احترت مع زوجي

يا بنات انا متزوجه من 16 سنه وزوجي خاني من زمان و واجهته وصارت بينا مشاكل وكنت احقق وادقق وما اثق فيه بسبب خيانته وبنفس الوقت هو ما عطاني الامان ولا حسسني انه غلطان يعني صار فيه تراكمات ما انحلت...حاليا زوجي صارله سنه عازل نفسه بغرفه ثانيه وصاد ويقولي خلاص اعتبرينا منفصلين وانه يأس ان وضعنا يتغير وفقد الامل وانه بيدور سعادته وراحة باله مع العلم انه ما حاول يصلح الامور...وانه يبي يعيش لحاله..حتى عياله ماصار يقعد معهم ابد مع العلم انه كان حنون وحريص عليهم ..الحين يقضي وقته كله من اصحابه وسهر للصبح واشوفه يتعرف على بنات بالفيسبوك ويتواعد معهم..
انا حاولت احتويه واشبع احتياجاته وعبرتله عن حبي ومشاعري ولا فاد حتى العلاقه ماصار يطلب وكنت انا اللي اطلبها وكان يقولي احنا بس نشبع حاجتنا مافي التزامات .. واحيانا يحسسني انه ماوده او يتثيقل بس يتفاعل معي واحيانا يردني بحجة انه بينام
جربت سحبت نفسي ما ارسله مسجات ولا اقعد معه حتى العلاقه ماصرت اطلبها ..بس اشوفه صار منفس ومعصب ..ويسوي تصرفات مستفزه ويتجاهلني..وصلت لمرحله احس اني تغيرت و جربت اشبع احتياجاته وادلعه واهتم فيه ولا جاب نتيجه احسه مصمم عاللي براسه
فكرت اخليه على راحته يروح يسوي اللي يبيه لاني مهما سويت ماراح اغير تفكيره بس خايفه اخسره و وحده ثانيه تلف عليه
يعني مو عارفه شسوي ..ما ابي اخسره و ودي يتصلح الوضع بس بنفس الوقت الى متى انا بلاحقه وهو سافهني
يحسسني انه مصمم على موقفه ويقول احنا مختلفين ماعندنا اهتمامات مشتركه وطريقة تفكيرنا غير .. وميولنا مختلفه!! قلتله كثير متزوجين مافي اهتمامات بينهم هم يدورون اشياء تجمعهم وفيه عيالنا بينا..بس مافي فايده
شكيت انه يمر بأزمة منتصف العمر عمره 42 لانه سحب نفسه من زوجته وعياله واهله و وقته كله لربعه
وانا مو متأكده من نمطه شمالي او جنوبي بس الاكيد انه غربي