اتهام وظلم وكذب لكن ربي يمهل ولا يهمل

سلام عالجميع ..
تعرفون المثل الي يقول عقرب من تحت التبن الحين عرفت المعنى الحقيقي للمثل لان الدغتني هالعقرب وانا بغفله
الدوام ومشاكله اسمع فيها وش كثر لكن الحمد لله ماقد تعرضت لاي مضايقات او حسد او تفرقه او اواو ...الخ
قصتي تبدا من اول يوم توظفت في عياده صغيره عدد مافي من الطاقم السعودي (اناث) الا انا وهالموظفه الي بمسمى اخصائيه الاجتماعيه
انا علاقتي فقط مع المرضى وشغلي بعييد البعد عن شغل الاخصائيه وبعيد عن الكمبيوتر , يعني ع عكس شغلها
وكذلك الراتب راتبها اعلا من راتبي لكن الحمد لله اقدر اقول انا مرتاحه بالراتب وراتبي ع قد شغلي واكثر
تميزت بشغلي , تميزت عند المدير , كافائني بزياده في راتبي مع شهاده توفيق , وعلق اسمي ع لوحه المتميزون
وكان اي احتفال او قدوم وفد او ضيوف للمدير يطلب مني الظيافه وتنسيق الطاوله والحمدلله دايم ابيض وجهه ودايم يشكرني
وبفضل من الله كسبت المرضى والاغلبيه حبوني كنت اقدم لهم المساعده بكل روح نقيه وابتسامه وكل مريضه لازم اصبح عليها واعطيها جرعه تفائل

خاصه كبيرات السن ملكتهم بحب وعطوني السعاده والاجر وشي عظظظيم انك تدخلين ع المسلم فرحه وتفرجين همه فمابالك بالمرضى الي لاحول لهم ولا قوه
كنت اطلع للدوام متفائله لان اعرف الي راح يصبحون علي بدعوه من قلب تثللج الصدر ,
# هذي نبذه بسيطه عني وعن شغلي
في يوم استدعاني المدير وقام يتكلم ويتهمني اني مقصره في شغلي وقال هذا انذار ثاني ( كيف مقصره في شغلي وانا ماتغيرت بشغلي وكيف يكون انذار ثاني ومافي بالاول انذار اول او تلميح )
يعني فجأه انقلب المدير علي وعطاني انذار ثاني وقال الثالث تمسكين الباب انا مثل المصدومه وش الي صار واقوله فهمني وش مقصره فيه علمني يمكن في شغله سويتها عن خطأ رفض وقال انتي ادرى شوفي وش مقصره فيه وارجع اقوله انا ماقصرت وواثقه بنفسي وشغلي بس فهمني وش الي شفته علي مقصره في رررفض الا بحاله وحده انه يرفع خطاب لجميع المدراء ويكتب عن الاتهام الي اتهمني فيه والتقصير
كان يقولها بعين قويه وعين تحدي انا مابيدي شي الا اني ادافع عن نفسي ولانه هو المدير ماني قده ابداً لان بساعتها يقدر يفصلني طلعت من مكتب المدير واول مانزلت للغرفه قعدت اصيييح اصييح من الاتهام الباطل شافتني الاخصائيه وسئلتني وعلمتها تعرفون شعور المظلوم الي اصدر الحكم عليه وهو مايدري وش جريمته شعووور قااااتل شعوور يذبح يبي يطردني ويقطع رزق ع اتهام مبهم حسبي الله وكفى
مرت الايام واستقال المدير وصار بيني وبين الاخصائيه سؤ تفاهم انقلبت علي وطنشتها وتجاهلت وجودها واهم ماعلي شغلي والمرضى ردينا وتصالحنا لكن النفوس مش ولابد
انا اعتبرها زميله عمل علاقتي تنقطع فيها خارج العياده كانت تتسلف مني ومرات تعطيني ملابسها اضيقهم لها عشان ماتدفع للخياط وتتخسر كانت مستفيده مني بكل شي وهي شخصيه فضوليه جدا والشي الي مايعجبها من مرضى او اداره او تمريض تفضحه وتتكلم فيه
تبي تعرف شلون علاقتي مع اهلي ومع زوجي وكيف نظامي معه يتغدا يتعشى اذا اخذت اجازه وسافرت ارجع هي منتفخه لانها تبيني اعطيها خبر بكل تفاصيل حياتي مع هذا هي تسافر وتاخذ اجازات اكثر مني لكن ماهمني وين تروح وين تجي وكانت تدرس حالات المرضى واذا جت عندي تفشي سرهم وكانت مريضه بتشكي عليها لانها تفشي اسرار المرضي ( مسمى الاخصائيه تحافظ ع اسرار المرضى ولا تطلعهم لاي احد كاااان )
الحااااصل والشي الي اوجعني وصدمني الاخصائيه هذي تهاوشت مع مرافقه كانت تبوح لها بكل شي المرافقه خذت رده فعل منها واستدعتني وصدمتني بكلام كبييير
تقولي هذي المرافقه احذري منها لانها تبي تطيرك وسالفه الشغل والانذار طلع من تحت راسها تجي للمدير وتتهمني وتلفق علي اني ماقوم بواجبي وشغلي وكل يوم تعطي المدير من الكلام الكذب ضدي لين صدق المدير وعطاني انذار وكانت تتهمني عند المرافقه انها تقوم بشغلي وتلعب دور المظلومه والاجازات الي اخذهم والاوفات تنحمس لا اخذتهم ولا عطيتها خبر
طووول هالفتره وانا مغشوشه فيها كنت اسولف واضحك معاها وقهوتنا وفطورنا مع بعض
وكانت تقول للمرافقه انا اسوي كذا عشان اتقرب من المدير ويرفع من ادائي الوظيفي ويميزني عشان الترقيه
( المرافقه من نفس القبيله وكانت معاها قلبا وقالبا لكن خيره الهوشه الي صارت فضحت سرها) وانا كنت مغفله ولا ادري وش تدبر من وراي
انا للحين مصدومه واتحسب عليها كانت تدس لي السم تبي تطيرني كلها من الحسد والغيره لاني متميزه
فعلا هي العقرب والحيه لئيمه لابعد درجه
ابي انتقم منها وابي افضحها عند الي اتهمتني عندهم وشوهت صورتي لكن كيف ,؟؟؟
رجاءً لاتجيني وحده وتقول سامحيها هالاشكال خرابه وصلت لمرحله الحسد لانها مريضه نفسيا والمريض هو الي يبتلا بالحسد والكذب
وسامحتها قبل فتره بمشكله تافه اما الحين انا بتحدي مع نفسي يا انا ياهي واقسمت بالله ان هالسالفه والكذب والاتهام مايروح عبث اني لا افضحها
الله يرد كيدها بنحرها ويجعل دائره السوء عليها والله لاسترها دنيا واخرها
انا راح اواجها مع المرافقه واحجر لها لكن قبل هذا ابي خطه ابي حل اسويها قبل لا امسكها واشرشحها ابي اللعبه الي تلعبها ضدي تنقلب عليها
انتظر ارائكم ....