السلام عليكم
اخواتي عندي ثقة كبيرة في وقكم وانا من المتابعات لهالقسم وان كانت ردودي قليلة وبصراحة استفدت كثير من افكاركم على مدى سنوات
واليوم قررت استشيركم قبل انقل على البيت الجديد عشان يوم النقل تنحط كل قطعة في مكانها
اول شي باوصفلكم البيت عشان تكونو في الصورة
البيت عبارة عن دور له بابين باب يؤدي الى مجلس الرجال وهذا ما عندي اي مشكلة فيه
الباب الثاني فيه سيب طوي في السيب غرفة طعام لها بابين بعدين صالة كبيرة حوالي 4 في 6 او اكثر شوي ومقابلها المطبخ وقدام فيه غرفتين كبار 4 في 6 اللي هم للنوم
نيجي الحين للي محتارة فيه
عندي للصالة كنب حرف L وفي شقتي هذه كانت الصالة كبيرة وما كان عندي مقلط او غرفة طعام فتعمدت الصالة تكون مودرن واحط في نفس الصالة طاولة طعام مودرن
الحين بعد النقل بيصير عندي غرفة خاصة للطعام
فبرايكم احط السفرة فيها وهل تنفع تكون مودرن لو هي مستقلة مع العلم هي كبيرة نوعا ما تكفي 8 اشخاص
او اخليها مثل في شقتي هذه يعني الصالة معها غرفة الطعام خصوصا انه ضيوفي قليل واحنا نستعمل السفرة دائما في الغداء والعشاء
زوجي يقول خلي السفرة في نفس الصالة وغرفة الطعام نحطها غرفة العاب للاولاد خصوصا انه ما شاء الله عيالي العابهم كثيرة بس انا قلت انه اخلي العابهم والتلفزيون والبليستيشن في نفس غرفة نومهم لانه الصغار حوسة وبدل تنظيف غرفتهم بصير انظم غرفتهم وغرفة العابهم
السؤال الثاني في المطبخ عندي مخزن كبير وفيه بالوعة هل برايكم ينفع احط الغسالة فيه او غلط تنحط في المخزن واخليها في حمامي افضل مع العلم حمامي مو داخل الغرفة برا وممكن تستخدمه الحريم اذا كانت عندي زيارة
السؤال الثالث البيت كله سيراميك وغرفة الاولاد كبيرة وما اقدر احط فيها موكيت لانه معهم حساسية فهل فيه بديل ممكن يدفي الغرفة ويكون امن هل الباركيه مناسب لغرفة الاولاد او قطع الفلين اللي مثل البازل ملونة افضل
دمعة جريئة @dmaa_gryy
محررة ذهبية
يلزم عليك تسجيل الدخول أولًا لكتابة تعليق.
خليك أول من تشارك برأيها 💁🏻♀️