احتاج مساعدة يا اخوات>>كيف اجعل مشترياتي تناسبني ؟؟؟

السلام عليكم ورحمة الله وبركاته

كيفكم يا صبايا ، تقبل الله طاعاتكم وكل عام وأنتم بخير

خواتي : انا معلمة ولله الحمد مشكلتي اني قد ما اشتري

من ملابس أو ساعات أو أغراض احس اني لما البسها

تطلع مو حلوة علي رغم ان كل أغراضي ماركات

ولما اشوف قرايبي وقرايب زوجي وزميلاتي في المدرسة ما شاء الله يطلعون كشخات باسم الله عليهم الله يهنيهم ولا يضرهم

بالرغم أن اغراضهم عادية ، احيانا أقول لأَنِّي نحيفة قد ما اشتري لو وش فخامته وماركته ما يضبط علي

وأحيانا أقول لا مو هذا السبب فيه قرايب وزميلات لي نحاف ومع كذا

ما شاء الله عليهم اذا البسوا ودي بس اطالع فيهم الله لا يضرهم

، وأحيانا أقول لأَنِّي عشت يتيمة واخواتي كبار مو من نفس عمري اولادهم هم اللي من نفس عمري فما احد علمني من يوم كنت صغيره على الاهتمام صحيح ما أنسى فضلهم بعد الله في كل شي لكن احس بنقص في هذا الشي

ما أظن إن احد يشتري أغراض مثل اللي اشتري بس ما ادري ليش ما تعجبني لما اجربهم وأحس اني اتحطم

أقول في نفسي الحمد لله ميزانيتي تساعدني اني اشتري اي شي ابغاه ما شاء الله لكن مع كذا اتحطم لما أجي اشتري ونفس الشي مع أولادي اشتري لهم ملابس ماركات

ومع كذا اذا شافوهم أهل زوجي يحسسوني انا وزوجي ان ما نلبسهم زين رغم الكل يمدح في ذوقي وذوق زوجي

بس زوجي مقتنع ان يوم انا واولادي نحاف ما فيه أمل تزين

علينا الملابس او اي شي نشريه

صراحة مره متحطمة أزعجت زوجي إلا وأشتري ساعة عاجبتني في محل الشائع للساعات سعرها 500 وعليها

ولما شريتها ورحت فيها البيت رميتها في الدولاب على انها تجنن بس لما لبستها ما عجبتني علي

حتى اهلي صراحة تحز في خاطري دائما يقولون عندك فلوس ما شاء الله بس ما نحس انه باين عليك او على اولادك على كثر ما اشري

للعلم : عمري 33 سنة بس اللي يشوفني يقول عمري 14 او 15 سنة لأَنِّي قصيرة وعندي ولدين وبنت ما شاء الله

ووزني 37 - 38 كيلو

اخاف من المتن لأَنِّي قصيرة راح أصير كووووورة



ما عندي مشاكل ولله الحمد في بشرتي صافية وبيضاء

تكفون ما عندي احد أقول له مشكلتي الا خواتي في عالم حواء ابغى حل لها الله يوفقكم