اخواتي انا مشكلتي انا وزوجي ان لنا 4شهور معتزلين عن بعض وصراحه انا الي عازله نفسي وانام بغرفه عيالي والسبب انه قبل الاجازه وفي عز الاختبارات اخذ اجازه شهرين وسافر لامريكا كذا بس سياحه
تركنا بعز حاجتنا له حتى ولده قاله دبر احد يوديك ويجيبك من المدرسه وشوف لك احد يذاكر لك
والبنات انا الي اذاكر لهم لوحدي مع نفسيتي الزفت بسفريتهه
وتركني انا وها العيال بدون مصروف والله العضيم ماعطانا الا الف ريال مصروف وش تسوي فينا بها الوقت والدنيا نار وطلبات مدارس وبقاله واكل وشرب ومقبلين على اجازه البنات يبون ملابس صيفيه ومصاريف الاجازه انتم عارفينها حتى ماوفر لنا سواق ولا حتى عطانا حق مواصلات قسم بالله اني اصرف على المواصلات في اليوم 80 ريال لان بيتي بعيد عن الناس في منطقه بعيده
ولا سدد فواتير
وفيه اشياء كثير اتمناها ماوفرها لي
غسالتي خربانه وماتشتغل زين تصدقون انها من ايام زواجي ولها الحين 20 سنه مغير اصلح فيها وارقعها
ولا عندنا مكنسه كهرب مغير متبهذلين يانكنس بيدنا ولا ناخذمكنسه اهلي
ولا اثث مجلس للحريم والرجال مخليه فاضي
وقسم بالله ماعندي لو الخاتم الذهب وحتى والله العضيم مايعطيني مصروف ابدا ولا ريال
ممشيه حالي ابيع واشتري في المنتديات وادخل شهريا 300ريال تمشيني شوي وماعمره سدد لي جوال
حتى مايودينا ولا يجيبنا انا وعيالي مغير مع لموزينات كل ماقلنا نبي نروح لاهلي او اهله او اسواق او مشاوير قال تبون عندكم اللموزين روحو معه ولا اقعدو ويطلع ويخلينا حتى حق اللموزين مايعطينا اياه
تعبت معه مشاكل وهواش مره اجيه بالين ومره بالشده مانفع معه الرجال منتهي كل همه نفسه وبس حتى عياله مايقدرون عليه يهاوشهم لو طلبو منه شي بخيل مره بشكل ماتتصورون
للمعلوميه يبيع ويشتري بالغنم ولا عمره دخل علينا لحمه الا من عيد لعيد الاضحى طبعا
وهو ماخذ معه لسفريته مايقل عن 30 الف ريال كلها راح يصرفها على الشراب والمراقص والبنات لاتقولون ضالمته اهو بلسانه يعترف لي انه هذا جوه شراب ومراقص بس ينكر انه يروح للحريم لانه عارف اني بزعل وعلى باله بصدقه لان الي يشرب يسوي كل شي
تعبت وصارعت الحياه بغيابه وتسلفت وسويت جمعيات ومشيت حالي انا وعيالي
وقررت اني انفصل عنه بس مااطلع من البيت
اقعد لعيالي اربيهم واراعيهم واضلل عليهم
يوم جاء من السفر وشاف معاملتي معه نكد على وصار يعاملنا معامله سيئه يقول ليش تزعلين
يعني خليني اسافر واسوي الي ابي واستقبليني زين
كيف يصير كذا انا انسانه لي مشاعر واحاسيس
يكفي اني متحمله بخله وانه مايصرف على ولا يعترف بي
بعد يسافر ويخليني وياليته راضانا بقرشين ولا كلمه حلوه كان معليش بس لا كذا ولا كذا
تكفون وش اسوي معه كيف انسى الي سواه ودي حياتنا تصير زي الناس حب والفه وموده نجلس مع بعض ونسولف
للمعلوميه انا ماقصرت معه ابدا لا من ناحيه اللبس ولا والنضافه والرومانسيه حتى الفراش ماارده عن شي ابدا كل الي يطلبه اسويه بس ابيه مايروح لغيري
احسن لبس البسه جنوز وقمصان نوم راقيه وحركات وروائح حلوه
وانا شاطره من ناحيه الطبخ والمعامله وكذلك انا هاديه قسم بالله مو مدح بس والله اني كذا بشهاده الجميع
يمكن عيبي الوحيد اني مليانه بس مو مره يعني وزني تقريبا 75وطولي 160يعني رويانه
بس تعبت اسوي رجيمات وارجع بسرعه اسمن
ويمكن اهو يروح يدور الرشيقات مدري عنه
المهم كيف ارجع حياتنا حلوه كيف اتصرف معه وهذي طريقته معي
تكفون عطوني حلووووووووول
(نبذه عن حياتي :عمري 38سنه لنا 20 سنه متزوجين
عشر سنوات صراحه حلوه كلها حب وكان خلوق وحبوب ويحبني بقوه ومدلعني والكل يحسدنا على حياتنا وكان غييير الي قلته لكم وفجاءه تغير بعد مااشتغل بالتجاره وصار يركض ورا الدراهم
تغير ميه وثمانين درجه
انا ابيه يرجع زي اول كيييييييف تكفون دلوني على حل والله اني احبه واحس انه يحبني بس مايبيني اطلب منه شي ولا يبيني اتدخل بسفرياته وحركاته
يبني راضيه عن كل شي غلط يسويه ويبي يجرحني من غير ماازعل
سامحوني على اسلوبي العامي لان نفسيتي تعبانه ومالي خلق اتفنن بالاسلوب ابي ابرد قلبي بالكلام واخذ راحتي
سماهر666 @smahr666
عضوة جديدة
يلزم عليك تسجيل الدخول أولًا لكتابة تعليق.
سماهر666
•
وش اسوي انا متحمله علشان عيالي ابي اوفر لهم عيشه هاديه وهنيه وعندي امل انه يرجع زي اول ودايم ادعيله بكل وقت وبكل صلاه وبصلاه الليل
om nouf
•
مالي الا الدعاء لك
صراحة انتي رائعة بصبرك الله يثيبك ويعوضك عن كل التعب
ان شاء الله فيه حل يرجع فيه زوجك مثل ماتبين واحلى الله يجمع شملكم بكل خير
والا يتدخل بالموضوع طرف من اهله يساعدونك ع اللي يسويه ولدهم فيك
صراحة انتي رائعة بصبرك الله يثيبك ويعوضك عن كل التعب
ان شاء الله فيه حل يرجع فيه زوجك مثل ماتبين واحلى الله يجمع شملكم بكل خير
والا يتدخل بالموضوع طرف من اهله يساعدونك ع اللي يسويه ولدهم فيك
روانه $
•
ادعي له بالهدايه والصلاح
ويقوولون كلما كبرت الحرمه كلما زوجها بعد عنها وبحث عن غيرها
غيري شوي من نفسك انتي وعدلي وضعك
ويقوولون كلما كبرت الحرمه كلما زوجها بعد عنها وبحث عن غيرها
غيري شوي من نفسك انتي وعدلي وضعك
الصفحة الأخيرة