احترت بالعنوان بس اتمنى ماتخجلوني

السلام عليكم ورحمة الله وبركاته حبيباتي



اتمنى يكون الجميع بصحة طيبة ، انا متابعتكم كل يوم بس بحكم ظروف عملي مااقدر ارد على كل المواضيع.

انا اليوم مافتحت هالصفحة علشان عندي مشكلة والا خلاف بس لاني وحيدة واعتبركم خواتي فحبيت افضفض وتواسوني لاني زهقت جد وتعبت من حياتي .

انا كتبت اكثر من مره مواضيع وماقصرتو كلكم ساعدوني واليوم انا محتاجتكم لو كلمة لو دعوة بس تهدي بالي.

ياحبيباتي والله مابمدح بنفسي بس الحمد لله ربي عطاني نعم كثيرة مااقدر احصيها لكن للاسف مو متوفقة في موضوع زواج ابدا يابنات خلاص قريب بصير 30 .

قبل كم يوم كنت اتكلم مع امي طبعا مستحيل ابين لها ضعفي ماابي ازيد همومها بس لاشعوريا طلعت مني كلمة وقلت لها ماما راحت العشرينات وبكيت امي ماقدرت حضنتني وجلست تبكي وابوي شافني وتقول امي ذيك الليله مانام يقول لها والله حرام هالبنت مثل الوردة ماابي اشوفها تذبل قدامي ..

الموضوع ومافيه واتمنى تستفيد منه كل بنت لسا في بدايه العمر انا جلست سنين أرفض لاسباب كنت اشوفها مهمة ومن اهمها التقبل والارتياح بس كنت انظر الى الشهادة والعمل والشكل، وماكان يهمني هو وش كثر يبيني وشاريني كنت ادور على واحد انا ابيه ، وبعدين لما مر العمر صرت اقبل اشوف مواضيع الخطبه بعد ترجي من اهلي واخر شى لما كل مره مايصير اتعقد واتضايق وسكرت الباب نهائي وتخيلو بعد كم سنة لما اهلي ترجوني علشان اشوف الموضوع وتخيلو بعد سنين عناد والم وقهر انخطب وبعد كم شهر تتفركش الخطبه عانيت معاناة الله لايراويكم . تعقدت من هالسالفه واعترف اني مره خايفه من هالقرار على الرغم من شخصيتي واني مسئولة بعملي وصاحبة قرار وقوية بالحياة بس قرار الارتباط صرت مره خايفة منه لاني خايفه من الفشل والمجهول.

وبعدها انخطبت اكثر من مره من احسن الاشخاص لكن كل مره مايصير نصيب .

خلاصة الموضوع يابنات تريثو ولا ترفضون بس كذا ولاسباب تافهه اهم شى الاخلاق والدين والمعاملة الطيبة وانه شخص شاريك .

انا اليوم والله احس اني زي الصحراء الخاوية ويش بستفيد جمال ووظيفه وشهاده وعايله وقلبي يتقطع كل ماشفت طفل انا طفشت جد من حياتي ولا ماعاد ابي اعيش مهمومه ومتضايقه واحس اني اعيش اليوم زي الامس واروح واجي رافعه راسي بس داخلي مكسور ومقهور ومأساه لدرجة اني احس بالنقص ماينفع بعد اكابر واسوي نفسي قوية ماعدت اتحمل امثل في العمل والبيت وقدام الاهل وخوياتي وكأني عايشه حياتي طبيعيه ومو ناقصني شى انا انسانه صادقة مع نفسي ومحتاجة من يحن علي لان احس صبري نفذ قلبي ما يالمني على موضوع الزواج بشكل عام ممكن القى اي شخص قلبي يتألم لاني فعلا مالقيت اللي يفهمني وافهمه اللي اشوفه كل شى اللي اقبل فيه بدون تردد وخوف .

ماادري والله مو عارفه وش اكتب كلامي ملخبط بس محتاجة منكم كلمه تصبرني .