ابي اسكت سلفتي بطريقة محترمة

السلام عليكم
عندي سلفة طيبة الحمدلله ومابيني وبينها الا كل خير وعلاقتنا حلوة عندها خمس بنات وولد الله يخليهم واناعندي اربع اولاد وحامل الحمدلله
وكل ماتجي عندي تشتكي ان زوجها يبي ولد واخو لولدها وانها خايفه تحمل بالبنت السادسه وانا اهديها من طيبتي
واقول عادي كله من ربي مالنا دخل حنا بالاشياء المصيريه اللي فيها قضاء وقدر ومكتوب عند الله تجلس تقلي ايه انتم ياامهات الاولاد غير عن احساسنا حنا ياامهات البنات
فيها احراج من بناتها وعزمتها عند جارتي وكذبت قالت عندي بنتين يعني تشوف البنت عار وعيب وشي ماتفتخر فيه وشي يفشلها
مشكلتي معها بالاجتماعات وقدام السلفات والحموات كل ماشافتني عيبت فيني وغصب تحسسني بالنقص اللي هي قاعده تعيشه
كل جلسه معاها او طلعه او اجتماع تجلس تطري لي يافلانه كسرتي خاطري ماعندك بنت
وكل مااجتمعنا بشاليه اومكان تقول فلانه ماعندها بنت تساعدها ياحرام وانا ارد اقول ليه اجيب لي بنت عشان تصير خدامه؟
ان جبت بنت مثلها مثل الولد يكبرون ويبرون باهاليهم ويعزون نفسهم
وانا يشهد الله علي بهذي الايام الفضيله وربي يحاسبني ع اللي اكتبه ذا عمري مااشتكيت ولاحسيت بالنقص ابداً زي ماهي تحس وقلقانه
وحتى ماقد زوجي قال اوجاب طاري الجنس للطفل واشوفه مبسوط جداً بعياله ومدلعهم
وانا راضيه وفرحانه بيني وبين نفسي باولادي لان احنا كلنا بنات عند امي وماعندنا اولاد بالعايله
ودي اسكتها بطريقه لبقة ان اللي تحس فيه تراي مااحس فيه
يعني هي راميه عقدتها علي بس مابي اجرحها
وحتى زوجها صرت اشك انه مزعجها بالولد احسها هي اللي ذابحه عمرها عالموضوع وتحديدالجنس
وامي تقول اقري المعوذات واحذري منها واقطعي علاقتك فيها لانها تسالني تقول متى جماعك مع زوجك بعيالك وتسال عن طريقة الجماع وتسال اسئلة مااملك اجوبتها اذا صرنا لحالنا
بس اذا اجتمعنا مع اهلنا ومع حريم تجلس تعايب وتعاير بالخلفه ابي اسكتها بس مابي اخسرها
ودي اقولها كلامك مختلف اذا صرنا لحالنا وشكاويك .
وش تنصحوني لان العيد جاي وماراح افتك من لسانها ومن طاري موضوعها السقيم ؟
ع فكره هي حبوبه وطيبه وخدومه بس هذا موضوع جلستها دايم