ملاك يا حبيبت البي اقربي وانا اختك

من زمان كنت ابي اطلع يوم الخميس من الظهر لحد نص اليل

وخايفه من رد زوجي بيكون كالعاده تصريف في تصريف

وازن وبعد الزن يا طلعت ونفسي منسده يا جلست و تزاعلنا

المهم من يوم السبت بدا التخطيط علشان الخميس

انا كان خاطري بالبر او البحر

سويت غدا عادي مثل الي نسويه بالبر وحطيت فوقه حلقات بصل وطماط وفلفل وليمون

ولما جا وقدمت الغدا قلت اليوم الاكل بري من صحيت وشفت هالغيم والجو الحلو

تمنيت البر ولا البحر بس عارفه مافيه امل لانه يوم سبت وشغل وتعب على حبيب قلبي

تغدينا

وعدا اليوم بدون اي تعليق او شي

يوم الاحد طلع من الدوام بدري و كان قايل لي بعد الساعه ثمان انه بيجي على الساعه عشر

جهزت اغراضي ولما جا سويت له شاي وهو يشوف الاغراض متجمعه في مدخل الصاله ولا يدري وش يله

المهم قلت بما انك مافيه امل تطلعني وتمشين قلت خلاص اليوم حبيب بيطلع بران ان الي بتكلف بالطلعه و الكشته

قال بسرعه والله مافيني حيل وانا طلع وتعبان و انتي وين تبين تروحين في هالظهر

سويت نفسي حزينه و متاثره حاولت تنزل كم دمعه بس كان عني جفاف ما نزل شي

قلت هذا الي قدرك ربي عليه بدل ما تقول ابشري ولا حاضر ولا ان شاء الله ولا ياحياتي يا حبيتي انا تعبان وبعوضك بوقت ثاني

بس مو مشكل الي يحبك يعدي لك

وانا ادري يا حياتي انك تعبان وانا اراعي ظروفك و نفسيتك وتعبك على حساب نفسي واذا انت مو حاس في هالشي هذي مشكله

وانا قلت الطلعه علي والكشته

هو كان مدخل سيارته بالقراش الطبيله مدري وش تسمونها

وقلت حق الشغاله والعيال ركبون الاغراض عاد عيالي مهبل مثلي

بسرعه ركبو كل شي وقالت انتي ما تفهمين ولا ما تسمعين المهم الكل ركب الا انا وهو

واسحبه من يده واركبه بالسياره بجنب السايق بمكاني المعتاد وانا ركبت بمكان السواق واشغل السياره

وقال وش وقدمت السياره شوي ورجعتاها ورا وقدمتها ورجعتها وهذي شغلتي

و وقفت وقلت للعيال وصلنا يالله ننزل ونزلنا وتنزل الشغاله الاغراض وهي ودها تصفقني

و ودتها للمحل الي انا قايلته لها كنت مفهمتها من قبل من جهت باب الرجال المكان وسيع وظل وبراد حلو

المهم جا زوجي معي وكنت كابه فيه ثلاث سطول رمل وحاطه كم طشت ماء لزوم الرحله

وجلسنا وتقهوينا وانا مسويه فيها للحين حزينه وطبخنا برا وتتغدينا وعلى الساعه ثلاث قلت يالله يا شباب بنرجع البيت

ركبو الاغراض وقال خلاص ماله داعي هالزحمه دخلوها من باب الرجال اقرب لكم

وقلت له حتى بهذي باخل علينا حنا الي بنشيل الاغراض وحنا الي بنزلها بس مقدر اقول شي غير ابشر

وقلت للشغاله تروح تفتح الباب ودخلنا الاغراض وهي اجلست ترتب حوستننا

وعيالي قالو الي كنت محفضتهم من قبل قالو كثر الله خيرك و الله لا يهينك على هالطلعه مشكور والله يخليك لنا اليوم وكل يوم

علشان تطلعنا كثير

عيالي توهم صغار وكانو مبسوطين

مر اليوم بسلام

والاثنين سويت نفس متضايقه و طفشانه

وعلى المغرب قلت متى بيسمحون لنا بالسواقه واستغرب من كلامي لانه عارف اني ضد هالموضوع

وقال غريبه وش الي غيرك قلت فكرت فيها انتم اذا زعلتو ولا تضايقتو تطلعون يا تفرون بالشوارع ولا بحر ولا بر ولا اي محل لما

تروقون و حنا في هالبيت كرف وتعب سوا كنا تعبانين او متضايقين

وغير هذا لو اشتهيت مشوار او طلعه ما يحتاج اطر العالم اجهز نفسي وعيالي ونطلع وانتهت الحفله

ومر اليوم عادي ما شفت اي شي من زوجي

ويوم الثلوث كان الجو خطير و العصر رش مطر وبعدها هتان كان خيال

قلت يمكن يطلعنا ولا فكر اخونا باللله قلت انا وراك وراك

على المغرب جهزت عدتي وقلت بما ان بعض الناس ما عندهم احساس والحكومه موب راضيه نسوق ببسط عمري وعيالي

والي يبينا حنا فوق وطلعت انا وعيالي في السطح

بعد المغرب جا عندنا فوق وانبسطنا وفليناها

ومر اليوم عادي

يوم الاربعاء ما سويت شي كنت اخطط حق يوم الخميس بخليه حرب ضروس اذا ما ودانا اي محل

الخميس قمت بدري وصحيت البيت كله وقلت وش تبون فطور وافطرنا وعلى تسع كان بيدخل ينام وقلت له وش تبي على الغدا ابيه يقول لا تسوين شي بنطلع

قال اي شي من يدك حلو قلت اي شي قال اي شي حتى لو كان سم قلت خلاص ابشر من عيوني

بس ابي كذا حاجه قبل ما ترجع تكمل نومتك كلم البقاله و خله يجيب بودرة بف باف و بودرة بيجون والاحبوب الورديه سم الفيران

واي سم عنده يجيبه بذوقك احلا كوكتيل سموم وبعدها بشوف وش تقول حلو ولا مو حلو

قال بموت مايمدين اقول حتى حرف واحد

قلت وقتها ما راح ازعل كل مره اشتهي الطلع بقول لو كان عندي زوج كان طلعني و ونسني بس ماعندي

ورحت للمطبخ وانا ناويه عليه العصر بس ربي ارحمه

وجاني وقال قبل ما تسممين و ترتاحين بسوي اخر حاجه بحياتي علشان يكون ختامها مسك

قال البسي انتي والعيال وجهزي كل الي خاطرك فيه و المحل الي تبينه ابشري فيه

ولفيت حوليه وانا ادور حاجه وقال وش تدورين قلت ادور سلك الاحساس اخيرن شبكته

وضحك

تعبت وانا اكتب وطفشتكم بقصتي اذا خلت مره ثانيه بقولك وش سويت لما انحلت مشكلة الطلعات وصرنا نطلع

ااااااااااااب

ماشاء الله عليك يامها عندك اساليييب رهيبه ان شاءالله جاري التنفييييييذ الله يسعدك يارب

السلام عليكم ورحمة الله وبركاته

صباح الخيرات

ملاك ليكون طفشتك بقرقتي الكثيره

بقولك حاجه اسويها كل ما نطلع وصار زوجي يحب الطلعات

وهو الي يقول لي يالله نطلع

اي يوم بنطلع هذا بالبدايه مانطلع الا بعد مازن وصدع براسه

صرت اكشخ له في اي طلعه و اسوي له جو حلو وهالكلام الي يصب عسل

انا في البيت مو كذا ومو معنى هذا اني ساحبه عليه بس قليل

و اخليه ينبسط في كل طلعه

شرح اكثر وان شاء الله ما يجي كثر الي كتبت من قبل

اذا اناديه مو بسمه اقوله ياحياتي يا عمري يا دنيتي

ارسله بالجوال وحنا جالسين بجنب بعض الله لا يحرمني منك

او احبك

او الله يقدرني واسعدك مثل منت مسعدني

و اوقات اكثر من رساله

نلعب يا ضومنه ولا اونو ولا العاب ماني عارفه شسمه

واقوله اذا فزت علي ثلاث مرات اسويه لك ليله لا صارت و راح تصير

ويصير يلعب بذمه وضمير يبي يفوز

اكون حافضه كم سوال و كم لغز و اقول اسالني او عطني لغز واذا حليته تعطيني غيره واذا ما قدرت احله

يكون دوري

اسوي اصناف حلا و ماوالح جديده واكتب على الصحن حصري ولاول مره على الشاشه

ولا بمناسبة الطلعه الحلوه سوينت للحلو حلو جديد

اخذ اصحون و كاسات حلوه مو كل مره بس يطلع شكل الجلسه مره حلوه بسبب التقديم

بعض الاوقات احط ورد مجفف ولا شموع ولا كلها مع بعض

وبعض الاوقات اخلي طلعتنا للبر بما ان ما راح يكون احد فيه يشوفنا اخلي الطلعه خمس نجوم

الفرشه و القعده وكل شي حتا انا لاني اخذ راحتي في كل شي

مره في البر قبل ما نوصل طلبت منه يوقف في المحطه و خليته يجيب قاز كثير

بعد ما وصلناوانبسطنا كتبت على الرمل وكانت الارض مبلوله من الماء الي كبيت عليها

وربي احبك و الف شكر بالخط العريض و حافرته حفر على الرمل وكبيت القاز فيها

وشبيت النار فيها وطلع المكتوب بالنار هذي لليوم يتكلم فيها وهو مره سوا نفس الحركه

سوا قلب وحط في وسطه اسمي وشب النار

وبس يارب اني اكون كتبت شي جديد و مفيد لك

تسلمييين مهاء والله يعطيك العافيه عجبتني حركت النار مره والله يحفضلك زوجك