ابي النصيحه تكفون مااعرف كيف اتعامل مع زوجي

السلام عليكم

بدون مقدمات لان نفسيتي خايسه

انا مشكلتي بالحياة عموما اني مااحب اقول وش اللي مضايقني
احب اكتم واسكت
دايما زوجي يسالني وش فيك اقوله مافيني شي يقول يابنت الناس وش فيك وارد مافيني شي واقوله لو اللي مضايقني انت صدقني اني بجي من نفسي واقولك بس مو اليوم لاني متضايقه الحين ومافيني اتكلم عن الموضوع.. وطول الليل هذي سالفتنا
وبالاخير يزعل

انا الحين لي سنه متزوجه واغلب هاواشنا على ذا الموضوع لاني انا انسانه حساسه جدا جدا واي شي يأثر فيني

المهم جا اليوم وصارت نفس السالفه وزعل كالعاده وسمعني كلام يجرح ويقولي
انا الين متى بحمل نفسي فوق طاقتها انا اسويلك واسويلك وانتي ولا هينا ولابكرا ولا بعده لاتقولين لي وش اللي فيك ماابي اعرف ومن ذا الكلام
وبالاخير بكيت وقعد شوي ورضا بس انا قعدت ساكته ولا تكلمت لاني من جد انجرحت

طيب الين متى؟؟؟؟؟ انا اتمنى القى انسان يفهمني انا مااحب او بالاصح مااعرف اتكلم وانا متضايقه ومن جد وقتها اصير حتى مالي خلق زوجي عشان مايسألني واتمنى انه يكون يصلح اسوي فترة اجازه ولااشوفه ولالا شي

علموني كيف اخليه يفهم هالنقطه فيني عجزززت وانا اقوله بس مو راضي يقتنع او يستوعب الموضوع

وعلى فكره انا اعترف اني اتضايق وازعل كثير بس اعرف افرق بين الجد والمزح
يعني احيانا زوجي يمزح معي بس تجرحني كلمه قالها وتلاقيني ابكي غصب عني بس ماازعل ابدا ولو يصبر شوي بيلقاني قاعده اضحك معه.. وبالاخيرهو اللي يزعل ويقولي اذا ماتبيني امزح معك قوليلي

طيب انا وش مشكلتي اذا ربي خلقني كذا دمعتي بعيني؟؟؟؟

من جد هالموضوع يتكرر كثييييير وماعاد فيني اتحمل لانه مو راضي يفهم طبيعتي الحساسه ولا هو راضي يفهم اني انسانه كتومه واتعب واتضايق اذا تكلمت عن اللي فيني

تكفون يابنات ابي النصيحه وادري انكم يمكن ماتحسون انها مشكله بس صدقوني هذا اكثر شي ينتهاوش عليه انا وزوجي وهو بالنسبه لي موضوع كبير لانه يصير بشكل دائم ومأثر في علاقتي معه

لاتبخلون علي بالنصيحه وعلموني كيف افهمه ووش اقوله لاني اذا جيت اقول عن اللي بقلبي القى نفسي ساكته او اخربط واقول كلام ماله دخل بالموضوع مااعرف اطلع اللي فيني مدري ليه!!؟

بس تكفون لاتقولونلي حاولي انك تتكلمين اذا تضايقتي لان هذا مو حل بالنسه لي :frown:

وافففففففففف بس :frown: :frown: