اضافه الى الكلام اللي قالوه الاخوات وما قصرو الملابس شيليها من الدولاب زي ما هيه بعلاقاتها وجمعي كل 5 او10 علاقات مع بعض من فوق بشطرطون عشان ما تتطايح عليكي ودخليها زيما هيه كل مجموعه في كيس كبير ممكن اكياس زبايل كبيره عشان اذا وصلتي البيت الجديد ان شاء الله تعلقي في الدواليب على طول لان اكيد ما بيكون فيه علاقات كمان


وبالتوفيق ان شاء الله

الى امل وحب الله يجزاك الجنه بهذه المعلومات لاني لي كم يوم ادور موضوع يساعدني وما حصلت لاني ناويه انقل بعد شهرين وشايله هم النقل

أختي لاهية بعيالها....(على فكرة عجبني اسمك:22:)
شكراً على الدعوة و جميعا ان شاء الله

بالذات لو بتنقلي أول مرة.....بتكوني شايلة هم و مو عارفة من وين تبدئي

الله ييسرلك و تنتقلي بالسلامة
و أي استفسارات............أنا حاضرة :39:

المفروض تبدئي من الان عشان لا يزنقك الوقت
واهم شي مو بس تلمي العفش تلميه بطريقة لمن تروحي على البيت الجديد تساعدك على سرعة التنظيم
1- جيبي كراتين وابدئي بالتحف لمي كل تحف البيت ولفيها بجرايد عشان لا تتكسر وحطيها في كرتون وخلاص قفليه بلصق واكتبي عليه بقلم عريض تحف
2-القدور اللي ما تستعمليها بكرتون وحطي معاها الطاوات اللي ما تستعمليها خلي وحدة بس برا وقفليه واكتبي فوقه القدور
3-اللحف كلها وديها مغسلة عشان يغسلها ويلفها بكيس وحطيها مع العفش بس بقي لحاف واحد برة اللي بتستعمليه
4-الكاسات كل كاسة تتلف بورق جرايد لوحدها وعلى كرتون واكتبي عليه كاسات وقفليه لا تبقي غير كم كاسة بس
5-اشرطة الفيديو والمسجل كلها بكرتون مع بعض وحطي معاهم السيديها واكتبي
6-الخداديات كمان كلها لميها بكيس زبالة واربطيها ولصقي على الكيس لصقة واكتبي على الشطرطون المحتوى حتى ل كان باين الكتابة تسهل عليك كل شي لمن تنقلي
7-الكتب كلها في كرتون بس كرتون الكتب يبغاله تلصيق تمام داير ما دار عشان لا ينقطع مع ثقل الكتب واكتبي :35:خخخخ
8-العاب ودباديب عيالك كلللللللها في كراتين واكتبي :35:<<<<ادري انو لو قلت اكتبي ثاني بتشوتيني
9-الاجهزة الكهربائية لمي كل جاز مع اغراضه ولفيه بالنايلو حق لف الاطعمة عشان يمسكلك الاشياء يثبتها ما تتكسر وبعدين من فوقه لفيه بجرايد وعلى كرتون و اكتبي:35:
10-الفناجيل حقت القهوة لفها يزهق فلفيها من دحين حطي بين كل فنجال والتاني ورق جرايد ولفيهم مزبوط وحطيهم في كرتون ومعاهم فناجيل الشاهي ملفوفين تمام والملاعق والسكاكين الزايدة كلها اجمعيها سوا ولفيها بنايلو اللف ومعاهم بنفس الكرتون
ومعاهم حطي ملاعق الشاهي والسكريات والملاحات يعني كل شي يخص الشاهي والقهوة حجمه صغير لفيه تمام بالجرايد وقفلي الكرتون وووووووووووووووووووووووواااااااااااااكتبي فناجيل وملاعق والزي منه
11-الابجورات شيلي منها اللمبات وفكي غطاها وانتبهي يجي معاه وصلة برم اللي تثبت الغطا مع الابجورة خلي الغطا على جنب والوصلة البرم رجعيها في الابجورة ابرميها عليها عشان لا تضيع بعدين اجمعي غطيات الابجورات كلها فوق بعض ولفيها بنايلو بس كثري شوية عشان تضمني ما تنعدم عليكي وحطيها في كرتون ضغير واكتبي غطيان ابجورات خلي الكرتون على قدها تمام عشان لا تندفس فوقها اشياء ولما العفش ينشال خلي الكرتون دا يجي فووق عن الباقي عشان لا تخرب
الابجورات نفسها لفيها بجرايد ورصيها جنب بعض في كرتون كبير بس لفيها بطبقة سميكة جرايد عشان لا تنكسر ولمن تلفيها لازم تلصقي لفتك بلصق عشان تضمني واعجني جرايد بيدك وحطيها في ارض الكرتون وفوقها الابجورات وفوقها طبقة تانية اعجني جرايد وغطيها وقفلي الكرتون واكتبي ابجورات خخخخخخ
12- اي عدة حقت مسامير ومفكاته وووالخ وشواكيش كلها حطيها في علبتها ولصقيها والا اذا مالها علبة زي حالاتي مرصوصة في سبتات خديها ولو عندك قدر عزايك كبير حطي في ارضه جرايد وحطيها جوته وغطيه وبس لا تقفليه عشان كل شوية حتلاقي قربوعة صغيرة سلك ماله حل تحطيها معاهم
13-الشموع عشان لا تخرب لفيها بنايلون حق الاطعمه بس كل شمعة لفيها كذا مرة عشان لا تنخدش وحطيها في كرتون صغير على قدهم تمام ولو عندك فريزر كبير دخليها الفريزر الين تجو تنقلو عشان لا تروحي تلميها بسرعة مع العجلة تتخدش او تخلطيها مع شي تاني ومع الحرارة تنعجن ويتغير شكلها
14-المجلات زي الكتب ومعاها الكتلوجات
15-الملابس كلها على الشنط ما عدا اللي حتحتاجوه هذا الشهر
16- الاحذية والصنادل كل واحد في كيس لوحده وعلى الكرتون بس حطي الثقيلة تحت والخفيفة فوق
17-الستريو حطيه في كرتون وقفلي الكرتون مزبوط واكتبي
18-الفيديو والديفيدي لو ما تستعلوة باستمرار كمان حطيهم في كرتون وافصلي بينهم بطبقة جرايد معفوسة تمام ومنكوشة عشان تعمل ماص للصدمات خخخخخخخخ:angry:
19-وكملي على هذا المنوال وشوفي لمي كل شي من دحين لا تخلي قدامك غير الاشياء الكبيرة الكنب والطاولات هذي اللي تنقل بعدين لا يحكرك الوقت وتلمي العفش بسرعة ينعدم عليكي وبالتوفيق عزيزتي