اجواء الاختبارات

صباح الخير
انطلقت اليوم وبتمام ٩ صباحا
اختبارات الشهادة الاعدادية لصف التاسع في سوريا
مثل مابيسموها بالسعودية
ثالث متوسط

وهي لي بتحدد مسار الطلاب كليا في سوريا ولهيك الشعب عنا بيعلن حالة الطوارئ الكاملة

بيتم توزيع الطلبة على مراكز امتحانية عشوائية وكل طالب معه بطاقة

الاسئلة بتجي حصرا من الوزارة مختومة وبيتم فتحها داخل المدارس وبيرافق وفد الوزارة سيارات شرطة

المراكز الامتحانية بتكون مراقبة من كوادر بتفرزها الوزارة من غير مناطق

يعني مابتشوفي مدرساتك ولا زميلاتك كلها وجوه غريبة عنك

ومن جديد الوزارة ركبت كاميرات بكل القاعات وربطتها بغرفة عمليات مركزية تشرف عالكل


المجموع العام هو ٣١٠٠ درجة
الطالب لي بيحقق المجموع كامل او قريب منه بيروح بيكمل دراسته بثانويات اسمها ثانوية المتفوقين وبيكون فيها رعاية تامة ومسابقات وبعثات وافضلية

الحد الادنى للقبول بالثانوية العامة هو بين ١٦٠٠ و ١٩٠٠ درجة

بيدخل الطالب ثانوية عامة وبيدرس صف اول ثانوي
بشكل طبيعي وهنيك بيتحدد مساره كمان حسب درجاتهبالثاني ثانوي بيتم فرزه اما ادبي او علمي


ماتحت ١٦٠٠ درجة
بيتم فرزه للثانويات الثانية
وهي الثانوية الصناعية والثانوية التجارية

الرسوب طبعا موجود
لو رسب الطالب بمادتين يعتبر راسب بكامل السنة
ومادة اللغة العربية هي اخطر مادة
لي بيرسب بالعربية يعني راسب بكل السنة حتى لو حقق الدرجات الكاملة بكل المواد

الاجواء دائما متوترة ومشحونة وقدام كل مركز امتحان بتلاقي تعزيزات من الشرطة وايضا من الاسعاف لأنه كثير حالات في طلبة بتتوتر او تنصدم من الاسئلة وبتصيبها حالات اغماء او صدمة

وطبعا الاسبوع القادم كمان اختبارات شهادة الثانوية وهي لحالها كابوس

خبروني شو اوضاع الاختبارات عندكم وبلشت ولا كيف