ابي احذركم من حرمه تدور على البيوت خصوصا شرق الرياض

السلام عليكم
ترددت في كتابة الموضوع>>>>اخاف من ردود بعض البنات وانا مومتعوده اكتب
بس قلت ضروري انبهكم خصوصا شرق الرياض
امس العصر سمعت الباب يدق وكانت الشغاله تغسل الحوش
وفتحت الباب بدون علمي>>>>مافي امل تكون حريصه
وركضت اشوف من الا قالت الشغاله جيران
لقيت وحده واقفه عند البالب
قلت:من
ودخلت علي مندفعه
تقول سيماهم في وجوههم
ماشا الله
انا جارتكم ام عبدالله بيتي ورا المسجد
سلمت على الحروب اللي جنبكم والعتبان اللي قبالكم
وقلت اجي اسلم عليكم
قلت يامرحبا تفضلي
قالت وين راعية البيت انتي بنتها
قلت لا انا راعية البيت >>>>دلاخه
قالت ماشاء الله فكرتك بنتها ماشاء الله>>>>مرجت وتمنيت ماقلتلها
قالت انا رشيديه من الشمال من رفحاء
قلت ونعم
واجلس الا تسردلي القصه
انا اختك زوجي معاه سرطان وراح مع ولدي العمره وفي الطريق صار لهم حادث
وتوفى زوجي وولدي دخل غيبوبه وانا توني طالعه من الحداد
واجار الشقه 15000ريال وقدرت ادفع 10000ريال وعطاني راعي المسجد 2000ريال
الدوسري اللي وراكم الله يجزاه خير
وقلت لصاحب الشقه سامحني في ال4000ريال>>>مدري وشلون الحسبه توني استوعب
قال والله مااسامحك
وعطتني الحربيه اللي كتبه ربي
وعطتني العتيبيه 300ريال والخاتم اللي في يدي
والعتيبيه اللي في الزاويه قالت لاتعلم يدي الشمال عن ماتنفقه يدي اليمين
وانا ابي مساعده
قلت والله ماعندي شي وودي اساعدك زوجي طالع اذا جاء ارجعيلي واعطيك
قالت مااقدر رحلتي الساعه 8 للطايف
واعطيها مبلغ بسيط
وقالت خلاص عندك قطعه خام >>>>كانها عارفه ان عندي محل اقمشه مدمنة اقمشه
وبعدين خفت تسحرني قلت لالاماعندي
قالت خساره كان ابي اعطيها جدتي
وطلعت وهي موراضيه
وهي تتكلم وانا اتذكر نفس الشريط والقصه مرت علي قبل سنتين من وحده جاتني وكانت عندي جارتي
وتعاطفنا معها وتاثرنا من قصتها
المهم جارتي نقلت وانا نقلت وصارت بيوتنا قريبه من بعض
وانا متواعده معها نجتمع في الحديقه وكنت مجهزه قهوتي قبل تجي الحرمه
وبعد ماطلعت مني الحرمه رحت للحديقه
واحكيلها على الحرمه اللي جاتني واقولها نفس قصة الحرمه اللي جاتنا قبل سنتين تتذكرينها
وتشهق هاذي جاتني قبل امس وقالت لي نفس الكلام حتى قصة الخاتم وقالت بتسافر الساعه 9
وطلعت نصابه كل يوم تمشي على جزء من الحي
وحبيت انبهكم يابنات عنها وماتتعاطفون معها وماتفتحون لها الباب
واذا قدرتي تبلغين عنها يكون افضل
ولاتعطونها اي اقمشه
واللي جاتها وقالت لها نفس القصه ودار معها نفس الحوار
ترد وتاكد على كلامي
ارجوكم ماابي اي ردود جارحه
ويكرمون اهل الرشايده منها ومن امثالها
وسلامتكم