ابي رايكم لماذا تسمى.......... مطلقة.

بنات ابي رايكم بهذا الموضوع وبصراحة مع اني كنت كاتبته من اول بس مدري وين راح.

المهم ماعلينا ببدأ بالموضوع.

قأقول : عند بعض اهالي المجتمعات الخليجية عادات وتقاليد الله يهديهم تهد الحيل.
واللي يقهر أكثر ان هالعادات والتقاليد اللي صجونا فيها( ما أنزل الله بها من سلطان).
والشي الثاني:انها سببت تعاسة وفشل لكثير من البشر.
والشي الثالث: فيها تناقض عجيب.
والشي الرابع:الأدهى والأمر بعض الأهالي يقدسونها ويهتمون فيها اكثر من الحلال والحرام.

فأنا بكتب موضوعي عن الخطبة والزواج والأمور اللي تحصل فيه. ولعل وعسى تغير من نظرة اهل العادات والتقاليد.
فمثلاً :كلنا نعرف واللي متعودين عليه ان الزواج يبدأ بخطبة وتالي الموافقة من الطرفين وتالي النظرة الشرعية وتالي الموافقة الثانية على الشكل لحد هني الوضع اوكي طيب ( السالفة ماهي بس يشوفها وتشوفه وتالي يعجبها وتعجبه)

انا اللي بتوصله ليش مايطولون فترة الخطبة لأن كلما طالت فترة الخطبة كلما كان احسن ؛شلون احسن انا اقولكم:الأحسن الأول:ان الأهل يأخذون كفايتهم بالسؤال عن الولد.
والأحسن الثاني : (ان الولد والبنت يتعرفون على بعض اكثر ). هني مربط الفرس؛
شلون يتعرفون على بعض اكثر؟ الأجابة : عن طريق الأتصال بالتليفون تكلمه ويكلمها.
بس بشرطين: الأول:معرفة اهل البنت وموافقتهم.. والثاني:موافقة الولد.
أهم شي ان الأهل يصير عندهم خبر بالأتصال بفترة الخطبة.
انا ما اشوف فيها شي. لأن الله سبحانه شيقول:( لاتواعدوهن سراً).
صدقوني فيها فوايد كثيرة والواحد يتجنب اشياء وايد بالتصرف هذا.. فمثلاً: لو كلموا بعض بفترة الخطبة و اختلفوا على شي ولا وافق اي واحد فيهم يتنازل للثاني ؛بهذي الساعة يمديهم ينهون كل شي.
لان شنو ذنبهم بعد ما يتملكون ويطيح الفاس بالراسويختلفون على شي بسيط وتالي تقول او هو يقول :ما نقدر نستمروينفصلون بسبب شي تافه وبعدين تصير البنت مطلقة على اي اساس وهو لادخل عليها ولا حصل زواج اساساً.ليش ما تعطونهم مجال بالخطبة يشوفون امورهم واوضاعهم من البداية شنو اللي يبونه واللي مايبونه.....الخ.
فأنا أقول: الواحد يتدارك مثل هذي الأمور ويغتنم الفرصة بفترة الخطبة أنا ما انفي ولا انكر ان القسمة والنصيب لها دور بهذا الأمر بس الواحد يتسبب.
الحين البنت بهذا الزمن تطلع وتدخل وتكلم السواق وتكلم اللي يبيع بالسوق ووووو الخ
على شان حاجتها ولافي اي صله بينها وبينهم؛ طيب وين العادات والتقاليد عن هذا الشي؛ ما شاء الله يعني هالعادات ما تطلع الابالأمور المصيرية والأموراللي فيها مستقبل ( شنو هذا التناقض يعني تناقض بعينه وعلمه)
مرة وحدة صغيرة بالسن سألتها عن سبب طلاقها:قلت لها :انتي شلون تطلقتي؟ تقولي ما اتفقنا . اقولها ليش ما كلمتيه من قبل ماعرفتي طبعه؟ ترد تقول اصلأً : ماتزوجنا بس ملكة.
يعني بصراحة مدري الواحد شيقول .
ويالله عاد اخذوا حجي الناس على البنت المطلقة بفترة الملكة يوووووووووووه الله يكافينا شرهم .انا اقول : لومتزوجين وتالي تطلقوا ارحم لهم من طلاقهم بفترة الملكة اللي بس اسم مطلقة ومطلق على الفاضي يعني زواج على ورق بس. اللهم لا اعتراض.
انا اقول : انتبهوا ياأهل العادات والتقاليد وتداركوا مثل هالأمور.
واتصالهم ببعض بفترة الخطبة على الأقل تكسر الحواجز اللي بتكون بعد الزواج على الاقل بيصير بينهم ميانة بس بحدودويأخذون على طبايع بعض .
وعلى شان مايكون بعد الزواج روتين ممل ورسميات مالها داعي .
والله بعض الأزواج بيتهم كأنه مساحة عسكرية من الروتين الزايد عن حده.
ورسميات تبط الجبد واذا ناقشتيها قالت: بالعكس هذا احترام بين الزوجين. أي احترام هذا اللي يطلع الواحد من طوره.المشكلة حتى هي ام الاحترا من داخل نفسها ماهي راضية بس تقنع نفسها.
وفي بعضهن اذا صارت مخطوبةو قلتي لها قول لأمج بكلم خطيبي بفترة الخطبة: تتخرع والله احسب هذاك اليوم
غلطت عليها وأنا مدري أثاري عاداتهم وتقاليدهم ماترضى بهذا الشي. شدعوه كفرنا بسم الله علينا.

المهم عيدوا النظر ترى الزواج سفر طويل والسفر الطويل لازم يكون بين اثنين متفقين ومرتاحين مع بعض . والزواج عشرة ماهو بلوزة متى ما طكت براسها الوحدة رجعتها لمصدرها.
وتريثوا وراجعوا عاداتكم وتقاليدكم واسفة اذا طولت شسوي من الواهي اللي فيني.
ملاحظة:لاتحسبوني اني معترضة على امر الشرع ومصطلحاته والشي الثاني : ان الاتصال بفترة الخطبة ما يكون كل يوم بين فترات.

وناطرة وجهات نظركم.

واشكركم.