعي بعد كل صلاه اللهم إرزقني حنان الزوج والولد ومالا حلالا بلا عدد و قرأت القرأن للأبد وكمان كنت أدعي ربي لاتذرني فردا و أنت خير الوارثين



ورمضان كريم علينا وعليكي يارب

الله يرزقك ويرزقني مثلك الزوج الصالح اااميييييييييييييييييييييييييييييين والله انا اعيش نفس الحاله اللي انتي فيها وكثر انا مره طفشت من الحياه احس كثير بالوحده وماادري اش اسوي والله تعببببت مثلك الله يزوجنا ويرزقنا الازواج الصالحين عاجلاغير اجلا

الله يستر عليك ويرزقك الزوج الصالح

الله يرزقك ويرزقنا بالزوج الصالح
عليك بالاستغفار الاستغفار يجلب الرزق
وعليك بذكر الله يبعد عنك وساوس الشيطان
ولاتكثرين تفكير
المكتوب لك بيجيك