اتحدى ازا دقتي تشيز كيك بهالروعه....فوتي وما حتندمي

التشيز كيك اللي بعمله كتير طيب و طعمه ولا بالاحلام روعهههه و ما في مجال للمقارنة مع اي صنف تاني و كل من داقه حبه ما بدي اطول عليكم بخليكم مع المقادير:

اول طبقة: بسكوت شاي بتصفيه ببياركس و انا عادة بعمل طبقتين بسكوت فوق بعض و بسقيهم كاسة حليب
تاني طبقة: بتجيبي الخلاط و بتحطي فيه اول شي 6 حبات جبنة كيري + باكيت كريم كراميل بس بدون الكراميل(ماركة العلالي) + باكيت كامل دريم ويب(كرافت)+ باكيت جلي على فراولة فوستر كلاركس) و ممكن تستخدمي اي نكهة تانية بتحبيها مثل الكرز يطلع رهيب كمان + علبة قشطة نستلة الحجم الكبير فيه تقريبا 175 جرام + كاسة حليب سائل بدون سكر
بتخلطيهم بالخلاط لحد مايسيرو زي الكريما بعدين بتحطيهم فوق طبقة البسكوت و بتحطي البايركس بالتلاجه و بنبدى التحضير لآخر طبقة

نيجي لأخر طبقة : و هي الجلي بتعملي الجلي جاهز عالغازتقريبا باكيتين و بعد مايخلص بتخليه شوي يبرد بس ما يجمد يكون بارد بس و بتحطيه فوق الطبقة التانية و فيكي كمان تحطي بدل الجلي مربي فراوله او صوص البلوبيري الجاهز

ملاحظه: لما تديري طبقة الجلي فوق الطبقةالتانية ديري بالك ما يكون سخن عشان ما يتسرب خلال طبقة التشيز كيك و ينزل عالبسكوت
والله لو بعرف انزل صور كان نزلتها خطوة خطوة بس مابعرف ياريت حد يعملني كيف بكون ممنونه
جربوها و والله ما حتندمواو على ضمانتي
ان شاء الله يكون الشرح واضح
و انا بالخدمة لأي سؤال و استنى ردودكم و تعليقاتكم حتى لو كانت سلبية بتقبلها بصدر رحب و اتمنى اشوف تطبيقاتكم