السلام عليكم ورحمه الله وبركاته
انا عضوة جديدة حبيبتكم من خلال قراتي لمواضيعكم وردودكم تساعدون بعض وتوقفون مع بعض الله يرضى عليكم جميعا
اخواتي 000 انا عندي مشكله عمري ما كلمت فيها احد لا امي ولا صديقاتي ولا خواتي
تبون الصراحه انا إنسانه كتومه واستحي اتكلم عن مشاكلي
الناس يشوفوني عايشه بسعادة ومو ناقصني شئ تدرون ليه لأن ما احد يدري عن حياتي الزوجيه وكيف زوجي معي
لكن ولأول مرة في حياتي ابي اتكلم ابي افضفض عن مافي داخلي احس إني تعبت كثير وعانيت كثير من شئ اشيله في قلبي وما اقدر اصرح فيه لأحد
لأن ادري إذا شكيت إما لناس يحبوني اكون غثيتهم وكسرت خاطرهم او لعدو تشمت عليه
لكن تعبت من كثر ما شيل في قلبي وما احد درى عني فقلت اطرح مشكلتي بين ايديكم حتى لو ما ردتوا عليه
إسم إني فضفضت ما في قلبي
ابدا من البدايه
بدايه مثل بدايه اي بنت كانت تحلم بالزواج تزوجت وانا في الثانويه من رجل الكل يمدح فيه اخلاق ودين وولد حموله طرت من الفرحه بهذا الزوج إللي بصراحه انحسد عليه >> وشكلي إنحست عليه
عشت بفرحه غامرة في بدايه زواجي وحبيته حب جنون لدرجه ما تتخيلون حبي له فاق حبي لامي وابوي ونفسي فضلته على نفسي في كل شئ
كنت عايشه في حلم حلو حسيت إن الدنيا حلوة
بالمقابل زوجي كان إنسان غريب حسيته يختلف عني كثير
دائم حزين وسرحان وما سمعت منه كلمه حلوة تفرحني
بدأت افيق من حلمي الجميل إكتشفت إني ما اعجبت زوجي رغم إنه هو إللي إختارني بمحض إرادته دون عن بقيه البنات
عرفت إني دون مستوى الجمال إللي كان يطمح له رغم إني جمالي عادي وناس كثير معجبين في اخلاقي
لكن إيش يفيد إذا زوجي ما يشوف هذا الشئ
حسيت من خلال عشرتي معه إني مو حلوة إنقهرت وشلت في قلبي وفقدت الثقه في نفسي
كنت دائم اكشخ له واتزين لكن للاسف ما يشوف ولا شئ جميل فيني سبحان الله ربي معمي بصيرته عني
ما يشوف ولا شئ حلو فيني ولا يمدحني ابدا
تمنيت إني مثل باقي الحريم إللي ازواجهم يتغزلون فيهم يمدحون مكياجهم ملابسهم يقول لها زوجها إلبسي الفستان الفلاني 00القميص الفلاني حلو عليك 00عطرك عاجبني لكن كل هذا الكلام عمري ما سمعته ابدا
بالعكس ما اسمع غير السب والاهانه ومدح حريم ثانيات
إحساس صعب إن زوجك يمدح حرمه ثانيه غيرك وإنت ما يمدحك ولا درى عنك
إذا شاف شئ زين مني سترة وإذا شاف شئ مو زين فضحني أة من هذة الدنيا مافيها شئ يفرح
حريم اقل مني جمال واقل مني إهتمام في انفسهم وفي بيتهم وفي ازواجهم لكن ازواجهم طايرين فيهم ويحبونهم ويدلعونهم وما يقدرون عنهم
انا ويشهد عليه ربي إني ما قصرت معه بشئ بكل ما اعطاني ربي سويته له لكن ما يبين في عيونه
قاسي عليه 000 وما يغار عليه مثل باقي الحريم نفسي يحسسني إنه يحبني ويغار عليه حتى أحس إن مثل باقي الحريم إللي رجالهم يغارون عليهم انا ما اقصد الغيرة إللي فيها شك
زوجي مايشتاق لي مثل باقي الرجال إللي يشتاقون لزوجاتهم وما يقدرون يستغنون عنهم ابدا
من يوم كنت عروسه إلي يومي هذا وانا لي اكثر من 15 سنه متزوجه زوجي ينام بعض الاحيان مع اولادة او في الصاله
كان في بدايه زواجي ينام عند اهله او في الصاله ويتعذر بالمكيف او السرير يعور ظهرة لكن كثرت الاعذار وطالت السنين والوضع كما هو ينام مع اولادة ويخليني لحالي في غرفه النوم
انا بصراحه صرت ما عاد اقوله ليه تتركني بلحالي حسيت إني غير مرغوب فيها وخليته على راحته إذا يبي ينام عندي او عند عياله على كيفه ما احب اغصب عليه ما احب افرض نفسي عليه
انا إللي اعرفه إن الحرمه هي إللي تنام عند عيالها عشان كذا الازواج يتزوجون على حريمهم لكن الايه عندي معكوسه هو إللي ينام عند عياله وإذا يبي حقه الشرعي نام عندي كم ليله وبعدين رجعت ريما لعادتها القديمه
تصدقون إنه بعض الاحيان يقول لاقاربه إنه ينام عند عياله هو هذا شئ احد يفتخر فيه !
احيان كثيرة يصرح لي إنه ما يحبني ولا يكرهني وهذا شئ مو بيدة
واحيانا كثيرة احس إنه مغصوب إنه تزوجني رغم إنه هو إللي إختارني
ما احس إني متزوجه مثل باقي المتزوجات
حاسه إني خادمه له ولعياله
اتمنى من الله إنه يحبني ويحن عليه ويغار عليه ويحسسني إني زوجه
يجرحني بكلامه الجارح لي لما يقول لي إنت مافيك انوثه
يجرحني لما يحسسني إني مو حلوة رغم إني متوسطه واهتم بشكلي وكثير ناس معجبين في لبسي ومكياجي لكن الشكوى لله زوجي ما يشوف شئ زين فيني
عايشه معه عشان عيالي وعارفه إن حياتي تبي تنتهي بطلاق او موت
ازعجتكم بمشاكلي لكن حسيت إني ابي انفجر ماعاد اقدر اصبر اكثر من كذا مافيه شئ يتغير للاحسن بالعكس كل شئ يتغير للاسوأ
الود ودي اموت واشوف كيف يعيش من غيري
مافيه وحدة تتحمله مثلي وهو عارف هذا الشئ لكن ما يتغير
اخلاقه معي زفت ومع غيري قمه في الاخلاق
ما يحترمني ولا يقدر تعبي
دائم يقلل من شأني جاب لي الاحباط والاكتئاب
ما بيدي حيله غير الصبر والدعاء
ساعات احس إنه مسحور لأن تصرفاته مو تصرفات ناس طبيعين ابدا
سامحوني طولت عليكم
حسيت إني إرتحت لما فضفضت لكم
الدنيا ما تستاهل @aldnya_ma_tstahl
عضوة جديدة
هذا الموضوع مغلق.
الماسه برونزيه
•
عليك بسهام الليل وربي بيفرجها لك ***** الله
يااابعد قلبي احتسبي الاجر من الله .. وان الله اذا احب عبدا ابتلاه ..
اسسستغفري ريك كثير .. والله يسخره لك ..
اسسستغفري ريك كثير .. والله يسخره لك ..
الصفحة الأخيرة