اتمنى الدعاء لي ومساعدتكم

صباح النور والنوير ..شخباركم ياحلوين؟
مدري هالمكان مناسب اطرح موضوعي اولا ..ومالي بعد ربي غير منتداي الحبيب افضفض واخذ اراء عضواته الفاضلات واتمنى اللي عندها تدعي لي واللي عندها رد سلبي تحتفظ فيه لان الواحد فيه اللي كافيه ..
موضوعي فضفضه واللي عندها حل تطرحه لي ،،
انا عندي طفل ٥سنوات فيه تشتت انتباه وفرط حركه وعنيد جدا وياخذ جلسات لهالشي بالاسبوع ٣ مرات بأختصار جدا صعب التعامل معه دخلته روضه ماجلس الا٤ ايام وطلعوه.ثاني شي عندي بنت صف اول ماحكي لهم الضغط النفسي والتدريس واستيعابها تقدرون تقولون بطيء شوي اتعب معها واختبارات وتقويم كل شوي .غير ان عيالي يبون مراقبه بالحمام بالاكل بكل شي يعني الحمام تكرمون يسوون ومايغسلون نفسهم ولا الحمام لازم اراقب تعبت اوقف على روسهم واعلمهم واشرح لهم الطريقه لكن ابدا مافي فايده والاكل كل واحد يبي نوع معين واذا اكلوا مايحطون القراطيس بالزباله كرمتوا مع اني انبه واحط بكل مكان سطل وكيس وابدا مافي فايده قسم بالله كأنهم عن ١٠ اطفال وهم ٢ بس الاثاث دمروه والكنبات ماعاد عندي ولا حتى تحف ليل ونهار لازم افهم واعلم وكل لعبهم صراخ ومضاربه 💔والله العظيم يابنات اني تعبانه نفسيتي بين تدريس بنتي ومراجعات ولدي وتدريباته بالبيت والتنظيف والطبخ اعتزلت الناس بسبه ولدي اذا رحت لاحد صياح وصراخ مايخليني اتهنى يتضايق من الناس وماعندي ماده اجيب شغاله حنا يادوب نعيش انفسنا 😔وتعبت من شرهات امي تشوف وضعي كامل وتشوف بعينها ولدي وش يسوي اذا طلعنا مكان عام والا تلح علي تبي نطلع مطاعم وكوفيهات اقولها تعالي انتي احسن ببيتي ع الاقل يكسر يخرب بيته يعني تقول لا نبي نطلع واذا رحت عندها صراخ وصياح ويخرب تنقهر امي منه وتضربه 💔صرت يابنات ماعرف ارضي مين احس نفسي تايهه نسيت نفسي اعتزلت حتى صديقاتي وماعندي الا اخت وحده مومتزوجه يعني مافي يد تعاوني تطبطب علي ماقول اني ارمي مسؤولياتي ع احد لا بس ودي بشخص حواليني احس اني وحيده متحمله كل شي على راسي خاصه ولدي متعب حيل وطلباته كثيره وصعب السيطره عليه لما يشوفني تعبانه يقول بزعج بقهرك واشياء كثير لدرجه من ضمن العلاج اللي قالت الدكتوره اني مهما تنرفزت وتضايق ما ابين له حتى بملامح وجهي ..وغير كذا معاي ضغط 😔نفسي يوم اجلس اكل او اتقهوى واروق بدون ازعاج عجزت ماعندي وقت لنفسي ابد ..وزوجي دايم برا البيت حتى الاكل نادر ماياكل معنا البيت للنوم عنده وكل ماشاف اسلوب من عياله غلط قال علميهم ..طيب تعبت اعلم وافهم والواحد مو دايمه له صحته يوم اكون تعبانه بضل اطارد وراهم شيلوا قراطيسكم ضفوا العابكم اغسلوا وصاختكم تعبت يابنات حتى البكاء ودي ابكي اخفف عن نفسي ماقدرت 💔اشوف اطفال قرايبي مرات اذا تكلمت معهم احس اني اتكلم مع شخص يفهم ويقول طيب وزين وخلاص مايعيد التصرف. عيالي لا اتكلم ماينفع ..وزوجي مرات اتكلم عليه يطنش واقوم واسكت واروح اشوف لي شغله تلهيني💔😭والله اكتب لكم ودمعتي بعيني اتمنى تدعون لي ان ربي يشفي ولدي لان بجد تعبانه حيل