اتمنى قبل ما اموت اجرب هالشعور

هاذي ثاني مره اكتب عن معاناتي وترددت اني اكتب لكم  من باب الشكوى لغير الله مذله بس والله ماكتبتو الا من قهري واحس اني بنفجر من كثر ماتحملت المره الاولى كتبت موضوع في هالقسم وكان مختصر وانتقل لقسم التغذيه ومالقيت تفاعل كثير واتمنى هالمره يبقى في هالقسم يمكن القى حل او دعوه طيبه ومنها افضفض لان ماعندي احد احكيله غيركم
وادري انكم مستغربين من عنوان موضوعي بس اذا قريتو قصتي بتعرفو قد ايش كنت اعاني
انا من صغري كنت هاديئه ومااتكلم كثير دايما ساكته واذا حاولت اتكلم القى نفور من اللي حولي كنت دايما في حالي واي احد يقدر يغلط علي وما اعرف ارد ومع هذا كنت محبوبه ادري بتستغربون بس لي جاذبيه ومابغى امدح نفسي بس ملامحي حلوه وادري الشكل مو كل شي لكن الحمدلله عندي كاريزما مثل مايقولون 
لكن هالشي ضرني اكثر مانفعني الكل يحب يتعرف علي بس مثل ماقلت اول شي بمجرد مايقربون مني ينفرون 
والسبب ريحة فمي 
والله اني اخجل وانا اكتبها وانقهر 
سرقت مني احلى سنوات عمري 
صح عندي صديقات اوفياء ورضيو فيني والسبب شخصيتي بس انا اتهرب منهم كثير وما احب اقابلهم
كبرت وكبرت معاناتي بدايه من تعليق اخواني وبعدي عن الجلوس معاهم او حتى انا اشاركهم في اي سالفه يفتحوها اجلس معاهم واتكلم بطلاقه بس بمجرد مايجلس معايه احد ويقرب مني اتلعثم وافقد ثقتي بنفسي 
انخطبت كثير ووافقت  على  واحد فيهم  بعد ضغوط من اهلي وكان  اقل مني من جميع النواحي بس كنت راضيه اصلا ابغى ارضي امي وكنت خايفه ثاني يوم يطلقني 
كنت انا وياه عادي في البدايه ومع اول مشكله
 قالي انتي من برا الله الله ومن جوا يعلم الله 
ما اقدر احكيلكم كيف كان شعوري اصلا كل ماتذكر ابكي مع انو مر على هالكلمه سنين بس لليوم مجروحه 
مرت سنين واالحمدلله حبني وصار يشوف محاسني بفضل الله وينسى عيوبي
وعمري مافكرت اذا كنت احبه او لا 
بس كنت اقول كويس انه راضي فيني
جبت اطفال وهم اجمل شي في حياتي 
كبرو وزادت معاناتي اتذكر ولدي الكبير مره ابوه شرا عطر قلت مو حلو قال ياماما حلو عطر بابا احلى من ريحة فمك
سكت وسكت زوجي وسويت روحي ما اسمع بس تمنيت ان الارض 
انشقت وبلعتني وعيالي لحد اليوم اذا قربت منهم يغطو على انفهم 
شعور صعب اعيشه كل يوم اعاني 
وكل لحظه اتعذب حتى في صلاتي أذا رحت مسجد اصلي لحالي عشان مازعجهم بريحتي واذا قربت مني وحده وصلت معي اقعد اكتم نفسي عشان لا اضايقها 
ادري تكلمت كثير بس ودي افضفض وهالشي جزء بسيط من معاناتي 
وعارفه بتقولو ليه ما تتعالجي يشهد علي ربي اني سويت كل شي مفروض اسويه من عنايه وروحه للمستشفيات بدون فايده وتحاليلي سليمه وجربت اشياء طبيعيه بس برضو مالقيت نتيجه وبلعت في هالحبوب والمضادات حتى قلت بس وماخليت شي طبيعي ولا طبي الا جربتو وللامانه فلاجيل وهو حبوب خفف منها شوي بس اتعبني وخلا نبضات قلبي تزيد وكنت احس بتنميل في جسمي 
والحمدلله ماعندي مشاكل باسناني ولا الجيوب الانفيه ولا اللوز ولا معدتي وكلهم كشفت وسليمه بس عندي انتفاخ وغازات
وماعندي مرض روحي لاني مره مرضت ورحت شيخ وقالي عندي عين وحسد والحمدلله  تعالجت
والحين امنية حياتي قبل ما اموت اجرب شعور انو ماعندي ريحه واتكلم بثقه اتمنى القى احد عاني مثلي واتعالج اتمنى اذا ربي ماكتبلي شفاء منها اتقبل وضعي واتعايش مع مشكلتي وارتاح وتخف حساسيتي من هالمشكله
ادري طولت وكللامي مومرتب بس سامحوني ..