احاول اخفي حزني عن الحريم ولاني قادرة والله..

السلام عليكم
بالبداية اشكر اخواتي الحكيمات بعالم حواء
اللي وقفوا معي وساعدوني بنصحهم خبراتهم
والله اني ادعي لكم
واخاف اذكر اسم وانسى الثاني
الله يوفقكم ويسخر لكم ازواجكم


انا يا بنات ما اقدر اقول عن نفسي سعيدة او تعيسه بزواجي
علاقتي بزوجي بالفترة الاخيرة مستقرة ولله الحمد
ماعندنا مشاكل ماديه ماشاء الله
وزوجي طيب وعلى نياته.. بس انه حسااااس وعنيد..
واذا على بوصلة الشخصيات.. فهو جنوبي.. وانا شماليه..

لكن في اشياء كثييييره افتقدها.. وهالشيء يتعبني كل ما تذكرته..
مثلا العلاقة الحميمية مع زوجي.. من تزوجته وهو يطول عني بالاسابيع..
رغم اني اعرف انه يحبني.. ورغم اني حاولت معه بكل الطرق..
ولله الحمد مافيني شي.. وسبق وناقشته وقال كذا نشتاق لبعض على طول..
لانه يقول ان اللي يطولون عن بعض تستمر رغبتهم لسنوات..
وانا صرت اضغط على نفسي واحاول اتناسى واحسس نفسي انو الوضع طبيعي..
لكن بداخلي متضااااااايقه قسما بالله.. هالشي حاز بخاطري يابنات..
مو حابه أزن على زوجي بهالموضوع لاننا سبق وتهاوشنا بسبته..
وهو لا عنده سكر ولسى بالثلاثينات.. وعادي عنده شهر مايلمسني..
واللي يقهرني اكثر من كذا.. أنو بالفترة الاخيرة لما اكون متضاااايقه منه ..
يحاول يراضيني بهالشي.. يعني معتقد إن العلاقة الحميمية صارت زي الرضاوه!!!



فوق كذا زوجي يكره القرب..
مايحب احد يجلس جنبه.. مايحب ألعب بشعره..
واذا ضميته يرمي كلام بايخ.. مثل: شوي شوي علي..
او يبعد بسرعه..
ممكن يمر اسبوع بدون حتى قبله عالرأس..
ومن كم يوم لقيته بالبلاك بيري حاط صوره اجنبيه فيها واحد ماسك لوحه: احضنوني مجانا..
طبعا هي صورة استهبال.. بس حزت بخاطري..
حياتنا جااااااافه جداااا بسبته.. رغم اني دايما اقرا واسمع ان الجفاف يدمر الحياة الزوجية ببطئ
هو اعترف انه احيانا يسوي كذا عشان يكسر خشمي.. لاني مغروره بنظره..
استغفر الله العظيم.. ادري تفكيره طفولي شوي للاسف..


فوق كذا وكذا.. تطلع شياطينه لو قلت له خلينا نسافر يومين نغير جو..
يفتعل أي مشكلة او يقول انتي تحسبين الزواج روحات وجيات..
علما بأني ماركبت الطياره من سنتين..
واللي يقصم ظهري ان كل اخواتي وصديقاتي يسافرون مع ازواجهم..
وانا منثبره هنا.. لدرجة اني صرت انحرج منهم واتحاشاهم..
ارجوكم لاتجي وحده وتقول لي اتركي المقارنات.. احنا مو عايشين لحالنا..
الحياة مشاركة تفاعل.. ومحد يحب يصير اقل من غيره..
وانا للامانه مو اقل منهم ولله الحمد..


النقطة الاخيره اني لو اكح يروح يقول لاهله.. ترى زوجتى كحت اليوم..
وياما تفركشت لنا شغلات كثيره بسبه لسانه المنفلت..
حتى اخبار اهلي اكتشفت انها تنتشر بين اهلهم وجماعتهم..
وصرت اتكتم عليه بكثير شغلات.. وهو يقول اني موسوسه!!!
والادهى والامر ان اهله كل شغلهم بالخش والدس..
وهو يقول كيفي ماراح اصير مثلهم.. انا حياتي شفافه للناس.. مافي شي اخاف واخبيه..


اعذروني بنات.. ادري ثقلت عليكم..
بس شايفين هالامور رغم ان بعضكم يشوفها بسيطة
الا انها منكدة علي حياتي فوق تحت..
حتى وجهي دايم عليه حزن.. ما اقدر اخبيه عن الناس..
احاول بس والله ما اقدر..
وعشان اكون منصفه.. زوجي كريم ويحب بيته ويحب اهلي ماشاء الله..
ويحب يشاورني بكل شي تقريبا..
ويهديني من وقت للثاني.. ويساعدني احيانا بشغل البيت..
هذي تقريبا اهم ميزاته.. ماشاء الله تبارك الله..


اللي عندها كلام ممكن يساعدني.. ياليت تفيدني
وجزاكم الله خير..