اترجاكم تخبروني شو الحل قبل لا ......

الموضوع موضوع زوجي ... بطول عليكم شوي بس الله يخليكم ردوا علي شوروا علي ...

زوجي قبل ما يخطبني كان انسان غير سوي يشرب و يزني و يقامر و ما تم شي ما سوى انسجن اكثر من مرة و ما كمل دراسته و كان كل يومين يشتغل شغلة و لما يحصل الراتب اخر الشهر ما يداوم لين ما تخلص فلوسه ...

المهم لما خطبني انا ما كنت اعرف كل هاي الاشياء (هو ابوه يصير خال جدتي من امي ) يعني من الاهل ... المهم انا وافقت عليه بس الله يهديهم اهلي و خاصة اخوي كان يعرف كل هاي الاشياء و ما قال شي ... المهم عقب الخطبة العادية بفترة اختفى الكل دور عليه حصلوه مسجون بقضية زنا مع فليبينية و الالفليبينية حامل و امها رافعة قضية عليه لانه حاول معاها انها تجهض و عطاها ادوية كثيرة و كانت بتموت ... المهم انسجن 3 شهور و خيروه انه يتزوجها او ينسجن بس هو انسجن و هي سافرت ... خبروني اهله انه طلع بريء و ما يخصه في كل الموضوع و هي سافرت و هو طلع من السجن و اهلي طبعا صدقوا او ما ادري المهم كل شي صار اوكي ....

لما ملجنا بفترة شفت مسجات في تلفونه بالفليبيني كم من مرة و لما واجهته صدمني ... قال انه السالفة اللي صارت قبل كلها صدق و هو عنده ولد من الفليبينية و الفليبينية رجعت البلاد بجواز مزور بس الولد عند اهلها في الفلبين فهي اتطرش مسجات و تتصل تباني اصرف على الولد .... انصدمت و اتخبلت والله ما عرفت شو اسوي بس هو اقنعني انه كل شي بينه و بينها انتهى و هاي غلطة و لازم اقل شي عليه انه يصرف عليه ... اقتنعت عشان اهله و اهلي و قلت كل شي نصيب ...

سنه عقب الزواج كل شي تمام نطلع مع بعض دايما نسهر و نسولف و نحلم احلام كاي زوجين متزوجين قريبا ... بعدها انا حملت و من وصلت السادس قالوا لي لا تتحركين كثير لاني ممكن اولد ولادة مبكرة و الجنين صغير ... بدا هو يطلع وايد ويسهر و دايما يرجع متاخر الكل لاحظ ها الشي ... بعدها بفترة انا كلمته قال بعد عناء انه يشرب ويتاخر عشان يروح عنه السكر و عقب يرجع البيت ... انصدمت طبعا اتخيلوا انا حامل في السادس و يقول لي ها الكلام ... تعبت و ضاقت فيني الدنيا و اهلي في امارة ثانية بعيدة ساعتين عن مكان اقامتي مع اهله ...

اهله طبعا يعرفون بموضوع شربه لانه قبل كان يشرب بس اللي هزني انهم ما كلموه و كل ما صار شي يقولون نخاف نكلمه يزعل و يعصب ويطلع من البيت ... ابوه حاول يكلمه كم من مرة بس ريلي ما يرد عليه يسكت و خلاص ...

وتميت على ها الحال كل كم من شهر نرجع لنفس الموضوع و مرة حلف براس بنته انه ما يشرب مرة ثانية و رجع و شرب مرة و مرتين و ثلاث ...

الحين انا حامل و بنتي عمرها 3 سنوات تقريبا يعني صار لنا متزوجين 4 سنوات و كم من شهر و هو على نفس الحال ... قبل سنة صارت مشكلة مع ابوي و المشكلة كبرت و خذوه امن الدولة و الحين ابوي مسجون عندهم و خذوا زوجي بعد بس شهر و نص و رجع و الكل قال انه الحين اكيد راح يتغير بس فترة و رجع افظع من قبل ....

انا تعبت و مليت من تصرفاته و كلام اهله لي اللي يرفع الضغط و يعور القلب ... المشكلة كل ما اقول له انا امقصرة في شي يقول لي لا والله مو امقصرة ... انا اشتغل و راتبي وايد زين و احنا ساكنين في بيت ابوه يعني ما عندنا مصاريف كثيرة يعني هو عايش في عز راتبي تحت ايده كل ما بغى شل منه و انا ما ابي اقصر عليه ...

هو مو ناقصنه شي بيت و ساكن احسن مكان و شغل يشتغل احسن مكان الكثير يتمنون يشتغلون ها المكان و فلوس عنده وزوجة وبنت و الثاني ياي ان شاء الله قريب ... ما ادري شو اللي ناقصنه ...

بعد ما مليت و طفرت كلمت اخوي عنه و يا ريتني ما كلمته لانه صدمني صدمة قوية ... اخوي انسان محافظ ويعتمر كل سنة و مواظب على الصلاة و شغله و اهله و عياله وزوجته ... المهم قال لي "تبيني اكلمه وهو لما اروح معاه يوديني البار و الديسكو و يروح يشرب و يقامر و عقب يروح يتسابق مع ربعه و انا معاه، كيف راح يسمع كلامي.. انا كلمته اكثر من 10 مرات بس ما شي فايدة حتى اني الحين ما اروح معاه و اهرب منه كل ما اتصل" ... اتخيلوا جرأته لاي درجة وصلت ... يشرب جدام اخوي انا و يقامر و و و ....

كلمت زوجي نفس اليوم قال انا ما اضركم بشي انا اشرب لنفسي ... المصيبة كبيرة لانه مو حاس انه يغلط و رفقاء السوء مو امقصرين ... شو بقول له كلمته و صحت اترجيت و و و بس ما شي فايدة ابدا ... اليوم الصبح رحت اشغل له السيارة قبل ما اطلع انا للدوام شفت مسج في تلفونه من مرسل اسمه Thailand ومكتوب في المسج "Hi darling i miss u" و 17 مكالمة لم يرد عليها ... خذت رقم المسج و مسحته و الحين مب عارفة شو اسوي في الرقم اتصل واشوف اذا واحد والا وحدة و الا استعلم عن الرقم باسم منو احسن و الا شو ما ادري ... انا على وشك ولادة و هو ولا امفكر و انا عندي مشكلة في الحمل هو الحبل السري و ممكن البيبي يختنق و و و ...

شو الحل والله مو عارفة شو اسوي ... احس انه الله يعطيه فرص وفرص عشان يتوب بس هو يزيد في المعاصي و بيي يوم بيندم عليه بس ما شي فايدة بعدين ...

الحين افكر اخذ اجازة من الدوان لاني راح اولد قريب و اروح عند امي بس بهاي الطريقة راح يزيد هو في معاصيه بحجة اني بعيدة عنه ... اكلمه عن الرقم و اهدده لاخر مرة بيقةل لي خلاص ان شاء الله و عقبها بيرجع لنفس الخرابيط لانه سواها من قبل ...

مالي الا الله سبحانه و تعالى ... مالي الا الدعاء و التضرع لله انه يساعدني و قراءة القران ... و اتمنى منكم تدعون لي و ان شاء الله الله بيفرج كربة كل مؤمن و صابر و ان الله مع الصابرين ...