اتقوا الله في امهات ازواجكم ياحريم

السلام عليكم ورحمة الله وبركاته .........

هذا الله يسلمكم انا اخش بشكل اسبوعي لغرفة في البالتوك تستضيف دعاة ومشائخ وتسوي محاضرات وتتقبل حتى الاستفسارات اسمع فيها محاضرات ..... الموهيم في ذيك المحاضرة الا ويتكلم احد الحضور عن الزوجة في هذا الزمن و"استقعادها" لام رجلها ... وكان يوعظ الرجال وينبهم لبر الام ويلومهم بشكل يقطع القلب ويحاول يصحي فيهم اللي قتله زوجاتهم ... وجلس يقول لهم انوو في زمنا هذا راااااحت الام وانقلبت الموازين واصبح الاحق بالبر والاحسان هن الزوجات وان الرجل ينصر زوجته على امه ويجيبها فوق راس امه واخذ يشرح كيف ان بعضهن وكأنها مسلطة على ام الرجل وبدل ما الزوج يحرصها على امه صار يقهر امه عشانها ... والله يابنات ان الغرفة تقريبا هاجت وماجت كل واحد من الرجاجيل جلس يتكلم .. اللي يذم واللي يحكي عن الحريم واللي واللي وواللي الخ ........... وانا ارتفع ضغطي من اللي سمعته .... ومالومهم انا زيهم شفت كثيييير وسمعت كثييييير

ليه كذا يابنات ؟؟ اتقوا الله بامهات رجاجيلكم اتقول الله بام رجاجيلكم اتقوا الله بام رجاجيلكم ....
انتي جاية تحطي راسك براس العجوز !! لما تتعاملي مع ام رجلك تذكري امك هل ترضين ان تعاملها زوجة اخوك بنفس الأسلوب ؟!! هل ترضين ان زوجة اخوك تمشي عند مجالس النساء وتنتقص من امك ؟! بعضهن من دون حياء تلاقيها بالمجالس ماغير العجوز سوت لي والعجوز عملت لي والعجوز تغار مني .... استحي على وجهك حاطة حالك من حال حرمة كبر امك !!! وين احترام الكبير وتقديره وين الرحمة هاذا اللي اتربيتي عليه يا بنت الأصول ؟!!! هذا اللي علموك اياه اهلك يا بنت الأجاويد ........ وللعلم ماافي بالدنيا أطيب من قلوب العجايز كلمتين على هديتين تراضيها بس البلا منكن الوحدة من تدخل بيت رجلها وهي حاطة في بالها اهل رجلها يا هي يا هم وبتغدى فيهم قبل لايتعشوا فيني ... قلة عقل وفرااااااغة قلب... وللأسف مجتمعنا يعزز هلسلوكيات الغلط ... دايماااااااا حاطين ام الرجل والحمولة بشكل عام ند للزوجة مع ان بعضهن والله بس يبن الفكة من شرهن ... وكل شيء يفسرنه على سوء ظن أعوووووووووذ بالله كأن ام الزوج والحمولة مافي راسهم غير حرمة ولدهم ماعندهم اشغال غير حريم عيالهم !!! ان مدحت طبخ حرمة ولدها قالت اووف عينها علي شكلي بتجيني عين منها وان مامدحت اكلها قالت العجوز احترت مني !! ان انتقدتها على شيء ولو كان تافه تخليها قضية فلطسين وتجلس تبالغ بالموضوع وتكبرها في خيالها المريض وتكبر راس زوجها فيه ولو تصدق مع نفسها كان لقت ان الموضوع جدا تافه ماكان محتاج كل هلصيحة ... ان حاولت ام رجلها تبين لها انها تشتاق لهم و قالت لها انزلي عندي ماشوفك ولا اشوف عيالك كثير قالت ذي تقصدني وتقصد اني اقطع عيالها عنها واني مقصرة .... وان سكتت وماقالت لها تعالي عندنا قالت ام رجلي ماتحبني ولا تحب عيالي ماعمرها قالت لي تعالي زوريني ... وش الحل شلون ترضيكم ؟؟


ماسألتي نفسك بيوم وش معنى ام رجلي تحب سلفتي ام فلان ولا تحبني ؟!! اذا المسألة ماهي مسألة ان ام الرجل تستقصد زوجة ولدها ولا كان حاربتكم ثنتينكم .. المسألة مسألة وحدة تعاملها بالطيب وتحطها فوق راسها وثانية شافت منها شيء آذاها أو آذى ولدها او بناتها ....

والمصيبة أكبر عاد لما اخوات الزوجة وامها يشجعونها على مجاكر ام الرجل والحموات !! طيب انتم ترضون حرمة ولدكم تعاملكم كذا !! اذا ليه حرام عليهم حلال عليكم ؟!! والله اعرف كثير من هلنوعية يقوون بناتهن على ام الرجل ويعطونها افكار ومكايد وطرق وخرابيط لأشياء مثل كيف تسحبين الزوج عن اهله وكيف تقلبين راسه على اهله وانتبهي لاتخلين في جيبه شيء لاهله ووو الخ .... وسبحان الله و هن مايرضن هلشيء من حريم عيالهن وبالعكس كاسرات روسهن وذالاتهن !! حلال عليهم حرام على غيرهم وبدال ما انتي يا الحرمة العاقلة الكبيرة توعين بنتك وتوصينها على ام رجلك وتذكرينها بربها تقوينها عليهم ليييييييييييه ؟؟ هذا بأي شرع ؟!! هذا بأي دين ؟!! خافي ربك ..


انتي يا بنت الأجاويد يا مسلمة ليه ماتناظرين ربك وتكبرين عقلك ؟!! ام رجلك حرمة كبيرة وشوله تحطين راسك من راسها على فكرة انتي ممكن على اي مشكلة تتطلقين وتشوفين نصيبك وهو يشوف نصيبه لكن امه هي امه ماتتغير فليه تقطعين اللي بينه وبينها وتكبرين راسه وتحشينه بالمشاكل !! وتضخمين من المشاكل وتبالغين ! والله اكثر الحريم يبالغون وفيهم سوء ظن موطبيعي اعوذ باالله !!! .. لما تطلب من ولدها يوصلها تراهي ماهي متقصدتك يا المسعدة وهو ولدها من قبل لاياخذك!! اكبري شوي وكبري عقلك وبلاش انانية وحب تملك هو زي ماهو زوجك برضو ولدها ولها حق عليه .... ان عطاها فلوس او عطى اخواته انتي وش يحشرك ؟ فلوسه وهو حر واهله عليهم حق مثل مانتي لك حق عنده اجل يحتاجون ويخليهم ويقاابلك؟؟؟ ... يفسح اهله وامه انتي وش يحشرك تحرضينه وتكبرين راسه عليهم !! الله اكبر عليك حتى شمة الهوى حرام عليهم !! اعرف بنات للأسف بالمجالس حتى على موضوع جلوس ام رجاجليهن بالسيارة بالكرسي اللي قدام عند الزوج يغتاضن منها ؟!! وش نقول غير انها قلة عقل وان الرحمة انعدمت بقلوبهن... الله يذكر حرمة اخوي الكبيرة بالخير الله يرزقها الجنة منها تعلمنا .. يوم كنا صغار وفي بيوت اهلنا كانت هي اللي تسحبنا سحب الا غصب نتفسح وحنا نستحي ونتهرب..و يوم نعرف انها ناوية تخرج مع رجلها انواع الأعذار مثل مونايمين كويس ولا سهرانين ولا تعبانين ننحرج و نبيهم يختلون ببعض شوي وياخذون راحتهم ومع ذلك تصر وتترجى فينا .... ولما يقصرنا شيء قبل لايدري اخوي هي اللي طيران تخبره وتحرصه علينا وتحرصه على امي لدرجة انوو امي تعصب وماترضى اخوي يسويلها شيء وتحبها مررررررره وتستحي منها مرة من زود ماهي حاطتنا بعيونها .. يابنات ليه صارت هلنوعية من البنات نادددددرة !!!!هي جبرتنا نحبها غصبن علينا نحبها ماشفنا منها الا كل خيرر بنت اجاويد والأهم ان السر والمشاكل اللي تصير في البيت مافي مخلوق كان يدري عنها...سبحان الله عكس لما طلعت وجو حريم الاخوان الصغار مكانها ههههه وكالة رويتر اليوم مشكلة في البيت بعد ساعة الخبر في بيت اهلها وبعد يوم عند الجماعة كلها ..

والله لو كل زوجة تعامل اهل زوجها بالطيب والاحترام والله انها بتلقاهم غصب طيب يحبونها ... بس حنا يالحريم عقولنا مدري وش لون صايرة؟!!! يعني هم وش بينهم وبينها يستقصدونها ؟ هي ماخذة ازواجهم ولا اخوهم؟؟ يعني بالعقل في ام ولا في اخت تحب تضر اخوها او تنكد عليه؟!! طبعا لأ ... يهمهم يكون ولدهم سعيد ومرتاح فليه فكرة ان اهل الزوج مستقعدين لكم!! وليه التجني والاستقعاد لام الرجل ؟!!! راعو عمرها راعوا ضعفها واتقوا الله ولاتقطعون الولد عن امه ولاتكبرون روس العيال على امهاتهم خافوا ربكم...


يا بنات ... تأكدوا .. ان ام الرجل ماتبي غير سعادة ولدها ... وشوف اكثركن بالمنتدى على اي مشكلة بينها وبين رجلها تجلس ماغير تسب بزوجها وتجحد وتكفر العشير وتنسى افضاله عليها وتسب بالرجاجيل عامة هذا ان مافكرت تتخلى عنه وتتطلق لكن الام لاااااايمكن لاايمكن تتخلى عن ولدها ولاتبدي نفسها على ولدها مهما قسى عليها ومهما جحدها ومهما ظلمها ومهما حط زوجته فوق راس امه ومهما حرضته زوجته عليها ..... فاتقوا الله يا بنات في امهات رجاجيلكم وتذكروا بكرة عيالكم يكبرون ومن الكاس اللي ذوقتيه ام رجلك بتشربين صدقيني ....


هلكلام موجه لفئة انتشرت كثييييير بينا ... بس هذا مايعني ان بنت الاجاويد ماهي موجودة .. لا والله لو خليت لخربت فيه بنات أصول ماتدرين وش تقولين وش تخلين من شدة احترامها مع اهل زوجها ... وفيه العكس أهل الزوج ممرمطينها ... يعني كل الأنواع موجودة لكن هلفئة انتشرت بشكل كبيييييييييييير ... انا وحدة من الناس اول ماتزوجت توني ماعرفت خير حمولتي من شرهم جتني نصاايح بالهبل وتحذيرات بلهبل عن اهل الزوج بسم الله انا داخلة على وحوش؟ داخلة على غابة ؟؟ انتو عرفتوهم اصلا عشان تنصحوني هلنصايح .. ولما كنت اعترض يضحكون علي !! .. للأسف البنت عندنا تتبرمج من قبل لاتتزوج على انه من اول يوم تدخل بيت رجلها لازم تثبت نفسها ولازم تستميل زوجها لها وتتملكه ولاتخليه يجلس مع اهله كثير عشان مايقلبونه عليها !!! ولازم حمواتها يغارون منها ولازم ام الزوج تأذيها والخ !! لييييييييييه ؟!!!