بسم الله الرحمن الرحيم
اتمنى من الله عز وجل ان يرزقنا بالذريه في القريب العاجل بإذن الله
كنت اراقبكم من بعيد واتأثر من قصصكم واحزن حزن شديد لدرجه اطبقها علي
بسرد قصتي ومعاناتي اللي شفتها وبطول عليكم شوي وبختصر اشياء كثيره علشان ما تملون
في البدايه كنت احسب كل شي يجي بالساهل وماكنت اعرف ان مشوار العلاج طويييييييل
طبعا تزوجت من ثلاث سنين وكنت صغيره ومااعرف وشو حمل ولا كنت ابي احمل كنت ابي استانس وبس
اول شهر زواجي حمل واجهضت وكنت عادي مبسوطه
مرت بعدها سنه و3 شهور وحملت وكنت هالمره ابي هالحمل ومتانسه فيه لكن في شي بداخلي يحسسني انه ماراح يتم الحمل وكأنه حلم متى افيق منه
وفعلا على الشهر الثاني توقف نمو الجنين واجهضت طبعا بقيصريه مدري ليه لعبو فيني كذا مع ان الموضوع ما يحتاج قيصريه قالو بيسحبونه بمنظار
كل ما اتذكر هالأيام تخقني العبره وابكي اه الله يصبرني
بعدها جلست سنه بدون اي حمل وكل ما تتأخر الدوره احلل وأتوهم اني حامل لكن الله بيده كل شي وما نحن الآ عبيد ما بيدنا الآ الدعاء
بعدها راح زوجي يكشف طلع عنده حركه الحيونات المنويه بطيئه مع قله عددها وتشوهها
كل مانروح مستشفى يقولون لازم حقن مجهري وانتي صغيره والعمليه راح تنجح بإذن الله
الحمد الله كل مااكشف في كذا مستشفى يقولون انتي سليمه 100% الحمد الله على كل حال
بديت كورسات العلاج طفل الأنابيب بعد رمضان و الحمد لله تسهل كل شي وكنت على قوله الدكتوره متقدمه علميا.
كتمت موضوع طفل الأنابيب ولا قلت لأحد
سحبو كميه بويضات وكان السحب ممتاز وكنت متفائله جداا والترجيع كان ممتاز لأن الأجنه كانت من الدرجه الأولى المتقدمه وجاهزه للإلتصاق
انا وزوجي طايرين من الفرحه كأني صدق حامل
اخترنا اسمائم وتخيلنا شكلهم
وجاء يوم التحليل وانصدم بالخبر (مافي حمل) بكيت بكاء لدرجه اني صرت مو مستوعبه لنفسي (اللهم أجرني في مصيبتي واخلفني خير منها )
آه كل احلآمي راحت تخيلت شكلي وانا حامل تخيلت كيف العبهم واضحكهم
الدكتوره بكت ماصدقت ان مافي حمل
طلعت من المستشفى بدون اي شعور وزوجي باقي عند الدكتوره وانا برى ادور السياره وامشي مثل الي فاقد عقله !!
رجعنا البيت وكان اسبوع مليء بالأحزان زوجي متماسك ويحاول ينسيني وقال خلاص بنسافر وننسى
فعلا سافرنا واستانسنا وغيرنا جو
رجعت عند الدكتوره بعد شهر وقالت لازم تعيدينها باقرب وقت اول ما تجيك الدوره تعالي
قلت خلاص ماراح اعيدهاا ما اتحمل الفشل
قالت بنسوي المره الجايه ثقب في جدار الأجنه او ترقيقها بالليزر وان شاء الله يصير حمل
اقتنعت وقلت بعيدها لأني طفشت من الناس ماحملتي ليش ماحملتي وكل الي حولي حوامل وعندهم اطفال مافي الآ انا
صرت انا في نظرهم اني ما انجب لأن سبق وصار حمل يعني زوجي سليم ومافيه شي ومقدر اقول لهم عن زوجي وش فيه
قلت يابنت خليهم يفكرون زي ما يبون
بديت للمره الثانيه كورس اطفال الأنابيب
وهالمره حماسي مو مثل المره الأولي بس كنت حذره في مشيتي في اكلي وشربي
كنت احاول اتبع التعليمات بحذافيرها ومتوكله على الله كنت ادعي في سجودي ان ربي ما يرد دعاء وان يحقق مرادي
الى ان جاء امس السبت كملت 15 يوم بعد إرجاع الأجنه نزل دم بني طبعا عرفت ان
مافي حمل وموعد التحليل يوم الثلاثاء الجاي
بس ماقدرت اقول لزوجي سبحان ربي نزل علي الصبر وكأن مافي شي عادي ولا كأن سويت عمليه على ان هالمره تعبت في العمليه .
صحيته لدوامه وقلت له وش رايك نحلل اليوم قال خلاص بعد الظهر اجيك نروح نحلل وهو مره مستانس
انا بعدها رحت انام وجا عندي الظهر قال يلا نروح وشفته طاير من الفرحه ماقدرت اقوله انه نزل دم قلت نروح بالليل احسن
جاء الليل وجاب عشى معه وانا ظهري يوجعني ماقدرت اقوم من السرير قال يلا قومي نتعشى وبعدها نروح نحلل
قلت لا مابي هو سمع نبره صوتي حزينه قال وش فيك قلت مافي شي ابي انام وبس قال لا فيك شي قولي قلت نزل دم يعني الدوره جات هو انصرع مسك جواله وكلم الدكتوره وقال لها قالت هي خلها تستمر على المثبتات الين بكره وتجي .
هو جا عندي وقعد يبكي انا ماقدرت اقول شي دخلت راسي داخل المخده وبدت تنزل دموعي وهو متأثر مرررره اول مره اشوفه كذا جلسنا على هالحال ساعه.
قمت وقلت له هذا قضاء الله وقدره ليه هالحزن الله لا يجيب اكبر قام يقول انا ابكي علشانك قلت من ناحيتي انا مرتاحه وحاسه ان ربي بيفرجها علي عن قريب.
رحنا المستشفى وحللنا رقمي وجلسنا ساعه رحنا نسأل عن نتيجه التحليل.
اعطونا الورقه وقريتها مكتوب نيجاتف يعني مافي حمل هو يقول ليه ماطلع ارقام مو احنا مسوين رقمي شوي اناظر التاريخ الاقيه تحليل قديم له 3 اشهر قلت له ورجع له الأمل مره ثانيه وقال حمل ان شاء الله حمل
رحنا قلنا لهم هذا التحليل قديم قالو انتظرو ساعه ثانيه قال زوجي اجل طولو اكيد حامل مرت ساعه ثانيه قال بروح آخذها قلت بنتظرك رجع عندي ووجه اسود وعيونه مليانه دموع عرفت من غير ما يقول مافي حمل .
رجعنا البيت والطريق كل ماله يطوولو وساكتين وكل واحد فينا سارح بهمه وفكره دخلنا البيت وراح المجلس وانا رحت الغرفه قلت اخليه لوحده شوي و جيت عنده ومازالت عيونه مليانه دموع حاولت اضحك واسولف رغم الألم الي بداخلي مثل النار حاولت ابين له اني مستانسه والوضع عادي
قاعده اهديه وانا ابي من يهديني لكن بعدها جلس ساعات يفكر ويفكر الين ناااام
وانا الحين اكتب لكم وابيكم تخففو عني لأن مصدومه وحتى الدموع في عيني متحجره وقالت الدكتوره اجي بكره وانا ماكملت المثبتات لأني مابي اضحك على نفسي وعارفه ان مافي حمل
وهو قال خلاص مافي عمليات ولا شي انسي نسوي عمليه
انا وكلت امري لرب العالمين
حبايبي وش الحل كيف اخلي زوجي ينسى ونبتدي حياتنا من جديد
البيت مليان حزن
//
طولت عليكم :44:
,,البارونه,, @albaronh_4
عضوة جديدة
يلزم عليك تسجيل الدخول أولًا لكتابة تعليق.
BSMAH90
•
الله يعينك ويرزقك ان شاء الله وماراح يزيح عنكم الهم والحزن غير الله فارجعي لربك انتي وياه وصلوا وادعوا واستغفروا في كل وقت وبدون لا كلل ولا ملل وخلوا حياتكم مليانه عباده وذكر وصدقيني راح تشوفون النور في بيتكم راح تجيكم السعاده من كل مكان وابشروا بالرزق من حيث لاتحتسبون الله سبحانه وتعالى ابتلاكم ليمتحن صبركم فلا تجزعون وتضيعون الأجر عليكم.......الأمل بالله كبير والله سبحانه عند حسن ضن عبده به..........وبالتوفيق ان شاء الله
BSMAH90
مشكوره حبيبتي والله يسمع منك
الحمدالله مداومه على الأستغفار والقرآن والصلآه في جوف الليل يارب يفرج لنا في القريب العاجل
مشكوره حبيبتي والله يسمع منك
الحمدالله مداومه على الأستغفار والقرآن والصلآه في جوف الليل يارب يفرج لنا في القريب العاجل
الصفحة الأخيرة