ابي رايكم>>> وفاة وموضوع زواج

السلام عليكم،
بنات انا انخطبت بوقت وفاة أبو وحدة من أعز صديقاتي>>> والحمدلله تزوجت بس ليلحين ما سويت العرس.
المشكلة اني بلغت الكل وانحرجت أدق عليها وهي بهالظرف ابلغها عن هالموضوع وبالاصح ماعرفت لو بدق شقول؟؟
عرفت عن طريق مرت خالها وزعلت وقايلة لمرت خالها: اني انا مو مجبورة اني التزم بظروف وفاة أبوها.
انا اشوف من الذوق اني ما اتكلم بهالشي حاليا على الاقل>>>ياجماعة والله ماطاف شهر على وفاته وهي حيل متأثرة وأنا بعد.

اليوم دزتلي ايميل تقول:
قوة
اول شي مبروك والله يهنيك
بس حبيت اقولج ان الصديق فعلا ما يتذكر صاحبة في احزانه ولم يضيق خلقة ومجرد ما يرتاح او يفرح يعطيه طاف ويخليه يسمع اخباره من الناس
عموما كل واحد وتربيته واللي تعلم عليه والظاهر ان ما علموج ترفعين سماعة التلفون الا لم يكون ضايق خلقج وتبين احد يونسج ويضحكج ويطلع معاج
فيما عدا هذا.. فالايميل موطريقة تفاهم ولا تواصل بين الناس وخصوصا معاي لانج تعرفين وجهة نظري من هالناحية .. ومو انا اللي تدزين لها ايميل مع جروب من الاسماء حالي حال الغرب.. توقعت اني صديقتج
مشكورة على كل حال ومثل ما قلتلج.. الله يوفقج
بس رجاءا.. إنسيني.. هذا اذا ما كنتي فعلا نسيتي ولو جزء صغير من ايامنا مع بعض!
مع السلامة وعالبركة.. ومابي اشوف ايميلاتج.. ولا رقمج
***************************
شوروني شتصرف معاها؟؟؟
انا بكلم مرة خالها ولا أروحلها الدوام بس اخاف تجرحني
والله حيل تكدرت من كلامها ورسالتها وهي الوحيدة الي على بالي لانها ليلحين مابلغتها وكنت افكر كيف اوصل لها هالشي.