اجهاض منتصف الحمل ، ارجو المساعدة

السلام عليكم
اولا يعطيكم العافية على جميع النصايح اللي تقدموها ، والله يكتب لكم الاجر ان شاءالله ، كذلك الشكر موصول للقائمين على هذا الموقع


مشكلتي بإختصار انا متزوجة من خمس سنوات ، والحمدلله حملت ثاني شهر من زواجي طبيعي وكل شيء ولله الحمد طبيعي ، ثاني شهر من الحمل بدت تنزل علي قطرات بسيطة من الدم ، صرفت لي الدكتورة مثبت دافستون ٤ حبات في اليوم ، خف الدم بس ماراح تماما يعني يرد يومين ثم ينقطع اسبوع وهكذا ، زوجي اصر نغير المستشفى ، رحنا ٥ مستشفيات خاصة وكلهم استشاريين اللي كنت اكشف عندهم ، قالوا وضعك طبيعي بس ريحي ، وصلت الاسبوع ٢١ تقريبًا الشهر الخامس كنت تعبانة قبلها بكم يوم عند زوجي عزيمة وبذلت جهد ، بعدها بأسبوع حسيت بآلام اسفل بطني وظهري ومغص توقعت شيء عادي ، خاصة انه اول حمل ، الفجر كنت في المستشفى وبعدين ولدت ولادة مبكرة على ٢١ اسبوع وعاش الجنين يوم ثم توفى ، الله يجعله شفيع لي ولأبوه ، مرت سنة وماصار حمل بسبب كثرة التفكير خاصة أنه الفحوصات لي ولزوجي الحمدلله ممتازة ، صار عندي ظرف يخص اهلي وانشغلت عن التفكير في الحمل وسبحان الله بالشهر اللي مافكرت ولا خططت ولا حسبت صار حمل ، بعدين توقف النمو على ٥ اسابيع يعني شهر ونص وصار لي اجهاض منسي ونزل بعدها بأسبوعين ، بعدها تعبت حيييل نفسيتي وكذلك زوجي ووصلت بيننا المشاكل لحد الطلاق ، بسبب كل واحد فينا يلوم الثاني على وضعنا ، بعد ثمان شهور قررنا نحل المشاكل ونؤمن ان هذا قدر الله ونرضى فيه ، ونبدأ نحاول ، حاولنا طبيعي مدة شهرين ماصار ثم قررنا يصير تلقيح صناعي مرتين أيضا ربي ماكتب ، فقلنا نسوي انابيب ، اعترضت دكتورتي لان الحمدلله مافينا شيء بس اصرينا ، تكون ١٦ جنين ٩ منهم درجة اولى ، رجعنا ٢ ماصار حمل ، ثم ٣ ماصار ايضآ ، ثم ٣ وحملت بإثنين ولله الحمد ، والارجاعات كانت تباعًا شهر بعد شهر ، وطبعًا هالمرة كنت اخذ دافستون ٨ حبات في اليوم وابرة تثبيت وسيولة كل يوم ولبوس بايوجست ٤ ف اليوم ودريب مناعي مرة في الاسبوع وحبة اسبرين وحبتين كورتيزون في اليوم وسويت ربط في الاسبوع ١٢ وكل شيء تمام ، لين وصلت الاسبوع ١٦ وفجأة حسيت بألم ومغص رحت اكشف على طول وكانت الصدمة الرحم انفتح فوق الربطة ، مع اني مسوية ربطة دبل ، ومرتاحة طوال فترة الحمل في السرير لدرجة غير خدامتي وعند اهلي زوجي جايب لي ممرضة لكن سبحان الله ، لا ينفع الحذر مع القدر ، تطور الامر الى طلق قوي جدا اضطروا معه يفكون الربط ، وولدت توأم ولد وبنت كانوا احياء اسأل الله شفاعتهم لي ولزوجي ، حاليًا مرت سنة وافكر في الحمل بس خايفة وزجي صار عنده فوبيا من الحمل ، ولما يصير بينا جماع اسفه ينزل برى خوفا من الحمل ، شنو حل مشكلتي ، انا اعرف الربط مفيد ، بس انا سويت ربطتين ومامنع الاجهاض