ابي مشورتكم .. دبروني

السلام عليكم ورحمة الله وبركاته ,,,
بدخل في الموضوع علطول
انا بنت عاديه لاملتزمه ولاصايعه اخاف الله واعرف الصح من الغلط ..
لكن وسوس لي بليس بيوم وغلطت غلطه ماكنت اتصور اني اسويها بحياتي :(
يعني اسمع من الناس بس ما اتخيل نفسي انه يصير لي هالشي , لكن صار لي والشكوى لله
والله اني متحسفه عاللي سويته ومتندمه عدد شعر راسي واحس بتأنيب ضمير شدييييييد
والله يابنات اني كل يوم اصيح من ضيقة الصدر اللي فيني والهم من اللي سويته
يعني انا فلانه اللي مستحيل اسوي هالشي اللي لو كل الناس تسويه الا انا ما اسويه سويته
المهم ماطول عليكم .. بإختصار انا تعرفت على شاب بالماسنجر وعطيته رقمي وصار فيه بينا رسايل
لكن مافيه مكالمات ولا مره كلمته المهم ماستمريت الا شهرين من اخذت رقمه وحسيت بغلطتي وقاطعته
( والله شهرين بس ) وقلت له يمسح رقمي وقال ما بمسحه لين تتزوجين وظل يراسلني وانا ما اراسله كلش المشكله الحين انه لي تقريبا 6 شهور قاطعته وهو مازال كل فتره وفتره يرسل رساله او يدق دقتين ويقفل وهذا مسبب لي قلق وتوتر ( مع العلم انه عرف انا من اكون عن طريق رقمي ) ..
وانا الحين عايشه بهم ونكد وضيقة صدر ووسواس من اللي سويته ( اخاف انفضح ) احس انه كل الناس تعرف بسالفتي احس اني صايعه ووقحه وشلون غلطت هالغلطه ( احس اللي فيني هذا عقوبه من ربي عاللي سويته لكن استاهل كل اللي يصير لي نا اللي جبته لنفسي ) انا ودي الحين اقطع علاقتي نهائيا فيه ودي احس انه صدق مسح رقمي ونساني .. انا الحين تعبااااااااااااااااانه نفسيا كل ما تمر مده واقول الحمد لله تركني يقوم يرسل رساله عاديه من رسايل الجوالات وينكد علي واظل كل اليوم اصيح وادعي ربي انه يسامحني عاللي سويته ويفكني منه
سألت صديقتي شسوي قالت طنشي ولاتردين عليه دام انها على رسايل ماعليك منه واني مكبره السالفه ومدري ايش .. طيب لمتى اطنش ؟؟؟ انا مابي اظل على هالحال انا صرت اكره نفسي ( وهو مايقول ردي ولاشي كأنه يرسل يبي يذكرني وينكد علي بس)
قولوا لي الحين شسوي رسايله تنكد علي وتذكرني بغلطتي وانا خلاص تبت تبت تبت بس ابي افتك منه
لاتقولون غيري رقمك لانه مستحيل اغيره قلت لابوي بغيره وهو رفض وقال ماله داعي تغيرينه من دون سبب ولو بلزم عليه اخاف يشك انه فيه شي وابوي عصبي.. وانا ماعندي اخوان بس عندي خوات وهم يثقون فيني ثقه عميااااء ولو بقولهم بطيح من عيونهم طيحه وبتتشوه صورتي قدامهم وانا مابي هالشي يصير :(
دبروني الله يخليكم والله الهم وضيقة الصدر سيطروا علي لا انبسط بروحه ولا جيه كل ما اروح مكان واتذكر اللي سويته اتنكد وتبدا دموعي .. شوروا علي وعلموني شرايكم هال اسوي مثل ماقالت صديقتي اطنش ولا اخذ ببالي ؟؟ وهل يقدر يسوي لي شي او يمسك علي شي ؟ قولوا لي وش رايكم الله يجزاكم خير

( معليش كلامي مو مرتب ولا واضح بس اعذروني :( )