ابي ارائكم ودي اتصالح مع سلفتي ولا ادري كيف

السلام عليكم ورحمه الله وبركاته

اتمنى الكل بصحه و سلامه و عافيه ,,
اخواتي الي لها ردود بعيده عن الموضوع او تجريح ولا لوم اتمنى انها ما ترد و تدعي
ربي يصلح الحال و توفر جهدها
بختصار انا بكتب موضوع و ادري انه من اساسه خطاء لكن ابي منكم النصح في تعديل الوضع

نبتدي الموضوع انا تزوجت و تاخرت بالحمل بعد خمس سنوات من زواجي تقريبا
حماي تزوج وماشاءلله تبارك الرحمن زوجته حملت من ليلتها ماشاءلله تبارك الرحمن

الي حصل انها ما تبيني اعرف انها حامل براحتها حريه شخصيه علمتني ام زوجي
وقالت يابنتي لا تقولين لها انك عرفتي مانبي مشاكل قلت الله يتمم عليها ويبارك وصدق سويت
اني ما ادري

صارت عزومه في بيتها وهي بالسابع كلمتني العصر وانا في الدوام قالت ترا عندي عزومه
كنت بقولك بس نسيت انا ولله على حسن نيه عذرتها وقلت ابشري وجيت وجبت عشا معي طبق
رئيسي و سلطه طول ما انا جالسه وهي مشغله التلفزيون على قناة رقيه شرعيه ما حطيت في بالي

وهي بالتاسع قالت لي انا مرا سمنت قلت لها لا ولله ما سمنتي هذا من الحمل وهي انهبلت كيف عرفتي
ومن علمك الله يكافينا شر عيونك ومن هالكلام كنا في بيت اخت زوجي
قلت محد قالي بس بطنك مبين انك حامل ولا انتي اول وحده ولا اخر وحده تحمل ربي يتمم لك

طنشتها ومرا حزت بخاطري هي عليها مواقف مو طبيعيه فكانو احيانا ام زوجي و خواته يتكلمون
فيها قدامي وانا انبسط مرا و ازيد الطين بله اتكلم فيها ربي يغفر لنا

سوت لي مواقف ولله ما يعلم فيها الى ربي

موقف انا حللت باليوم الي هي ولدت فيه و الحمدلله طلعت حامل كل اهل زوجي انبسطو جدا
متاخره وقتها حول الست سنوات بعد ما طلعت من الاربعين كنا متجمعين في بيت اهل زوجي
وام زوجي حضنتني و دمعت عينها تقول الحمدلله انو ربي بيطعمك و يطعم ولدي بعد هالعمر
هي ما كانت تدري اني حامل انا توني باول الثالث وقتها قالت وش قصدكم هذي حملت
كل هالايام ما حملت يوم انا جبت لكم ولد غارت مني وقامت تصيح انتو فرحتو لها اكثر مني
وانتو تحبونها اكثر طبعا كل هالكلام تخيل منها ولله ام زوجي حكيمه وما تفرق ابد
ردت قالت اكيد نفرح لها اكثر يا بنتي انتي حملتي من ليلتك هي كم سنه لها
قالت الله وكبر و بتحسدوني بعد

وانا بالخامس هي حملت وقالت ولله لخرب عليك و جيب على بزرك بزر الحمدلله و الشكر
تفكير سقيم

مرا كنا جالسين وقالت انا زوجي يقول كلمي اي احد و طلعي مع اي احد الى انتي
انا ما عندي سرعه بديه انصدم ولا اعرف ارد سكت ولا قلت شي
عادت هالجمله اربع مرات بالمرا الرابعه قلت لها ليش وش شايف زوجك علي خير
قالت ولله مدري حتى انا ودي اعرف اساليه و علميني

مرا جابت رقم وحده من جماعتنا و صارت تسال و تتكلم عني ولله يهديها البنت
ورتني المحادثه بالواتس وانا مرا زعلت تقول اني مقصره في بيتي من العمل لطلعات
البنات و زوجي يشكي المسكين مو حاس انه متزوج
انا هنا ما سكت و كبرت المشكله كيف تكلم احد يقرب لي من بعيد و تتكلم عن زوجي وعني
سالت زوجي انت متكلم قال ولله عمري ما شكيت ولا حسيت بالهلكلام اصلا
وكلمت ام زوجي قلت ابي حل مين موصل لها هالكلام وكيف تطلعه للناس
وكبرت السالفه مرا وتدخلو الرجال ومن يومها تقاطعنا لنا 9 شهور تقريبا

وفي مواقف كثير ولله تسال عن مصروفي و تسال وش تلبسين في اليالي الرومانسيه
لو اسالها كيف اكل المطعم الفلاني تنهبل و اذكري الله

انا تكلمت عن مواقفها انا فعلا ما ابتدي ولا احب المشاكل لكن وقت ما تصير مشكله ما اسكت عن حقي

الحاصل يا اخواتي من تقاطعنا حتى لو اجتمعنا صدفه بمكان ما نسلم على بعض صار بعض
الاثار السلبيه

انو ما صرنا نشوف عيالها ولا هم يشوفونا ممكن تقولون موضوع تافه لكن عيال عم
ما يعرفون بعض ولله صعبه

قبل اسبوع زوجي يشكي لي يقول تصدقين ما شفت ولد اخوي الى مره وحده وبنته ما شفتها ابد
الاخوان ما تقاطعو لكن تدرون البزران ما يجون الى مع امهم وحنا ما نجتمع بيوم انا وهي

زوجي كل ما رحنا ل اهله يروح ل اخوه لانه ساكن معهم و ياخذ ولدي يقوله سلم
على عمك يقول ودي مره يجيب ولده مهما كان عمه بس ما حصل ما اقدح بالرجال
بس يمكن ما جات على باله لانوالحمدلله زوجي و اخوه علاقتهم ما تاثرت من سوالف الحريم

ودي بالصلح لكن تكون العلاقه رسميه القطاعه شينه
و الرسول نهى عن الهجر اكثر من ثلاث ليالي لكن اقسم بالله هي انسانه لا تطاق
ابي منكم طريقه نقدر نرجع العلاقات و يعيشون اطفالنا مع عيال عمهم بطريقه سلميه

اعتذر على الاطاله لكن حاولت اختصر قد ما اقدر