لا تفهموني غلط ، انا فعلا احب قناة براعم ، لكن عندي أسبابي
ما اقصد اسوي دعايه للقناه، لكني فعلا احب برامج قناة براعم ... يمكن مو كل البرامج ، لكن اقصد منها اللي يظهر فيها الطفل بين اسرته، وكيف يتعاملون مع بعض ، ويبينون انهم عايله متحابه ومتعاونه .. احس ان الدنيا بخير >> على الاقل في عالم الكرتون
، يحسسوني بالسعاده والحنان والنهايه السعيده ، يخلوني انسى الواقع اللي يصير حوليبصراحه انا اتابع هالبرامج عشان اشوف شلون يتعامل الاب مع ابنه وكيف يحاوره - مو قصدي اتعلم منهم، الكتب ماتقصر- لكن اشوف كيف ان الوالدين يستخدمون سياسة اللين والحوار الهاديء... وبكل لطف وحنان .. يبينون للطفل ان الام والاب يحبون عيالهم ، لكن هالشي موجود غالبا في عالم الكرتون ، وقليل جدا على ارض الواقع..
سؤال .. كم مره شفنا العيال او حتى لقينا انفسنا ننضرب او نحصل كلام مثل السم - بغض النظر اذا ارتكبنا خطأ بقصد او بدون قصد - اوعلى قولة الدكتور الثويني : طاقينكم طاقينكم ، لا مفر !! او حتى اذا تصرفنا بعفويه ، وخصوصا جدام الناس .. لازم قرصه من الام من غير ما احد ينتبه ..( عيب لا تسوي جذي، فشلتنا) مع انه طفل !!
الي حاصل عندنا في الغالب : يطيح الكوب من يد الطفل وينكسر ، وما يمديه يستوعب اللي صار الا: طااااااااااخ (يا غبي شوف شسويت).. تحطيم على طول
تدخل الام الى البيت ويركض لها ولدها يقول لها ماما وينج، وترد عليه بالصراخ وكأنه مسوي خطأ!
وفي عالم الكرتون شوفو بدل ما يحصل الطفل ضرب عشان الخطأ اللي سواه حتى لو كان بقصد ومتعمد ، يكلمونه ويفهمون منه ليش سوى هالشي ويقولون له ترى احنا نحبك، يفهمون نفسيته وشنو هو محتاج له ، ويشوفون شنو المشكله، وقمة الاهتمام.. و في النهايه الطرفين راضيين ومتصالحين وبوسه من الام و الاب وحضن دافي حنون .. ونهاية سعيده..
مادري متى بنثقف نفسنا وبنرتقي في تعاملنا مع اطفالنا ،
هالاسلوب هذا وغيره اللي نشوفه غالبا في مجتمعاتنا وغيرها ، اعتقد انه بيسبب عقده في الطفل ، مابيثق في نفسه .. وبيحس انه ولا شي ، طفل كل من يسبه ويصرخ عليه ، شنو المستقبل اللي تنتظرونه له ..وكل هالشي بدافع الحب !! قال حب قال،
يشاكس الولد شوي ، وهذي طبيعة الأطفال منطلقين وعفويين وحركيين ماشاء الله .. وهالشي مب غلط، لكن الام بكل حب وحنان تطقه وتذبحه طق .. الى ان ينام من كثر البكاء ( على الاغلب) وينكسر خاطرها عليه وتبوسه وهو نايم، شنو الفايده؟ !
مهم جدا فهم نفسية الطفل ، وفهم شخصيته وكيف ممكن التعامل معاه ، بدون اللجوء الى الضرب او الصراخ كعقاب!!
في اساليب كثيره لمعاقبة الطفل، من غير اهانته وجرحه ، ترى الطفل مثل الورده ، لو نكلمها بكلام جميل كل يوم تكبر وتنضج ، لكن لو نكلمها بكلمات قبيحه تذبل وتموت .. وجربوها ، مو في عيالكم لكن في الورد
احنا وايد مقصرييييين في هالجانب، مساكين احباب الله ، العصافير الصغيره تنحرم من الحنان ، ليش ما نستقبلهم بالأحضان والقبلات ، والكلام الحلو والهدايا اللي تسعد قلوبهم الكبيرة
وين الرحمه اللي وصانا بها الرسول الكريم صلى الله عليه وسلم .. لما جاءه رجل وشافه يقبل الحسن والحسين واستغرب من هالشي .. فقال له حبيبنا صلى الله عليه وسلم : " وما أملك إن كان الله نزع منكم الرحمة" او كما قال صلى الله عليه وسلم
مرات اقول ليش الاطفال يعيشون في الدنيا ، ليش ما يروحون االجنه على طول .. بدال البهدله اللي شايفينها
اطفالنا صارو محبطين يدورون الشي اللي يأنسهم ويفرحهم في كل مكان ، اكثر شي يأثر فيني منظر طفل يبكي عشان امه اللي ضربته لانها تحبه وتخاف عليه ، وماتعبت نفسها في يوم وتعلمت وقرأت كتاب عن تربية الأطفال!!
الأطفال مرآة لأهلهم .. اللي يشوفونه من اهلهم بيتعلمونه ، لا تحاول تصلح طفلك اذا انت مو قادر تصلح نفسك .. مافي فايده .. غالبا الطفل يشوف امه وابوه قدوه له .. تبي الطفل ما يصرخ اذا يتكلم وانت تصرخ عليه وانت تكلمه؟؟ كيف تصير هذي !
تبيه يكبر صح وانت تستصغره وما تشجعه .. مايصير !!
فعلا اللي عندنا تخصص تحطيم وتكسير مجاديف
. الله يهدينا ويصلحنا وياهم ..دائما ادعي ربي بالذرية الصالحه ، ويقدرني على تربيتهم التربية الصحيحه السليمة، واعطيهم من الحب والحنان اللي يحتاجونه ، عشان يكتسبون الثقه بأنفسهم وماشيين في طريجهم دامهم على الحق،
وادعو ربي انه يصلح حالنا ويكون هالجيل مثقف وعارف كيف يتعامل مع الأبناء ..
سامحوني الموضوع طويل وافكاري متلخبطه .. لكن شيء في القلب وحسيت اني احتاج اطلعه و اقوله ..
كتبت هالموضوع على اللي اشوفه ، الا اذا انتو تشوفون شي ثاني ، اتقبله منكم برحابة صدر وسعة.. والحمد لله رب العالمين