احتاج نصيحه ومواساه:( وش اسوي

مرحبا كيفكم ان شاء الله زينين ؟؟


انا اشتركت بالمنتدى خصوصي عشان القى لي ناس تقدر تشور علي او تنصحني ابي افهم نفسي شوي


ويلا بسم الله بابدأ قصتي لكم




اولا انا عمري ١٩ بدخل العشرين ثاني سنه جامعه ومتفوقه جدا جدا ولله الحمد ،اصغر بنت فالعايلة من خواتي الثلاث




كنت متربيه في عائله تزرع فينا الثقه وخصوصا ابوي الله يرحمه كان يذبح اخواني الكبار عشان موضوع الدراسه وكبرهم وكلهم صاروا سته مهندسين وخواتي من نجاح لنجاح كلهم ماستر ووحده ترشحت لمجلس الشورى يعني موضوع الثقه كان شي في جميع افراد العايله صغيرنا وكبيرنا ومتفاهمين مع بعض ومرتاحين> انا كمان كنت اشارك فصغري فكل شي بالمدرسه ومسابقات على مستوى مدن واحب نفسي واحب الناس واصدقائي كانوا كثثثرررر


المهم


مشكلتي هي شيئين في شكلي وفي ثقتي فشخصيتي كانسان قد المسووليه وحي


اول حاجه ببداية المراهقه كانت تصيرلي مواقف اتشبه ببنات خايسين وانصدم وفالمقابل اتشبه ببنات قمرررر يعني على الحدين
وقد صارتلي مواقف تشككني في جمال مظهري وعكسها يصير لكن ما تأثرت كثير كنت في اوج ثقتي زي اي مراهقه استمتعت بعمري واصادق شلل وانبسط




كبرت شوي وصرت اول ثانوي ومن هنا بدأت المعاناه:(




خوالي يعتبرون من امراء فخذ من عايلتنا يعني من سخافات القبايل هذي وهم يحبون الهياط وهذي الاشياء فكانوا يغارون من اختي الكبيره لانها مره جميله ويشوفون نفسهم شوي عليها (بنات خوالي الكبار مره) وعلاقة الخوال معنا تزعزت شوي فصرنا نزاورهم من باب توجيب وكذا وعادي نتجاهل بعض الامور


ومن ناحية الكشخه الله يشهد اني اكشخ وحده فخواتي بحكم صغر عمري افهم للهبات واعرف اكشخ




فالمهم صار فيه زواره لاستراحه كبيرة لنا مع خوالي وعندي بنت لخالي تصير زوجة اخوي فكشخت ذاك اليوم وكنت اهبل ومعي اخواتي الثنتين كانت وحده مطوعه دايم تجيب العيد لابس لبس يمشي الحال ووحده مرتبه
وزي ما قلتلكم خوالي يحبووووون الهياط :( الزبده رقصنا وانبسطنا بس اختي المطوعه جابت العيدد بشكل كانت ماتراقص الحريم وترز نفسها ماتعرف لحركات الحريم كانت تراقص البزران ورقص مره يعني دمار:"(


وفي شيء نسيت اقوله خواتي مررررره طيبات ومايعرفون لترزز الحريم وهياطهم


الزبده تجاهلت حركات اختي قلت مو مشكله ياشيخه مافي احد كامل


وطلعنا من ذيك الحفله ورجعنا البيت وانا مبسوطه وحريم خوالي بس يمدحوني ومستانسه
الا فجأه


اخوي اللي يصير زوج بنت خالي سمعته يتكلم لاخواني بالمجلس عنا


اخوي هذا للاسف من الرجال الخيخه يزعل من مرته يمسحها بسابع بلاط ويتذكر اشياء من عشر سنين يتراضى معها يخليها ملكة الملكات ومارح يحصل مثلها يعني ساعات احس فيه انفصام مايثمن كلمته يقولنا اي شي
فا وش صار


فتح جوال زوجته وتفرج قروب خواتها وتعرفون حش الحريم بعد كل مناسبه لقاهم يحشون في خواتي خصوصا المطوعه المشكله اني متأكده انه حش زي اي خوات يتجمعون ويتكلمون يعني مفروض ما يؤخذ بعين الاعتبار
لكن زي ماقلتلكم اخوي خيخه وكان زعلان منها ومتهاوشين يوم قرا هالكلام وليته مسك لسانه وبلعها.... لا جا وسولف لاخواني السب اللي انقال فينا:(


تخيلوا بس كل اخوانك اللي مايعرفون شي عن الحريم ومو مختلطين فيهم يقرون سب شكلك وعن رزتك ومارزتك في اخواتهم من حريم (ماتكلموا عني بس تعرفون الشر يعم) ، فطحنا من عينهم الطيحه اللي ذبحتني فصدري
انا ادري اني لاكشخت اصير اهبل وادري شعري من انعم شعور بنات العايله كانوا اخواني دايم يعلقون عليه وحتى كان اخوي عريس ومره قالي ان عروسه تقول ياليت عندي شعر اختك اللي هي انا
يعني احنا بنات مملوحات نتزين نطلع نهبل والله معطينا عيون حلوه مانستاهل هالموقف من ناس يحبون ( الهياط) انا عارفه انه سخافه ومفروض اخوي مانقله لكن خلاص تحطمنا نفسيا من بعده واللي يقهر ان قال لكل اخواني و قعد مع كل وحده ووراها قلة ادب:( بس عشان زعلان من زوجته


تصالحوا ونسا بس احنا اللي عانينا


اخواني ماعد صاروا يشوفونا حلوات ومبين عليهم نظرات الشفقه وحتى لما احد يمدح مايصدقون فينا ابدا




ومن هنا بدآت العقده لان هذي السنه نفسها توفى فيها ابوي ففقدنا الثقه في انفسنا وفي وجود شخص يحبك ولاينظر لك بشفقه ويعتبرك الدنيا كلها
انا بطبعي يوم كنت صغيره كنت احب اجرب حلويات وامي تدعمني واتذكر ايام بداية المتتوسط ياما تفننت لكن اختي اللي اكبر مني على طول كانت تتحمس اكثر فهالموضوع


ياناس من انا ثاني متوسط ولي دور خاص يوم فالمطبخ اسوي فيه سفرة الفطور بس سبحان من اعمى نظر اخواني ( لا تقولون شفيك اخواني واخواني هم تسعه ماشاء الله وحتى المتزوج منهم يعيش فوقنا بشقق فنعتبر عائله متراصه ولا عندي اب عشان اقول رايهم مايهمني لا صراحه يرفعني وينزلني وياثر علي)




انا احب السنع واشوف نفسي سنعه بس من اختي الثالثه صاروا يعتبروني لاشي والفكرة ان اختي الكبيره المتزوجة كانت حيه وذربه اما اللي بعدها المطوعه حابسه نفسها دايم ماتهش ولاتنش بالبيت حتى مافي احساس بالمسووليه لما احد يحتاجها وتنافخ كثير فحطوها بخانه اللي ماعندها سالفه والثالثه هي اللي انا طريدتها فمنها صرت لاشي وخصوصا اني الاصغر فقليل يعتمدون علي ولانهم اصلا ما فكروا يعتمدون علي هزوا ثقتي بنفسي
مثلا بسوي شي تافه لالا نادوا فلانه تزينه لاتخربه هذي او مثلا لما يكون رمضان يقولون متى دور فلانه ايه الحمدلله نبي نحس بشبع تحسين نفسك زباله ما كأنك بدورك تسوين شي :( وربي يشهد علي اني اتفنن بعد بس خلاص انطباعات خذوها عن كل شخص وصاروا يكررونها من باب المزاح دايم


وامي حتى لما ابي اتفنن فشي تقول لا مابي اطلب طلبات كثير عشان مايخلص المصروف سوي اي شي من البيت وانا من النوع المراعي يعني ماحب اخرب نفسية امي عشان طبخه برمضان ابلع كثير عشان مازعل الناس لان لساني جارح ، فدايما صرت محدوده بطبخاتي لكن اختي اللي انا طريدتها راسها يابس وماشا الله تعرف تحصل طلبات طبخها وتسويها غصب عن امي
فعند اخواني يحسبون انه لان ماعندي سالفه اصلا




ووش صار اختي الثاله تزوجت قبل اسبوع وبقيت انا مع المطوعه اللي اكبر منها اللي ماتهش ولاتنش




فزود على انها قد انسبت مظهريا واخواني يشوفون قد ايش ماعندها احساس مسووليه صاروا يرمون كلام يعور بالقلب


مثلا يقولون يوه شبيصير برمضان راحوا اللي يطبخون يووه من يقوم بالعزايم راحوا الحارات الذربات وربي يشهد اني ياعالم قايمه بحفلة تخرجي مع صديقاتي من الى وكانت شي يشرف وفخم حتى خواتي ماصدقوا اني سويت كل ذا بس لان عايلتي مالهم دخل فهالشيء وحتى عند صديقاتي احل المشاكل واظبط الامور واطلع الفرج من احلك واصعب الاشياء بس اصير فالبيت تنعدم ثقتي فنفسي واخاف اتكلم يقولون تغار من اخواتها يشهد ربي احبهم واتمنالهم الخير


بس اصلا انتو طول عمركم ماتثقون فيني لاني ( الصغيره) فكيف تحكمون علي وترمون كلام مو فمحله وانتوا اساسا ما جربتوني ؟؟؟؟




عاد الزبده انا من بعد زواج اختي الثالثه تعبت نفسيتي كانت عالاقل دايم تقولي انتي حيه انا اعرفك مو زي اختنا المطوعه ماعليك منهم ليش تخلينهم ياثرون عليك وبس ننزل وتبدا مقارانتهم الخايسه معي ويمدحونها تضحك كانها موافقه :(((
ووصلت لمرحله من كثر ما افضفضلها وقفت وخفت تفهمها غيره واتوتر لان مافي فايده بس ابدا اهز ثقتها هي بعد فيني


وبعد زواجها ماعرف شبيصير لي اذا في احد فاهم وضعي يشور علي كيف اطلع من هذي الزعزعه الشكليه والشخصيه والله احب الجامعه لان فيها اكشخ واصور سنابات وانمدح ويوم يصير شي اقوم فيه من الى بس فالبيت احسني صفر عالشمال ولو باتكلم معهم بجديه فالموضوع باطلع جدا مثيره للشفقه او خبيثه غيوره :( مارح يفهمون انه لاتزعزعون ثقتي فنفسي حرام ما كنت كذا كنت انعرف بجرأتي وفصاحتي وحبي للحياه والاصدقاء


اللحين احسب حساب كل شي اقوله ودوري بالمطبخ فرمضان كابوس ابكي لو خرب طبق اعرف شبتكون نظرتهم عني




تعبت ياعالم لاني اعرف اني مو كذا لو اني كذا كان تصالحت مع نفسي وصارلي عالمي زي اختي المطوعه
بس انا انسانه احب الحياه واحسهم يكسرون لي مجاديفي


ونسيت اقول شي جدا يوجع خصوصا للي بعمري وتو تبرز انوثتهم ويعتبرون من الكبيرات وينظرلهم واجسامهم وطلاتهم<<<<<<<<<<<(انا ربي معطيني جسم ولله الحمد اكثر من جميل وهو اللي زايد ثقتي فشكلي)


اختي المطوعه اكبر من اللي تو تزوجت وانتصفت الثلاثين من الله النصيب ماقلنا شي بس اخواني يطقطقون احيانا ان ماراحوا الا الحيات بس انتو الله يخلف :(


يتعبني هذا الموضوع عدم ثقتكم فيني ماتعني اني كذا؛ اكره انحط معها فنفس الخانه لان ادري اننا جدا مختلفات هي ماشاء الله متصالحه مع عزلتها وتكره كل الناس مو فارقه بس انا احب الناس ليش يصيرلي كذا


وبعدين توني صغيره على هذا الموضوع وهذي السيره اخر همي مو من اللحين يشككوني بنفسي ولو صارلي نصيب اكون اصلا ما احب نفسي فكيف بقدر احب احد غيري واتقبل فكرة انه ممكن يحبني ؟؟ اذا اهلي وهم اهلي مو شايفين فيني شي كيف هو بيشوف :( شوروا علي وطمنوني الله يطمنكم ابي ارجع احب نفسي واسوي الشي وانا واثقه فنفسي ولا افكر فردة فعل اهلي مو عارفه كيف :(