احتاج مشورة 💔

السلام عليكم
عندي مشكله واحتاج مشورة ناس فاهمه وناصحه و
واكيد انتم اكثر ناس فاهمه وماره في تجارب وواعية واهم شي حاسه فيني
انا متزوجه لي سنتين
بداية زواجي خطبني عن طريق ابوي وابوي وافق على طول يقول شاريه وابيه وصار كلش بسرعه بعد الملكه والشبكة صار بيننا مكالمات وقالي انه كان متزوج وانفصل وهالشي ماكنت اعرفه من قبل وبسبب انه تزوج وانفصل وضعه المادي نازل شوي فعطاني مهر اقل من اي مهر بنت مع انه زوجته الاولى معطيها مهرها وزياده المهم انا رضيت وقلت اهم شي التوفيق بعدها شفت الشبكه طايح كل الكرستال اللي فيها وبرضو الساعه واضح مستعمله سالته قلت الشبكة كانت لزوجتك الاولى قال لا وحلف بالله انه شاريها لي بعدين صرنا نتشاور بالاثاث قالي الاثاث فيه الاثاث اللي شريته من قبل جديد وحاطه في مستودع مايحتاج نشري سكتت انا وجينا للزواج قال مو حاط الا زواج رجال في استراحه وعلى قدنا انا مامعي قلت موافقه مع انه امي كان مرره خاطرها بحفله وتقولي يابنتي لاتنازلين ( وندمانه للحين على اني ماسمعت كلامها ) بس كل كان تفكيري انو مابي اغرقه بالديون ونجلس اول الزواج مطفرين
وطول فترة الخطوبه ماقدم لي حتى ورده بخمسه قلت يمكن ظروفه ومشيتها بعد ماتزوجنا جاه مبلغ كويس هدايا وبيوم زواجنا جواله ماوقف اتصالات من اخته وكان ينزل للوبي يكلم ولا حبيت اتدخل ومن بكرى رحت لبيتي وكانت امي شاريه لي اغراض كثير لبيتي شال هو نصها بسيارته والنص الثاني بسيارة اهله ومشينا ( زوجي وبيتي بمنطقة غير عن اهلي ) وصلوا اهله قبلنا واتصلت اخته قالت بحط الاغراض بالشقه وارتبها قلت لا حطو الكراتين وانا لاوصلت رتبتها ماقصرتي والف شكر ومن هالكلام وكانت تلزم الا بتفتحها ورفضت وصلت ودخلت بيتي ومن بكرى وحنا نتغداء تتصل اخته ويرد يهاوشها خلاص حولت لك الفلوس ومحول لها مبلغ فوق الالفين وبالمقابل ماقدم لي صباحية عرسي ولاحتى وردة سكتت انا ورحنا المغرب لبيت اهله ويوم دخلت للمجلس اصلي تلحقني اخته ماصدقت اسلم واكون وياها لحالنا قالت لي انا اقول لخوي مرتك غبيه شاريه اغراض لبيتها لو هي انا مااشري ولاشي اخلي زوجي يجيب كل شي انا انصصصصدمت وسكتت تخيلو عروس توي داخله عليهم واول مره تقعد معي ومافي اي ميانه وتقولي كذا انا سكتت ولاجبت حتى طاري لزوجي سافرنا ولاحظت عليه اشياء كثيره تزعجني اولها كلش يصوره لاهله لدرجه صورني وانا مادري وارسلها ل امه واخته وتهاوشت معه كلش يقوله لاهله نامت قامت اكلت شربت شرت سوت جيته بالتفاهم احفظ اسرار بيتك ومو كل شي ينقال للاهل تخيلو لدرجه اقوله نتفق الحمل بعد ٦ شهور وراح يقول يمه نخلي الحمل بعد ٦ شهور ؟
المهم غير انه مايحفظ اسرار بيته سكنت بشقه ورضيت ب اثاث زوجته الاولى وبنفس الشقه مكيفات شباك يوم تشتغل وباقي الشهر خربانه والمطبخ قديم حق المستاجر وهو قالي ان مطبخك بالمستودع وبنطلع من الشقه بعد ٦ شهور واركبه
طبعا زيارات اهله اجباري كل اسبوع يغصبني واهلي اقعد بالاشهر عنهم بحكم انهم بغير منطقه مع انه فيه طيران وفي قطار المهم رحت مره وجت اخته قالت من باب السواليف انو ركبت مطبخك في شقتي يجنن احلى من اللي بشقتك الحين انا وجهي تغير وصبرت لين طلعنا سالته انت معطي اختك مطبخي قال ايه وامي معطيها مكيفات السبلت انا انصدمت قلت الحين مخليني بمطبخ متكسر ومكيفات شباك خربانه ومعطيهم اهلك بيتك اولى قال ابعوضك ومن هالكلام وصبرررت تحملت وسكتت على تقصيره وعلى قطات اهله حشمتهم وسكتت عنهم من حشيمته بعد سنه بالضبط وكنت اتفرج انا وياه على صور الشبكه ونتذكرها رجعت سالته قلت الشبكه لزوجتك الاولى قال ايه قلت وحلفت بالله كذب قال مابي اخسرك بذاك الوقت بعدها بكم يوم ضغطت عليه بطلع طفشت ماعوضني ورفض رحت بيت اهلي ٣ شهور وكل مااكلمه نتهاوش قالي اصلا انتي مافيك احترام قلت بعد كل هالسكوت والصبر مافيني احترام لو مافيني احترام ولساني طويل كان حسبتو لي الف حساب انت واهلك تخيلو لدرجه امه تكلمه بالجوال تقوله خل مرتك تجي تمسح بلاط حوشنا قلت له انا مو شغاله قالي امي ماغلطت انتي الغلطانه مع العلم ماخذ قرض يجيب لامه شغاله ومر علي ظروف حملي الصعبه ماعطوني اياها يوم واحد تنظف لي المهم انا رحت لاهلي ٣ شهور وطلبت الطلاق وكنت حامل تدخل اخوي وامي وجاء هو وكلمهم وقالهم لقيت شقه وكذا وبعوضها وافتح صفحه جديده ومن هالكلام ورجعت معه قلت اعطيه فرصه
بشروط انه مايجبرني اروح لاهله - اطلع لشقه جديده او مرممه جديد - يكمل الاثاث يشتري مطبخ جديد وانه يحفظ اسرار بيتنا
رجعت وبدينا بالنقل وتخيلو اني حامل ومشيمتي نازله ولحاااالي اشتغل وهم يعرفون اهله ماساعدوني ولاارسلو الشغاله المهم نقلنا وشرى مطبخ ومكيفات وكلش جديد وبدت امورنا تستقر رحت ازور اهله قالت لي اخته الصحه تحذر من الحمل بزمن كورونا ( تقط علي كلام ) وانا تعبانه من الحمل ونفسيتي دمار صرت ابعد عنهم بالاشهر وامه تحقرص بتعرف كلش ولاقصر هو علمها وش ببطني وش بيسميه لدرجه اتصلت وجت للشقه وانا تعبانه قمت نظفتها وزينت قهوه قبل تجي ويوم دخلت عينها على بطني وعلى الشقه تناظر البلاط والجدران قالت ماعندكم نمل قلت من وين يجي قالت ليه مانظفتي الجدران قلت مافضيت قالت الديكور في جداركم نفس بيتي قلت ايه بحط بعدين فيه زينه قالت بنبره لاتحطين شي هو ديكور خلاص وسكتت انا حسيتها خايفه اخذ من ولدها فلوس للزينه ماصدقت تطلع مع الباب قسم بالله رجلي حمراء وارمه من الكرف المهم كل اهله جاهم كورونا وصارت امه تضغط عليه تعال ود وجيب وصلح بالبيت وهو يقولها انتم مصابين ومرتي حامل قالت كثير حوامل جاهم كورونا ولاضرهم ( مع العلم ان فيني ربو وضيق تنفس ) وداني لاهلي لانه انضغط حيل قال مااقدر ارد امي وبنفس الوقت اخاف انقل لك المرض رحت لاهلي بنهاية الثامن وقالت امي بسوي استقبال وشاريه الاغراض قلت خلاص بساعدك وبدينا يالتصميم على الاسم اللي اخترته مع زوجي فجاءه يدق علي قالي انو بسمي على ابوي قالت لي جدتي سم على ابوك واحي ذكراه واني قلت ان شاء الله ( واسم ابوه من الاسماء القديمه حيل ) قعدت ابكي واترجاه ماابي الاسم وان البر مايكون انك تسمي عليه وهو معند قال لا خلاص واني قلت لاهلي بسمي على ابوي ( طبعاً اي قرار لازم يعرفون اهله واهل امه والديره كلها ) رجعت وعدت كل التصاميم والشغل بالتوزيعات وانضغطت ضغطه حيل وانا بوجهه ولاده وخلصنا شغل الاستقبال ولدت وقمت بالسلامه الحمد لله وجاء مولودي وسماه على ابوه بعدين صرت ماارسل صور ولدي لاحد لاني اخاف عليه جت امه زعلت وسوت سالفه وليش ماترسل مرتك الصور مع العلم انه جاء وشاف ولده وصوره وارسله ل امه وخواته
بس مسكت ليش مرتك ماترسل ولاجوني بالاستقبال بحكم ان الام بالحداد طلعت من النفاس ورحت لهم بحفيدهم وصار عندي شغل مدته ساعتين وصرت احطه عندهم لاني مالقيت حضانه بالساعات وكل ماجيت اخذه يقولون لي ولدك صيوح ولدك صجنا حتى بزرانهم يركضون يقولون نفس الكلام ومره من المرات قالت امه ولدك مايحرك ايده وراسه مادري شفيه رحت للمستشفى على طول شيعوه قالو مافيه شي حتى الدكتور مستغرب يقول الولد مافيه شي تخيلو بالمستشفى انتظار وجوعانه وقلقانه على ولدي ومن المواقف برضو دخلت وعطيت ولدي عمته الصغيره وهو نايم وطلعت اركض اخاف يصحى ويشوفني ويبكي مامدانا نطلع الا اخته الثانيه تتصل تقول يهود انتم ليه ماسلمتو على امي قلت خلاص لا رجعت اخذ الولد اسلم مع العلم زوجي ولا انا كنا متقصدين بس تفكيرهم نجس المهم انتهى شغلي الاسبوعين ولاعاد جبت ولدي عندهم وصرت اطووول مااروح نفسيتي زفت من اللي كنت اسمعه حتى ولدي اخذه القى حفاضته مليانه تكرمون ويقولون صيوح هو متضايق من البلل المهم صرت اطول مااروح ويجيني طراطيش كلام وصصصلت لمرحله ماعاد يهمني جاني تبلد يقول امي زعلانه وانا ماعاد يفرق معي تعبت من اني اداريه هو واهله وانا محد يداريني ولايهتم ولايحس
حتى ذكرى زواجنا كنت انتظره نحتفل وراح يسهر مع ربعه بكوفي بدال مايطلعني لكوفي راح معهم
الحين انا كارهته بشكل ماتتصورونه صرت شخصيه غير ودي اتطلق منه لان احس خلاص تعود على انه يقصر معي ولايعطيني حقوقي ماهمني كل شي بس اللي كاسرني ليه حرمني اسمي ولدي وانا اترجاه وابكي ولاهمه قسم بالله لاشفته ضايق ماتتحرك فيني شعره مايهمني هالشي واذا اهله قطو كلام اتجاهل مو ضعف او مااعرف ارد بس ماتربيت على هاالشي ولا ارد الاسائه بـ اسائه واهله اصلا صرت اجيهم مره بالشهر ( وزوجة اخوهم الكبير مره بالسنه تزورهم )
انا مشكلتي مع زوجي ماعاد اثق فيه ابد يقولي مااقول شي لاهلي ومره يبي يوريني محادثه واشوف مرسل لاخته فيديوات وصور بيتي وولدي ماعاد اثق فيه حتى لابغى يكلم اهله يطلع برى او ينخش بالمجلس والشي الثاني اخاف احمل ويغثني زي ماغثني بحملي الاول يقولهم كل شي ويتدخلون ويحرمني اسميهم مررره ياناس انا كارهته من غير تقصيره معي المادي وكل كلمه والثانيه بعوضك وادري كله كلام ماعدت اصدقه ولا احبه ولا اثق فيه وابتعدت عن اهلي وامي وصديقاتي وحياتي تغيرت صرت بالبيت مااطلع الا نادراً انظف واطبخ واغسل ولاقلت طلعنا قالي اوديك عند لهلي تغيرين جو وهناك اتسمم من كلامهم وارضى اقعد ولا اطلع لهم الواحد يطلع يستانس مو يتنكد
ابي مشورتكم تعبت مررره وامي لو اكلمها تشيل هم وتفكر ويرتفع معها الضغط وهي مريضة قلب الله يحفظها ويطول بعمرها انا نفسيتي تعبانه وكارهه زوجي وخايفه على ولدي لان صار يخاف اذا شافنا ترتفع اصواتنا واذا رحت لاهله اخته ذيك راعية القط ماسلم منها تقط عليه كلام كنت يوم العيد مكشخته وملبسته حتى الساعه قالت وع ماحب البس الساعات ولا البس عيالي قلت كيفك انتي وعيالك شي راجع لك انا ولدي بلبسه الساعه والثوب وكل شي ولا تحترم نفسها وتسكت لا
ارجع ازورهم يجي ولدي طراطيش كلام وانا اخاف يكبر ويعرف وش تقول وينقهر وابوه يقولي لو يرد على اختي ضربته
دايم ادعي يارب تشغلها في نفسها


طولت ادري عليكم بس فيني قهر وابي افضفض وابي مشورتكم
الله يسعد من ترد علي